LEVIHEY 26 - Bible en langue guiziga

¹ Ki ɗiyam kulihey ta, ki ngam kuli dum malla ɗugur ɓa ki huruk hurukam a mbuŋ taŋ ta, yo angi hirwuy kumo, ki ngam ɗugur miciɗa ti ciɗ, ɓa ki huruk hurukam a mbuŋ naŋ ta. Asi mike na, yi Bumbulvuŋ, Buymisemuŋ kum.

² Hin ngi sabat ɗuwoyo, jaka taŋ a hirnga, yo ɗuvaka hirnga da hay ɗu. I ya Bumbulvuŋ.

Buymisemuŋ maɗuwula mi da mbur

³ Ɓimujuwa ɗuwoyo, da ki ra sipaka taŋ, ɓimuɗuva ɗuwoyo da ki ra jaka taŋ a hirnga, yo da ki ra gam taŋ slra na,

⁴ yi sa vulukum vuŋ kasl kasl angi hin naŋ angi hin naŋ, hirwuy a sa gukum gwata, yo widis kumoyo kwana, a sa yam.

⁵ Naɓa a hay kumo, ɗugo gwatay a sa zik, hã a ndila sifi ngi gudubun kumoy, yo hin ngi sifi ngi gudubun kumoy kwana, a sa zik, hã a ndila hin ngi zligi. Ki sa zumam, hã ki mbam, yo kisa cifam setette asi ruwuy kumo ma kini.

⁶ I sa vulo zuy asi ruwuyo. Da kum mihinam le tup tup na, ko gwat masa gukum ngaˀa anta. Gwat malambaˀ misãmiheye, yi sa ngizla taŋ pay tisi ruwuyo, yo ko mbur masa gi vurum ti kum anta mata.

⁷ Ki sa ɓulaka mesene kumoyo, kisa kiɗaka taŋ ti maslalam, a sa ndilam kuros kuros a mbuŋ kumo.

⁸ Mizli zlum asi kumo, taŋ ter ngi ɓula mizli skata, yo mizli skat asi kumo, a sa ɓulam mizli durmuk kuruˀu, joˀ kisa kiɗaka mesene kumoyo ti maslalam, a sa ndilam kuros kuros a mbuŋ kumo.

⁹ I sa mbuɗo hiri ng'avu kum, yi sa vulukum yi haɗa, yi sa ga ɓa ki jam ngweɗeŋ ngweɗeŋ, yo jumoˀay ɗu ati kum na, yi sa ga ɓa naŋ da a ndir.

¹⁰ Gwat ngi migam kumoyo, kisa zumam misi ngi vi mbeˀ mbeˀe. Yo kisa boko ti mivi avra, ɓa a pula li da nawaya.

¹¹ I sa ɗuva hay ɗu a wuzla kumo, yo y'anta sa mbuɗokum duba ta.

¹² I sa ru ɓaˀ a wuzla kumo, yi sa tiri Buymisemuŋ kum, yo kumo kwana, kisa tiram mizli ɗuwoy.

¹³ I ya Bumbulvuŋ, Buymisemuŋ kumo mubo ti kum ti ruwuy Ezipte, ɓa ki gam beke taŋ mata. Mingila galalaŋ ngisi ay kumoyo, yo mubo ti kum hirnga paɗ a muŋ na, i yaha.

Buymisemuŋ manisa mbur

¹⁴ Da kum anta ki cinikiy mi ta, yo ɓi muɗuvahaya gar, kum anta gam taŋ slra ta,

¹⁵ ɓimujuwa ɗuwoyo, da ki ra hizigaka taŋ avra, yo sirik ɗuwoyo, ki ra mbiɗaka taŋ duba, hã ki ngilaka ɓi ngi jumoˀay ɗu ati kumo, ɓa ki gam slra ti ɓimuɗuva ɗuwoyo mata na,

¹⁶ yawwa! gwat ya masa gukum di ani: I sa slino ti gwat ngi gukum zluwun, i jiji makiɗ vu kutum ta waɗ gamba mihimaˀ, matikaka gidaŋ ngi hiri, yo mazizaka siifa ngi mburo zayãˀ zayãˀ. Ki sa zligaka guva kumoyo, amma gar ngataraŋ, asi masa zumaka gwat ngi migam kumoy i mesene kumoy.

