LEVIHEY 25 - Bible en langue guiziga

Vi ngi pula hirwuy a musuk vu

¹ Bumbulvuŋ a ɓa Moyis a muwã Sinaya na,

² «Ɓa Israyeleye: Ti kum misa cam le nga hirwuy, ya mavulukum di na, ar vi mekeleme, pulaka hirwuy a musuk vu, kite i sabat ngi ɗuva hirnga da ya Bumbulvuŋ.

³ Angi vi merkeɗ na, ki zligaka guva kumoyo, ki slaka mihaŋ ngi widis ngi gudubun kumoyo, yo ki gaka sifi ngi gwat ngi migam ngir guva kumoyo.

⁴ Amma, vi mitarnaˀ naŋ na, a sa gi i vi ngi sabat, vi ɓa hirwuy a musuk vu, i sabat nga ya Bumbulvuŋ. Ki zligaka guva kumoyo ta, ki slaka mihaŋ ngi gudubun kumoyo ta.

⁵ Gwat hiri naŋ mupuso le pal naŋ na, ki gaka sifi naŋ ta, yo yi ngi gudubun ngir fat kumoyo na, ki slaka ta, asi mike na, i vi ɓa hirwuy a musuk vu.

⁶ Amma, gwatay masa gilam pal taŋ angi vi ngi sabat nah gar na, kisa zumam di i nah, kum ati gawla kumoy, diili migi slra ngi hay kumoy, migi slra ngi dala ngi hay kumoy ati mulakay, na zle mizli misi asi ruwuy kum gar si.

⁷ Naŋ kanah ya, ginew kumoy ati gwat misãmi ngi ɓuhoy misi angi hirwuy kum gar na, a sa zumam di i gwat masa gi angi hirwuy kum na gar.»

Vi ngi luuma hirnga

⁸ «Ki sa sluf luuma ngi vi tarnaˀ tarnaˀ is tarnaˀ, mbiɗeˀvra, vi tarnaˀ tarnaˀ makaw tarnaˀ. Vi ngi luuma tarnaˀ tarnaˀ, makaw tarnaˀ tayna na, i vi kukur mufaɗ nga ngoltir.

⁹ A dirba nah, hin kuruˀ ngi kiya mitarnaˀ naŋ na, kisa fam tulum, kisa jam salalay. Ar hin Madiɗa ngi Pula mungra na, kisa fam tulum asi ruwuy kum gar.

¹⁰ Kanah so na, vi mizli ngir zlum naŋ na, kisa tilam di mi asi ruwuyo gar, i vi mipal, yo i vi ngi luuma hirnga ngi mizli ngisi ruwuy kum gar. Vi nah na, avu kumo, i vi ngi ‹zluzluɓu.› Ko wa gar a sa mi nga hirwuy naŋ, nga wuzla muy naŋhay.

¹¹ Naŋ kine, vi mizli ngir zlum naŋ gar na, i vi ngi zluzluɓu. Vi nah na, ki zligam ta, gwatay masa gam pal taŋ na, ki gaka sifi taŋ ta, yo gudubun ngir fat kumoy na, ki slaka yi taŋ ta.

¹² Asi a sa gi avu kumo, i vi ngi zluzluɓu, i vi mipal. Gwatay masa gam pal taŋ ar guva na, kisa zumam di i naŋ.

¹³ Angi vi ngi zluzluɓ nah na, ko wa gar a sa mi ng'ar hirwuy nga naŋ nga naŋ.

¹⁴ Da ko ki gam di i terere, ko i mbur kum misi angi hirwuy purla mahiɗik gwat avu kum malla da ko i kum mahiɗikam gwat ava kwana, anja ki zumam vu ar wala kum sukumuŋhoyo ta.

