Ɓimezle ngi Yesu Kristu LUK mitil di mi 11 - Bible en langue guiziga

Yesu mudubuna dira dibiɗ da mizli ngi seˀehey

¹ Ngi pas mekelem ada na, Yesu ara dir dibiɗ ar li numuŋ ada. Ti naŋ mikiɗa mi naŋ na, mbur pal a wuzla mizli ngi seˀehey a ɓaŋ: «Buy, dubuna ndra dira dibiɗ kaɓa Zaŋ mudubuna da mizli ngi seˀehey na ya.»

² Yesu a ɓa taŋ: «Da ki ra diram dibiɗ na, ɓam: Cine ndra, anja mizli a sinukuw, ki Buymisemuŋ mipal, anja ki so zum buy a wuzla mizli.

³ Vula ndra ɗaf ngi kiɗa may ndra vur hin gar.

⁴ Pula ndra gwat malambaˀ, ndra migakaŋ, asi ndra vuna, i ra pulaka malambaˀ ngi mizli magam ndra di gar. Ki pula ndra i cam ar li ngi tikin ta.»

⁵ Yesu a ɓa taŋ ma: «Da mbur asi kumo, naŋ da ti ngama, yo ngi wuzla duvuɗo, ara luuma ngama naŋ tuwa, a ɓaŋ: ‹Ngama ɗu, vuliy ɗaf makir,

⁶ asi ngama ɗu a ndilawa ani ti mulak, ko gwat ngi zum ɓa yi vulaŋ anta.›

⁷ Dar ngama naŋ a mbiɗaŋ di ti viŋ: ‹Ki giy ngaˀa ta! Wurenna, yi gica miviŋ le, i roko tutup ati ziri ɗuwoyo. Y'anta slikiɗ ngi vuluw ɗaf gu ta.›

⁸ Yi ɓukum na: Da ko a slikiɗ, a vulaŋ asi mesem ngi ngama naŋ na ta kwana, ko mbri a sa slikiɗ, a vulaŋ gwat naŋ mawuɗo, asi ngama naŋ anta gi mesem ngi cufuɗaŋ ta.

⁹ Naŋ kine, yi ɓukum na: Cufuɗam gwat, a sa vulukum, sipam gwat, kisa lumam, tilam mi ngi haya, a sa wunukum mizlingre.

¹⁰ Asi mike na, mbur gar macufuɗ gwat na, a sa vulakaŋ. Mbur masipi gwat na, a lum. Yo mbur matil mi ngi haya, a wunakaŋ mizlingre.

¹¹ I cine ngi zuŋ wana a wuzla kumo, da zuŋ naŋ ara cufuɗ kilif ava na, a sa vulaŋ kaw, mbak kilife le na ka?

¹² Yo da a cufuɗ tesl kucukur na, a sa vulaŋ ˀuruc kwa?

¹³ Da kum mizli malambaˀhay, ki sinaka vula gwat mezlehey le da ziri kumoyo na, naɓa Cine kum mise amuŋ, a sa vula ˀUf naŋ na, da mizli macufuɗakaŋ na ta jak kwa?»

Yesu ati Beˀelzebul

¹⁴ Yesu ara ɓula setene maɓi gu ta. Setene mibi na, mbur maɓi gu ta tuwa, a zla a ɓi, hã a zuma hirnga da zigiduwo.

¹⁵ Amma mekelemey ar wala taŋ a ɓam: «Mbur hana a ɓula seteneheye ti gidaŋ ngi Beˀelzebul, buy ngi setenehey.»

¹⁶ Numuŋhoyo, ɓa a cam a kwacay Yesu na, a cufuɗam ɓa biga taŋ cekene maso paɗ ti muŋ.

¹⁷ Amma naŋ, a si na wuluk taŋ le, a ɓa taŋ: «Zumabuy gar, da mizli ngi raˀahay a wuɗkam ˀay le ar wala taŋ tehhe a muŋ na, naɓa a sa hiryi, yo hayay a sa mbuzlam ar cala ar cala.

¹⁸ Da Satan a wunuk ˀay le tehhe ati vu naŋ a muŋ na, Zumabuy naŋ a sa cici mbri mbri ma ka? Asi mike na, ki ra ɓam, ya maɓula setenehey na, ti gidaŋ ngi Beˀelzebul.

¹⁹ Da ya maɓula seteneheye ti gidaŋ ngi Beˀelzebul na, mizli kumoy a ɓulaka taŋ ti gidaŋ ngi wa ska? I taŋ masa bugukum di, ki zluɓaka le.

