Ɓimezle ngi Yesu Kristu LUK mitil di mi 12 - Bible en langue guiziga

Ji lesl avu ɓi mi mucuw cuwo

¹ Tapas nah na, zigiduw a kus durmuk mbeˀ mbeˀ, hã a kurpam vu ar wala taŋ. Yesu a zla a ɓa mizli ngi seˀeheye: «Dumbuŋ na, jam lesl avu ˀis ngi slikiɗa hapa ngi Farisahay, ɓi mi taŋ mucuw cuw na.

² Gwat muɗum masa njik ta na anta. Gwat miyaŋŋa masasinta na anta.

³ Asi mike na, ɓi kum miɓaka le angi luvuŋ gar na, a sa cin njoy ar li babaraŋ. Ɓi kum misisikam di ˀay le a viŋ na, a sa tilam di mi deŋ a balak.

Mbur ngi zluwun di

⁴ Kum ngama ɗuwoy, yi ɓukum na: Mizli makiɗaka dumvu ngi mburo vagay, yo a dirba nah a gam gwat mifineˀ nah gu mata na, ki zluwunam ti taŋ ta.

⁵ Mbur ngi zluwun di na, yi sa bugukum di: Naŋ na, a dirba naŋ mikiɗa mburo le vagay na, naŋ ti gidaŋ ngi hizigaŋ ng'ar vu ma. Haˀaw, yi ɓukum na, sey ki zluwunam di i naŋ.

⁶ Anta hiɗikam jur zlum, sisi cuw ta kwa? Dambalaka ko Buymisemuŋ anta puyuk hirnga ti jur pal asi taŋ ta.

⁷ Wãˀ naŋ ma na, ko himac ngi hirnga kum kwana, a slufaka taŋ le gar. Ki zluwunam ta so, kum puɗaw haɗa fineˀ juroyo gar!

Gi sedewo ar Yesu a mbuŋ mizli

⁸ Yi ɓukum na: Ko wa gar masa ɓi njah a mbuŋ mizli, naŋ i mbur ɗu na, Mangal ngi mbur a sa ɓi njah a mbuŋ modro ngi Buymisemuŋhoyo, naŋ i mbur naŋ ya.

⁹ Amma mbur masa ɓi njah a mbuŋ mizli, a siniy ta na, Mangal ngi mbur a sa ɓi njah a mbuŋ modro ngi Buymisemuŋhoyo, a sinaŋ ta ya.

¹⁰ Ko wa gar masa ɓi ɓi malambaˀ ar Mangal ngi mbur na, a sa pulakaŋ di avra, amma mbur masa za ˀUf Mipal na, anta sa pulakaŋ di avra ta.

¹¹ Taŋ misa ram ti kum le ngi gukum kiita a mi hay ngi dira dibiɗey, a mbuŋ buyoy, malla a mbuŋ mizli madiɗahay na, kum masa cikam vu vur hirnga kum, yo ɓi kum masa ɓaka gar na, ki zluwuna ka ta

¹² Asi ɓi kum masa ɓaka na, i ˀUf Mipal masa ɓukum di hirak ti nah vuna si.»

Ɓi ngi mbur gilaw misi zlili

¹³ Mbur a ɓo Yesu ti wuzla zigiduwo: «Kumani, inga ɓa sukum ɗu na, ɓa i wunkaka zlili cine ndra mupula ndra di na takwa?»

¹⁴ Yesu a ɓaŋ: «Micifiy ya ngi gi kiita kum, malla ɓa ngi wunka zlili kum, i waka?»

¹⁵ Yesu a ɓa mizli ma: «Jam lesl, wam vu avu may gwatay gar, asi ko da mbur a lum zlili le haɗi tekeɗe kwana, a ndir ti siifa aseˀe ta.»

¹⁶ Joˀ a ɓa taŋ ɓi miweˀ ti wi ani: «Mbur misi zlili ada, guva naŋ a gaŋ gwat haɗi.

¹⁷ A ɓi ti kwacay naŋ: ‹I sa gi mike? Asi li ngi kuso gwat ngi migam ɗuwoy anta.›

¹⁸ Dar a ɓi: ‹Gwat ya masa ga ani: i sa waha dirgwaɗ ɗuwoy avra, i sa ndir madiɗahay mifineˀ fineˀ hanayna, i sa kuso daw ɗu ati zlili ɗu gar ar taŋ.