¹⁵ Mbur, kum misi angi hirwuy purla ati naŋ na, da ki ra hiɗik gwat ava malla naŋ ara hiɗik gwat avu ka na, sey ki waka cikili ngi gwata weˀ avu vi mucohomoy na, zle avu vi ngi zluzluɓ ngi dirba wãˀa, ngira ndila sifi ngi vihey mindiram nga mbuŋ na ma.

¹⁶ Da taˀ ngi vi mindir nga luuma vi ngi zluzluɓo, naŋ haɗa na, naɓa cikili ngi guva naŋ haɗa ya, yo da vi mindire, naŋ neˀkini kwana, cikili ngi guva a mi nga ruwuy aya, asi a gam di i cikili ngi taˀ ngi sifihey mindiram nga mbuŋ.

¹⁷ Ar wala kum mizli misi angi hirwuy purla na, anja mbur a zuma cil naŋ ta. Kum masa zluwunam ti ya Buymisemuŋ kumo na, naŋ kahana. I ya Bumbulvuŋ, Buymisemuŋ kum.

¹⁸ Ɓimujuwa ɗuwoyo, gam taŋ slra, sirik ɗuwoyo, jaka taŋ a hirnga, yo gam taŋ slra. Kanah na, naɓa kisa cifam setette asi ruwuyo.

¹⁹ Hirwuy a sa gukum gwat haɗa teˀe, kisa zumam, hã ki mbam, yo kisa cifam setette asi ruwuyo ma.

²⁰ Bista, kisa cufuɗam vu ar wala kumo: ‹Ani ndr'anta sa zligam gwat mata, yo ndr'anta sa gam sifi ngi gwat mata tuwa na, i sa zumam mi angi vi mitarnaˀ naŋ vuna ska kwani?›

²¹ Sinaka sin le, ya Bumbulvuŋ, angi vi mimerkeɗ naŋ na, i sa ɗuwulukum mi haɗi teˀe, yo i sa pula jiviɗ da hirwuyo, ɓa a gi gwata hã ngi vi makir.

²² Angi vi midangafaɗ naŋ na, kisa zligaka gwatay a muŋ, amma kisa zumam di i gwat mivi na si, hã a ndila sifi ngi vi mungoltir naŋ kwana, ki roko zumam di i gwat mivi aruŋ na si.

Jiviɗ ngi mbiɗa hirnga ngi guva

²³ Mbur anta sa hiɗika guva naŋ avra ngi wãˀ ta, asi hirwuy inga ya Bumbulvuŋ. Kumo, kum angi hirwuy ɗu kaɓa moholoyoy, kaɓa mulakay.

²⁴ Vurˀe, angi hirwuy ya masa vulukum di gar na, kisa ɗuvam ɓi ngi mbiɗa hirnga ngi guva.

²⁵ Da sukum kumo, naŋ ti duvus a hirnga naŋ, a tiri le ava ɓa sey a hiɗik guva naŋ cah avra na, mbur misi ti jiviɗ ngi mbiɗa hirnga ngi guva, mbiɗeˀvra, muy naŋ migweˀ ngi vaˀa, a sawa, a mbiɗa hirnga ngi guva, sukum naŋ mihiɗika avra tuwa.

²⁶ Da mburo naŋ anta ti mbur misi ti jiviɗ ngi mbiɗa hirnga ngi guva vuna ta, amma naŋ vuna, zliv a lum wer ngi mbiɗa hirnga ngi guva vuna gu na,

²⁷ a slufa vihey mucohomo, zle avu hiɗika guva vuna, a mi ti is ngi dala mindir na da mbur mihiɗika guva zleˀe tuwa a muŋ, dar naŋ a zuɓa guva naŋ a muŋ gwaɗ naŋ.

²⁸ Amma, da naŋ vuna a lum wer ngi maŋ di gu ta na, naɓa guva a ndir da mbur mihiɗik naŋ na kwaɗay, hã a ndila vi ngi zluzluɓo. Akẽh so na, buy ngi guva a sa zuɓa guva naŋ a muŋ.