¹⁷ I sa mbiɗi pulaˀ ng'ar kumo, mesene kumoy a sa kuɗukum. Mizli magam mesene ti kumo, a sa cifam buy ar kum, joˀ kisa kilam manja a ɓulukumo si.

¹⁸ Da kum anta cinikiy mi ta ti vendeke ma na, yi sa kutukum kuti mukuyta wãˀ asi mungra kum na, hã makaw tarnaˀa fineˀ misi zleˀe.

¹⁹ Gidaŋ kum ngi huhumo vu na, yi sa kiɗa avra, yi sa ga ɓa muŋ a tiri gidaŋ kaɓa ɓiri, yo hirwuy kumo, ɓa a tiri gidaŋ kaɓa ɓiri gaza.

²⁰ Ki sa tikaka gidaŋ kumoyo ngataraŋ, ko hirwuy anta sa gukum gwat ngi migama ta, yo widis ngisi ruwuyo kwana, anta sa yi mata.

²¹ Da ki ra slam himaˀ avu ya, yo da kum anta ngumam cinikiy mi ta na, i sa kutukum ti bonoy mukuyta wãˀ fineˀ misi zleˀe, hã makaw tarnaˀa, weˀe avu mungra kumoyo.

²² I sa slino gwat misãmi ngi ɓuhoy ng'ar kumo, a sa jukum ziri, a sa ngizlaka ginew kumoyo leɗeɗ, yo a sa nguzlukum pay, hã jiviɗ kumoy a sa tiram ɓuh.

²³ Da ki tiɓaka kuti, ya mukutukum ti bonoy na ta, ki ra slam himaˀ avu ya ɓula si na,

²⁴ naɓa ya kwana, i sa slikiɗ himaˀ avu kumo, i sa kutukum ti bonoy hã makaw tarnaˀ asi mungra kum na.

²⁵ I sa go vurum ng'ar kumo, ngi pula bol ngi kum mingilaka jumoˀay ɗu ati kum na, dar kisa kusom hirnga turkpus ar walahay madiɗa kumoyo. I sa slino ti mozorbono nga wuzla kumo, yo i sa pulukum zlaɗ da mesene kumoy.

²⁶ I sa ga ɓa ki lumam ɗafa ta, ngwasay kuruˀ a sa kusom ng'ar liwis purla, yo ɗaf taŋ masa sukum di vuna, a sa cukumdi ti ci, mbak kisa zumaka kiliyem kiliyem, ko a mbukum ta.

²⁷ Gar ti nah, da kum anta ki cinikiy mi ta ɓula si, yo ki ra slam himaˀ avu ya na,

²⁸ ya kwana, i sa slikiɗ himaˀ avu kumo ti mevel fõh fõh, i sa kutukum ti haŋ ɗu ti bonoy hã makaw tarnaˀa ngi pula mungra kumoyo.

²⁹ Ki sa zumam useˀ ngi ziri kum mizilehey ati mongosohoy tehhe a muŋ.

³⁰ I sa susuymo li miɗingir ɗingir ngi kuli kumoyo, li gi mikuli kumoy ti urdi na, i sa waha taŋ avra, yo i sa kuso vagay kumoyo kos kos nga hirnga kuli kum mingila meɗ meɗ na. Dar i sa mbuɗukum duba.

³¹ Walahay kum madiɗahaya, i sa tiri ti taŋ diŋ, yo li gi mezegwel kumoyo, i sa tiri ti taŋ kirɗak kirɗak, waɗ mikuli ti urdi kumoy, misi zĩˀĩ taŋ a tisliy mevel na, y'anta sa zãˀã taŋ mata.

³² Ya ti haŋ ɗu, i sa ngizla hirwuy kumo, hã a sa zuma hirnga da mesene kumoy musoko ɓa a cifam anga na.

³³ I sa pulo vurum ng'ar kum, yo i sa zliɗukum hirnga mber mber nga wuzla sukwi mekelemey. Hirwuy kum a sa tiri wuzlaɓuh mikirɗak kirɗak, yo walahay kum madiɗahay a sa tiram diŋhey njoˀ njoˀ.

