LEVIHEY 24 - Bible en langue guiziga

Li ɗuva lampehey ar hay ngi Buymisemuŋ

¹ Bumbulvuŋ a ɓa Moyise:

² «Ɓa Israyeleye, ɓa a vulukuw mal ngi lampe i mal ngi tutumbur, mal mimezle naŋ, miɗelele, ɓa lampe, naŋ da ti vu avu taŋ jur jur, ko mbak le anta.

³ Aroŋ a sa ɗuva gwat ngi ɗuva lampehey na taˀ angi guɗuk ngi zlir ti ya Buymisemuŋ, a mbuŋ zana minjar ngi ɗumo hiri ngi akoti ngi jumoˀay na. Lampe, naŋ da tiɓi vu a mbuŋ ɗu, zle ti pastaˀ hã ti mipriki. Hana i ɓimujuwa mambiɗi ta avu kumo ngi caˀa.

⁴ Gwat ngi ɗuva lampe miga ti ɓiri tapasl tapasl pal naŋ na, Aroŋ a sa ɗuva lampehey anga, ɓa a tiɓam vu a mbuŋ ɗu ngi caˀa.»

Peŋ muvula le da Buymisemuŋ

⁵ Ki sa wuɗ hapa, fukaɗ fukaɗ, kutom kutom kuruˀ nga cuw, waɗ tos tos taŋ ar vu. Hapa mufukaɗ fukaɗ waɗ tos tos ar vu gar na, purla a zuɓ hapa kilo merkeɗe.

⁶ Ki sa pa taŋ jirngasl jirngasl, taˀ taˀ cuw a mbuŋ ɗu, ya Bumbulvuŋ, ar tabul miga ti ɓiri tapasl tapasl pal naŋ na. Jirngisl gar na, hapa mutuso merkeɗ merkeɗe.

⁷ Angi jirngisl gar na, kisa pi urdi ngi zlum ti zlum mipal naŋ. A sa zlumaka ar deɗe ngi ɗaf ɓa ngi wuluk keŋ, i gwat ngi zum mizlam zlam wãˀ da ya Bumbulvuŋ.

⁸ Hin ngi sabat gar na, Israyeley a sa pam hapa mutuso tayna sek le a mbuŋ ɗu, hã ngi caˀa kine. Hana i jumoˀay avu Israyeleye ndrehhe vur hã ti vunaka gar.

⁹ Hapa mutuso tayna, a sa ndiram da Aroŋ ati ziri naŋhay, a sa zumaka angi li mipal, asi avu taŋ i gwat mipal wãˀ muzuɓa avu gwat ngi zum mizlam zlam wãˀ da ya Bumbulvuŋ na, i mi nga taŋ, hã ngi sete.

Kuti ti bonoy vur mbur miza Buymisemuŋ le

¹⁰ Ngi pas mekelem ada na, mangal ngi ngwas Israyel, amma cine i mbur Ezipte, mangal tuwa, a bo ti haya, aru nga hur walahay guɗuko, a slilaham didak ati mbur Israyel mekelem ada.

¹¹ Mangal ngi ngwas Israyel tuwa, a za Bumbulvuŋ, a nisaŋ, a ram di ng'avu Moyis. Mumuŋ ngi mangal nah na, a zilaka Selomit, i zuŋ ngi Dibri, angi sukwi ngi Daŋ.

¹² A wam vu ti mangal tuwa weˀ kuy kuy, ngi kutuko Bumbulvuŋ masa sla ɓi nah ti haŋ naŋ.

¹³ Akẽh na, Bumbulvuŋ a ɓa Moyise:

¹⁴ «Bo ti mbur nah tir walahay guɗuko. Mizli gar micinaka, naŋ miziy na, a pakaŋ haŋ a hirnga, ɓa Israyeley gar a kuypakaŋ ti ɗugur.

¹⁵ Yo ɓa kisa ɓa Israyeleye na: Da mbur miza Buymisemuŋ naŋ le gar na, a jijira zayɓi ngi mungra naŋ nga hirnga naŋ.

¹⁶ Naŋ kine, ko wa miza Bumbulvuŋ le gar na, a kiɗaka vagay. I Israyeley taˀ gar makuypaka buy nah ti ɗuguro. Ko da i moholoy malla mbur Israyel gar na, a kiɗaka vagay, asi naŋ miza Bumbulvuŋ.

¹⁷ Da mbur a kiɗ mbur le vagay, ko da i wa gar na, a kiɗaka vagay.

¹⁸ Da mbur a kiɗ ginew ngi cil naŋ vagay na, sey a wurka ginew nah ti ginew mideŋ titiri.

¹⁹ Da mbur a ga ble le da mbur ngisi ruwuy purla ati naŋ na, sey a gakaŋ ble naŋ migaŋ di vuna ya.

²⁰ Ngil, a wurkaka ti ngil aya, hiri ti hiri aya, sliŋ ti sliŋ aya, a gakaŋ ble misi purla kaɓa naŋ miga da mbur mekelem vuna ya.

²¹ «Mbur mikiɗ ginew ngi mbur le na, sey a wurkaŋ, yo mbur mikiɗ mbur le vagay na, a kiɗakaŋ naŋ vuna vagay aya.

²² Ki sa lumam di i ɓimujuwa misi purla, vur mulakay, yo vur Israyeleye, asi yi Bumbulvuŋ, Buymisemuŋ kum.»

²³ Naŋ kahana, Moyis miɓa ɓimuɗuva misenna da Israyeleye. Akẽh na, mbur miza Bumbulvuŋ tuwa na, a boko di tir walahaya, a kuypakaŋ so. Ɓi Bumbulvuŋ muɗuva da Moyis gar na, Israyeley a gaka le.