²⁹ Da mbur a hiɗika haya le avra, i hay misi angi walahay muguno hirnga naŋ le ti mohol gun gun na, jiviɗ ngi mbiɗa hirnga ngi hay nah i misla le, a kiɗ mi angi vi mihiɗikaka anga vuna si.

³⁰ Da a mbiɗaka hirnga ngi haya angi vi mipal nah vuna ta na, naɓa hay nah misi angi walahay muguno le ti mohol gun gun tuwa, a sa ndir wãˀ da mbur mihiɗik naŋ na ati dideˀ naŋhay. Ko angi vi ngi zluzluɓ na kwana, t'anta sa tiɓaka avu mihiɗik naŋ na mata.

³¹ Walahay muguno ti moholoy ta na, hay misi angi taŋ gar na, i misi purla ati guva ngisi ruwuyo, jiviɗ ngi mbiɗi hirnga t'ada, yo angi vi ngi zluzluɓo, hay a sa ndir da buy naŋ mudumbuŋ na a muŋ.

³² Amma ngi mizli leviheye, hay taŋhay misi angi walahay levihey gar na, t'ada ti jiviɗ ndrehhe ngi mbiɗa hirnga taŋhaya ɓula.

³³ Hay misi angi walahay levi gar, ko da mihiɗik naŋ i mbur levi vuna tehhe kwana, angi vi ngi zluzluɓo, hay a sa mi ng'asi haŋ ngi buy naŋ na a muŋ na si. Asi mike na, hay tayna misi angi walahay levihey na, i li nga taŋ angi hirwuy Israyele.

³⁴ Amma guva misi a duba gala taŋhay gar na, a hiɗikaka taŋ avra gu ta ɓula, asi tayna i guva ngi Levihey hã ngi sete.

Vula duvus da mbur misi murga

³⁵ Da kaɓa sukum kumo, ki puraka le, naŋ da ti duvus a hirnga naŋ, a vus le, ko a wurka gu mata na, sey ki jinakaŋ, ɓa a ngir a ciki kum aya. Ko da i mbur mulak malla mbur micifi le asi ruwuy kum gar na, gakaŋ di kanah ya.

³⁶ Duvus ngi yam, ko ti jiviɗ wanaka gar na, ki vulakaŋ ta. Kum mazluwunam ti ya Buymisemuŋ kumo na, naŋ kahana, yo ɓa sukum kum a ngir a ciki kum aya.

³⁷ Da ki vulakaŋ dala le ngi duvus na, anja ki cufuɗam yam anga ta, yo ki vulakaŋ gwat ngi zumo ngi hataka ta.

³⁸ I ya Bumbulvuŋ, Buymisemuŋ kumo mubo ti kum tir hirwuy Ezipte, ɓa yi vulukum hirwuy Kanaˀan da kum, yo ɓa yi tiri Buymisemuŋ kum.

Jiviɗ ngi mbiɗa hirnga ngi mburu

³⁹ Da sukum kumo naŋ da ti duvus kum ava, yo a hiɗika vu naŋ le avu kum vuna ɓa a cifi gawla kum na, anja ki ɗuvakaŋ slra kaɓa i beke ta.

⁴⁰ Amma, gam di kaɓa i mbur migi slra ngi dala ngi hay kum malla mbur mulak misi a hay kum. A sa gi i gawla kum, hã a ndila vi ngi zluzluɓo.

⁴¹ Akẽh na, a sa lumaka hirnga taŋ ati ziri naŋhaya. A sa mi nga wuzla muy naŋhay, yo ara luuma guva ngi dideˀ naŋhaya.

⁴² Asi mike na, mizli, ya mubo ti taŋ ti ruwuy Ezipte na, i gawla ɗuwoy. Vurˀe, anta hiɗikaka taŋ avra kaɓa mahiɗikam bekehey avra na ta.