³⁴ Angi vihey, kum muroko ɗoɗok angi hirwuy ngi mesene kumoy na, naɓa hirwuy a sa musuk vu, a sa ga hin ngi sabat naŋhaya muduba so.

³⁵ Angi vihey, kum muroko ɗoɗok na, hirwuy a sa musuk vu ar deɗe ngi sabatay mucohom zleˀe, naŋ mulum musuko vu ta, ti kum micifam zleˀe anga na.

³⁶ Amma mizli ngi wuzla kumoy masa ndiram ti siifa angi hirwuy ngi mesene kumoy na, i sa ga ɓa didak a muɗa taŋ haɗa. Ko hurum ngi kalaf ngatara masa diɗo kwana, a sa kilam di, a sa kilam kaɓa makilam vur ngum ti maslalam, ko da anta gidiɗaka taŋ ta tekeɗe kwana, a sa ndilam ɓaˀ ɓaˀ si.

³⁷ Sar a sa ba taŋ ar wala taŋ vuna tehhe a muŋ, kaɓa makilam vur ngum ti maslalam, dambalaka, ko mbur anta sipa taŋ ta ngbaŋ. T'anta sa cicam zlak a mbuŋ mesene taŋhaya gu ta.

³⁸ Mbak a sa micam a wuzla sukwi mekelemey, joˀ hirwuy ngi mesene taŋhay a sa zuma vagay taŋhaya.

³⁹ Da mekelemey a wuzla kumo, a ndiram le ti siifa angi hirwuy ngi mesene kumoyo tekeɗe kwana, a sa vusom vus vus asi mungra taŋhay waɗ mungra ngi dideˀ taŋhay na ma.

Buymisemuŋ masa wulka jumoˀay naŋ ati Israyeleye keŋ

⁴⁰ «Amma, mizli masa ndiram ti siifa tayna, a sa njikaka mungra taŋhay waɗ ngi dideˀ taŋhaya, a sa ɓam a gam mungra madiɗa le avu ya, yo a slam himaˀ le avu ya ma gar.

⁴¹ Ya kwana, yi slikiɗ himaˀ le ar taŋ, yo yi ru ti taŋ le ng'ar hirwuy ngi mesene taŋhay na, taŋ vuna a sa slaka wala nah. Yo ma na, pas purla na, taŋ misi hirnga gidaŋ haɗa na, a sa hinam hirnga, yo ya makuta taŋ ti bonoy na, a sa tiɓaka naŋ kaslsla gisiŋ.

⁴² Akẽh na, i sa wulka jumoˀay ɗu ati Zakop, Izak waɗ Abrahama, yo ya miɓi ɗaˀ le zleˀe vur hirwuy taŋ na, yi sa wulka keŋ ma.

⁴³ Ti taŋ masa pulaka hirwuyo njoŋ pal naŋ na, hirwuy a sa ga sabat naŋhaya muduba so. Ar nah na, a sa ɓusaka kuti taŋ ti bonoyo, asi taŋ mihizigaka sirik ɗuwoy avra, yo asi taŋ mimbiɗaka duba da ɓimujuwa ɗuwoy na.

⁴⁴ Dambalaka, ko ti taŋ misi angi hirwuy ngi mesene taŋhay na tekeɗe kwana, y'anta sa zliɗa taŋ avra ngi wãˀ ta, y'anta sa mbiɗa taŋ duba, hã ngi ngizla taŋ kuɗup ta, yo yi sa ngila ɓi ngi jumoˀay ɗu ati taŋ na ta ma, asi Bumbulvuŋ, Buymisemuŋ taŋ i ya.

⁴⁵ Haˀaw, ɓi ngi lih taŋ ati jumoˀay, ya mujum ati dideˀ taŋhay, ya mubo ti taŋ ti ruwuy Ezipte a mihiri ngi sukwi mekelemey, ɓa yi tiri Buymisemuŋ taŋ na, yi sa wulka keŋ. I ya Bumbulvuŋ.»

⁴⁶ Naŋ kine, ɓi micicahay, sirikey ati ɓimujuwahay, Bumbulvuŋ ɓi micica ar wala nga naŋ ati Israyeley a muwã Sinay tisi Moyis na, i hanayna so.