²⁰ Amma da ya maɓula seteneheye, ti gidaŋ ngi Buymisemuŋ na, kite Zumabuy ngi Buymisemuŋ a ndilo kum le si.

²¹ «Da mbur migidaŋ ara jigina hay naŋ ti gwat ngi vurum naŋhay na, ko gwat mawusa gwat naŋhay anta.

²² Amma da mbur migidaŋ mifineˀ naŋ a ndilo le, a tikaŋ ˀay le na, gwat ngi vurum naŋhay, naŋ mupula vu naŋ mbak aseˀe tuwa, a sa tiɓa taŋ cek, a sa wunka gwat naŋ mutuɓo taŋ ava na ceke.

²³ Mbur misi anta ti ya ta na, naɓa ɓi naŋ ada ati ya. Mbur makuso gwatay ati ya ta na, a zliɗa hirnga taŋ.»

Mo ngi setene

²⁴ Da setene mibi le ti vu mburo na, a liˀi ar li papala mikirɗak kirɗakay, ɓa a lum li ngi muskavu. Da a lum ta na, a ɓi a kwacay naŋ: «I sa mi ng'ar hay ɗu, ya mupulo di na a muŋ.»

²⁵ Naŋ mindilo le na, a luuma haya, i mufuca le fec fec, ɗiyeˀ ɗiyeˀ kuy kuy.

²⁶ Dar ara zilo setene mekelemey tarnaˀ mufunakaŋ ti malambaˀa, a cam, a cifam a hur mbur tuwa. A dirba nah, gwat ngi gi ngi mbur nah, a tiri malambaˀ wãˀ fineˀ misi zleˀe.

Mumul mikaslsla

²⁷ Ti Yesu maɓi kanah na, ngwas a tulo mi ti wuzla zigiduwo, a ɓaŋ: «Ngwas mijijiruw a kwacay naŋ, yo muvuluw ɗuwa na, ara mumul!»

²⁸ Amma Yesu a ɓaŋ: «Mizli macinam mingiɓi ngi Buymisemuŋ, majaka a hirnga na, mamumulom i taŋ jaka!»

Mizli mucufuɗam cekene avu Yesu

²⁹ Zigiduw mira kus na, Yesu a ɓi: «Mizli migwenehey, i mizli malambaˀhay, ara cufuɗam cekene. Amma anta sa gaka taŋ cekene mekelem ta, sey ngi Zonas na si.

³⁰ Asi Zonas a tiri i cekene avu mizli ngi Niniveye. Naŋ kine, Mangal ngi mbur a sa tiri i cekene avu mizli migwenehey na ya.

³¹ Tapas gi kiita na, ngwas mazum buy vay ruwuyo, a sa slikiɗ a mihiri mizli migweneheye, a sa ja taŋ ti kiita. Asi a so ti ngi hirwuy mikileŋ, ɓa ngi cine mingiɓi ngi Salomoŋ misi ti sinmijileŋ. Na, mifineˀ Salomoŋ vuna ada aka!

³² Tapas gi kiita na, mizli ngi Ninivey a sa slikiɗam a mihiri mizli migweneheye, a sa jaka taŋ ti kiita. Asi ti taŋ micinaka ɓi Zonas mitil di mi na, a mbiɗaka mevele le. Na, mifineˀ Zonas vuna ada aka!

Li minjahha ngi dumvu

³³ Mbur a ja vu avu lampe, ɓa a ɗumo ɗum asi gwat na, anta, amma a ɗuvaka taˀ ar li ɗuf naŋ, ɓa mizli macam ngi haya, a puraka li njahha.

³⁴ Hiri i lampe ngi vu dumvu ɗiki. Da hiri ɗike, naŋ kuy kuy na, naɓa dumvu ɗike gar, naŋ ar li minjahha ya. Amma da hiri ɗike, naŋ kuy kuy ta na, naɓa dumvu ɗike, naŋ angi luvuŋ ya.

³⁵ Ji lesl kuy kuy so, anja li minjahha misi a hur ɗike, a tiri luvuŋ ta.

³⁶ Da dumvu ɗik keɗeɗe gar, naŋ angi li minjahha manja luvuŋ anga na, naɓa dumvu ɗik gar a sa ndir ar li minjahha, kaɓa lampe mapusluɗuw ti li minjahha naŋ na ya.»