⁴³ Ki gakaŋ moˀore ta. Kum masa bigaka, ki ra zluwunam ti ya Buymisemuŋ kumo na, ti jiviɗ kahana.

⁴⁴ Naŋ kine, da ki wuɗam le ɓa ki hiɗikam beke mizile malla mongoso na, hiɗikam a wuzla sukwi mugun hirnga kum na.

⁴⁵ Ziri ngi mulakay mipam le a wuzla kum, malla muy taŋhay miyaka taŋ cak angi hirwuy kum gar na, ki hiɗikam a wuzla taŋ zuy ma. Taŋ a sa ndiram i gwat kumoy.

⁴⁶ Ki sa pulaka taŋ da ziri kumoy ar taŋ masa zumaka hay kumoyo, ɓa a dirba kumo na, taŋ a sa ndiram i mi nga taŋhay. Taŋ na, kisa gam ti taŋ beke hã ngi sete. Amma, a wuzla kum Israyel, sukumuŋhoyo, mbur anta sa cifi i buy ar sukum naŋ ta.

⁴⁷ Mbur moholoy malla mulak misi asi ruwuy kumo, da kaɓa naŋ da ti zlili, sukum kum a hil duvus le ava, yo a hiɗika vu naŋ le avu mbur moholoy misi i masay naŋ tuwa, malla avu muy naŋ na,

⁴⁸ sukum kum nah, ko a dirba hiɗika hirnga naŋ na tekeɗe kwana, naŋ ti jiviɗ ɓa a mbiɗa hirnga naŋ, malla ko mbur purla a wuzla sukum naŋhay kwana, a mbuɗo hirnga naŋ gu,

⁴⁹ jamba naŋ malla sukum naŋ ngi jamba kwana, a mbiɗa hirnga naŋ gu, malla ta na, mbur a wuzla muy naŋhay mikasl na, a mbiɗa hirnga naŋ gu ma, da ko naŋ vuna, naŋ da ti gwat na, a mbiɗa hirnga naŋ tehhe gu ma.

⁵⁰ Ar ɓi hana so na, ngiɓam ˀay ati mbur mihiɗik naŋ vuna. A slufo vi, zle avu naŋ mihiɗika vu naŋ na, hã avu vi ngi zluzluɓo, ɓa cikili ngi hiɗik naŋ na, a ram kaslsla ati taˀ ngi vi, yo slra naŋ miga na, a waka wuruk naŋ weˀe avu mawurkam mbur migi slra le hiipasa.

⁵¹ Da vi nga ndila vi ngi zluzluɓo, naŋ haɗa aruŋ na, naɓa a mi ti duvus naŋ mihila na weˀe avu vi mindire, a mbiɗa hirnga naŋ ti naŋ.

⁵² Da kaɓa, vi nga ndila vi ngi zluzluɓo, a ndir neˀkini na, a slufa vi mindire, a mi ti duvus naŋ mihila na weˀe avu vi mindire, a mbiɗa hirnga naŋ ti naŋ ya.

⁵³ Da mbur mimbiɗo hirnga naŋ tuwa, a ndir le a hay mbur mihiɗik naŋ na, naŋ kaɓa mbur migi slra ngi dala muduba. Ki sa pulaka buy naŋ a waŋ ɓula, amma anja a guzuvuraŋ ta.

⁵⁴ Da sukum kum a mbiɗa hirnga naŋ ti jiviɗ miwal wal hanayna ta kwana, angi vi ngi zluzluɓ na, naŋ ati ziri naŋhaya, a sa lumam hirnga taŋ.

I ya Bumbulvuŋ, Buymisemuŋ kum

⁵⁵ «Haˀaw, Israyeley i gawla ɗuwoy! Taŋ i gawla ɗuwoy na, asi i ya mubo ti taŋ ti ngi ruwuy Ezipte! I ya Bumbulvuŋ, Buymisemuŋ kum.