¹⁹ Yo i sa ɓa vu ɗu na: Kˀani, ki wi vu le ti gwat haɗi ngi gi vi mbeˀ mbeˀe. Musuk vu, zum, si gwat huruˀ huruˀ, mumul so.›

²⁰ Amma Buymisemuŋ a ɓaŋ: ‹Gilaw lambaˀ! A sa zuɓaka siifa ɗike ar duvuɗ hana vuna si. Na, gwat ka mukuso taŋ hana, a sa ndir da waka?›»

²¹ Dar Yesu a kiɗa mi naŋ, a ɓa taŋ: «Mbur makuso zlili da hirnga naŋ, mbak gi zlili ngi Buymisemuŋ le na, a sa gi avaˀa kanah ya.»

Pula vu mbak da Buymisemuŋ

²² Dar Yesu a ɓa mizli ngi seˀeheye: «Vurˀe, yi ɓukum na: Gwat kum masa zumam ngi ngir ti naŋ, yo zana kum masa kam avu vu gar na, ki likam vurˀe ta.

²³ Asi siifa a funa gwat ngi zumo le, yo dumvu kwana, a funa zana le.

²⁴ Puraka magagakay ɗi: t'anta zligam gwat ta, t'anta kusom gwat ngi sifi ta, li ngi wi vu ti gwat ngi zumoy malla dirgwaɗ anta, amma Buymisemuŋ ara zum ti taŋ. Kumo, kum puɗaw haɗi fineˀ ɗiyuwoyo!

²⁵ Mbur a wuzla kumo, mamurɗo hin ngi siifa naŋ, ko neˀ gu ti lik naŋ na, ada kwa?

²⁶ Da kum anta ti gidaŋ ngi gi gwat ko meciɗek wãˀ vuna ta na, is naŋ mindir gar na, ki likaka vur mike?

²⁷ Puraka matay ngi ɓuhoy: t'anta siram gugumay ta, t'anta jam zana ta. Yo i ɓukum na: Ko Salomoŋ ti dudok naŋ gar kwana, a ki zana mezle ka taŋ na ɗaˀ ta.

²⁸ Kum mizli misi tiɓi keɗeccehey, giziŋ misi a ɓuh dana, tiprike, a sa hizigakaŋ vu, da Buymisemuŋ ara kaŋ zana kanah na, a sa kukum di da kumo fineˀ nah ta jak kwa?

²⁹ Kumo na, ki giraka lesl kumo ngi sipi gwat kum masa zumam ati ngi sipi gwat kum masa sama ta.

³⁰ Gwat tayna gar na, maram ti sipi naŋ ndrehhe, i mizli duniyahay. Amma kumo, Cine kum a si na le, ki roko ti may naŋ.

³¹ Sipam Zumabuy naŋ jaka, ɓa gwat mindiramaya, a sa pukum di ameˀeŋ.

Zlili ngi muŋ

³² Kum minjreˀ ka ginew gezleŋ meciɗek na, ki zluwunam ta, asi Cine kum a hĩyã le ɓa a vulukum Zumabuy naŋ.

³³ Hiɗikaka gwat kumoy avra, vulaka dala nah da misi murgahay. Tufam birtete mangiram tahay, cikilam zlili mahiryi ta wãˀ a muŋ. Ko muhul a ndil a diga gu ta, ko tiler a hirya gu ta.

³⁴ Vur ar li zlili kum misi ara na, mevel kum kwana, naŋ ara ya.

Ɓi ngi gawlahay makutukom buy taŋ

³⁵ Ndiram ti zana ngi slra ɓaˀ ɓaˀ avu vu, yo lampe kumoyo, vu kaw kaw avu taŋ.

³⁶ Ndiram ka gawlahay makutukom buy taŋ masa mawa tir muguzlum ngi vula ngwasa. Naŋ misa ndilo le, yo naŋ misa kiɗa miviŋ le na, ɓa a sa wunakaŋ di.

³⁷ Gawla tayna, da buy taŋ a ndilo le, a sa luuma taŋ le titiri na, a mumulom! Gisiŋ, yi ɓukum na: A sa ka zana ngi slra, a sa cifa taŋ jojoˀ ngi zuma gwat, joˀ naŋ a so taŋ ti gwat ngi zumo.

³⁸ Yo ko a ndilo ng'avu wuzla duvuɗ, malla wuzla duvuɗo cuh le kwana, da a luuma taŋ le titiri na, a mumulom!

³⁹ Ki sinaka le, da buy ngi hay a si na pas ngi muhul masa sawa le na, anta sa pula a slinakaŋ dalama ta.

⁴⁰ Kumo kwana, wam vu, asi Mangal ngi mburo, a sa so ti pas kum misinaka ta ya.»

Gawla miteŋteŋ ati gawla malambaˀa

⁴¹ Dar Piyer a ɓaŋ: «Buy, ka miɓa ɓi miweˀ ti wi hana na, vur ndra kwa? Malla vur mizli gar kwa?»