Yesu mimbiɗa hirnga da Farisahay ati buy ngi ɓimujuwahay

³⁷ Ti Yesu maɓi na, mbur Farisa a zilaŋ nga zuma gwat a hay naŋ. Yesu a ci, a cifi le, ara zum gwata.

³⁸ Yesu a buna haŋ ceɗ le dumbuŋ kaɓa mezegwel taŋ mawuɗo, ɓa a sa zum gwata na, a ga ta, mbur Farisa mupura na, a zumaŋ hirnga le.

³⁹ Dar Buy Yesu a ɓaŋ: «Kum Farisahaya, dubaˀ ngi taasa ati ngi kotomo kumoyo, ki bunaka taŋ ceɗ ceɗ ɓula, amma kwacay kumoyo, ndus ndus ti may hulo gwat ati moˀore.

⁴⁰ Gilaway! Mbur miga duba ngi gwat na, miga huroˀo naŋ i naŋ vuna ta wal kwa?

⁴¹ Zuwen vulam gwat ngi huroˀohoy da misi murgahaya jaka, ɓa gwat gar a sa tiri i miɗiya le avu kumo.

⁴² Amma kay, kum Farisahay, kum ar bonoy! Kalaf ngi minti ati kalaf ngi ɓuhoy waɗ lar ngir guvahay gar na, ki vulaka mukuruˀ taŋhaya ɓula. Amma gwat Buymisemuŋ mawuɗ ati wuɗavu naŋ na, ki pulaka mbak murvay. Anja ki gam zleˀe i nah jaka, waɗ numuŋhoyo ma ayɗi.

⁴³ Kay, kum Farisahay, kum ar bonoy! Ar hay ngi dira dibiɗeye, ki wuɗam, sey li cifi ngi mbuŋ, yo sey a jukum haŋ ar luumahay.

⁴⁴ Kay, kum ar bonoy. Kum ka zivi misinir sinirey, mizli maram digi tir taŋ, manja a sinakaŋ!»

⁴⁵ Dar buy ngi ɓimujuwa a ɓa Yesu: «Kumani, ka maɓi kanah vuna, ki zi di i ndra vuna ya!»

⁴⁶ Yesu a mbiɗaŋ di: «Kum buy ngi ɓimujuwahay, kay, kum ar bonoy. Kumo, ki zuɓaka gwat ngi jijir mududok dudokoy da mizli ɓula, amma kum vuna, ko ti muzuŋ haŋ tekeɗe kwana, kum anta wusaka gwat mududok dudok tayna ta!

⁴⁷ Kay, kum ar bonoy! Kumo, ki ndiraka zivi ngi mijiviɗeye, dambalaka i dideˀ kumoy mikiɗaka taŋ ngbaŋ.

⁴⁸ Naŋ kine, ki hĩyãka gwat dideˀ kumoy migaka na le, ki ra gaka sedewo naŋ. Asi taŋ a kiɗaka mijiviɗeye le vagay vagay, joˀ kumo, ki ndiraka zivi taŋhaya.

⁴⁹ Vurˀe, Buymisemuŋ ti sin naŋ mijileŋ a ɓi: «I sa slina taŋ mijiviɗ ɗuwoy ati misliney. A sa kiɗam asi taŋ vagay vagay, yo a sa ɓulaka numuŋhoyo.»

⁵⁰ Yo ma na, mijiviɗey, taŋ mikiɗaka taŋ gar, zle avu ɗuva virzi ngi duniya na, a sa pulaka cuwal naŋ avu mizli migwenehey,

⁵¹ zle avu pumbus ngi Abel, hã avu pumbus ngi Zakari, mizizakaŋ ar wala ngi li gi mikuli a mbuŋ Buymisemuŋ ati hay ngi Bumbulvuŋ na. Haˀaw, yi ɓukum na: A sa pulaka cuwal taŋ avu mizli migwenehey!

⁵² Kay, kum buy ngi ɓimujuwahay, kum ar bonoy! Ki gicaka miviŋ ngi si na gwata le, kum vuna, ki cam ta ma, yo mizli mawuɗam ci ma na, ki tikaka taŋ ma.»

⁵³ Ti Yesu mibi ti kẽh na, buy ngi ɓimujuwahay ati Farisahay a zlaka a sipakaŋ nder nder, yo a cufuɗakaŋ ti ɓihey wal wal haɗi.

⁵⁴ A cam a kwacay naŋ, ɓa a jakaŋ ar mi malambaˀ masa bo ar mingiɓi naŋ.