⁴² Buy Yesu a ɓaŋ: «Gawla miteŋteŋ misi lesl i wana ska? I mbur, buy ngi hay masa pula hay naŋ gar asi haŋ naŋ, ɓa a wunka dawa da mizli ngi hayaya kaslsla angi pas taŋ muwuɗam le gar.

⁴³ Gawla nah na, da buy naŋ a ndilo, a sa luuma le ar li gi slra nah na, a mumul!

⁴⁴ Gisiŋ, yi ɓukum na: Buy naŋ a sa cifaŋ i madiɗa a hirnga zlili ngi hay naŋ gar.

⁴⁵ Amma da gawla nah, ara ɓi ti kwacay naŋ: «Buy ɗu a mur le ngi mawa.» Dar a zla a kiɗa gawla ati diili migi slraˀahaya, yo a zum, a si hã a wi na,

⁴⁶ buy naŋ a sa ndilawa angi hin, naŋ makutuko mata, yo angi pas naŋ misina ta. Kay, a sa gaŋ bonoy kuyta wãˀ, a sa vulaŋ dangay ngi mizli miteŋteŋ tahay.

⁴⁷ Gawla misina gwat ngi buy naŋ mawuɗo le, amma a cici gak ngi ga gwat buy naŋ mawuɗo ta na, a sa mbakaŋ ti kiɗ.

⁴⁸ Amma gawla misina gwat buy naŋ mawuɗo ta, yo da a gi gwat zliv a ndila le ɓa a lum kiɗ na, a sa kiɗakaŋ neˀkini si. Mbur muvulakaŋ gwat le haɗi na, a sa cufuɗam ava haɗa ya. Mbur mupulakaŋ gwat le haɗi na, a sa cufuɗam ava haɗi ti vendeke.

Yesu muso ti wunkaˀay

⁴⁹ Yi so di i vu asi ruwuyo. Yi wuɗ na, anja a bul le zleˀe si na, kuy!

⁵⁰ Yam ada, ɓa sey yi ci araŋ, yo i ra ɓusa ɓa hã tapas naŋ mikiɗ mi le!

⁵¹ Ki waka na, yi so di i zuy asi ruwuyo kwa? Naŋ kanah ta, yi ɓukum na: Yi so di i wunkaˀay jaka.

⁵² Asi zle wurenna, mizli zlum ar hay purla na, a sa wunkam ˀay. Mimakirey anta sa jumom ˀay ati mucuwoyo ta, mucuwoy kwana, anta sa jumom ˀay ati mimakireye ta.

⁵³ Cine ngi mangal a sa wunkamˀay ati mangal naŋ, mangala kwana, a sa wunkam ˀay ati cine naŋ. Mumuŋ ngi zuŋ a sa wunkamˀay ati zuŋ naŋ, zuŋ kwana, a sa wunkamˀay ati mumuŋ. Mumuŋ ngi mangal a sa wunkam ˀay ati ngwas ngi mangal naŋ, ngwasa kwana, a sa wunkam ˀay ati mumuŋ ngi zil naŋ.»

Sli wala ngi gwatay magam wurenna

⁵⁴ Yesu a ɓa zigiduwo ma: «Da kum mupuram gazlavay a bo le tisi pas ngi pastaˀ na, a haŋhaŋ si na, ki ɓam: «Vuŋ a sa gi» na, ara gi gisiŋ.

⁵⁵ Yo da ki puraka le, himiɗ ara so tir vay ngi ruwuy na, ki ɓam: «Lihriɓ a sa gi haɗi» na, ara gi gisiŋ.

⁵⁶ Kum miɓi mi cuw cuwoy, gwatay magam a ruwuy ati magam ar birngiŋ ngi muŋ na, ki slaka wala taŋ gu ɓula. Na, gwatay magam wurenna na, ki slaka wala taŋ gu ta mbrike?

Ɗiyam ɓi ati mbur mazlir ti ka ta

⁵⁷ Kumo, kum anta slaka wala ngi ɓi mijeŋŋe ta, vur mike?

⁵⁸ Naŋ kine, mbur miwidi ti ka le, da ki ra ram cuwa nga mbuŋ mbur migi kiita na, cik vu ɓa ki ɗiyaka ɓi naŋ zle a jiviɗi. Vur naŋ masa ru ti ka nga mbuŋ mbur migi kiita, migi kiita, a sa vuluw da mijigina dangay, yo mijigina dangay a sa cuw ar dangay.

⁵⁹ Yi ɓuw na: K'anta sa bi tir dangaya ta wãˀ, sey da ka muwuruk le, ko sisi a ndir ta.»