LEVIHEY 19 - Bible en langue guiziga

Jiviɗ ngi huruk huruk a mbuŋ Buymisemuŋ

¹ Bumbulvuŋ a ɓa Moyise na:

² «Tila mi da Israyeleye gar, ɓa t'ani: Ndiram pal, asi ya, Bumbulvuŋ Buymisemuŋ kumo, ya pal.

³ Ko wa gar ar wala kumo, sey a ɗuva hirnga da cine ati mumuŋ, yo hin ngi sabat ɗuwoyo, sey a ja taŋ a hirnga. I ya Bumbulvuŋ, Buymisemuŋ kum.

⁴ Ki mbiɗam hiri ng'avu kulihey ta, yo ki ɗiyam foto ngi kulihey ta. I ya Bumbulvuŋ, Buymisemuŋ kum.

⁵ Da ki ra kiɗam gwat ngi giy mikuli ngi ngiɓiˀay da ya Bumbulvuŋ na, gaka ti jiviɗ naŋ kaslsla, ɓa i hĩyãŋ.

⁶ Useˀ ngi mikuli nah na, a zumaka kalla tapasa waɗ li naŋ muwun le. Amma, da a ndir le ngi duwul naŋ ma na, sey a wuraka avra.

⁷ Ko da mbur a zuma le angi hin mimakir naŋ na tekeɗe kwana, y'anta sa hĩyãŋ ta, asi a zum di i useˀ mumburzum.

⁸ Mbur muzuma le na, a hiryi di i gwat muvula le da ya Bumbulvuŋ, naɓa a jijir ti zayɓi ngi malambaˀ nah, yo a sa gwahaka mbur nah ti wuzla muy naŋhay avra.

⁹ Da kum mira gaka sifi ngi gwataya na, ki gaka guva prek prek hã a mivay naŋ ta, yo ki moko ngi gi holok ar guva kumoyo ta.

¹⁰ Ar guva ngi gudubun kumo, ki gaka holoko ta, yo yi naŋ midiɗ le a ruwuy na kwana, ki guɗumaka ta, amma, ki pulaka da misi murgahay ati moholoyoy. I ya Bumbulvuŋ, Buymisemuŋ kum.

¹¹ Ki hulom ta, ki gam slir ta, mizli ngisi hirwuy purla ati kum na, ki gaka taŋ gilaw ta.

¹² Ki hudumom lambaˀ lambaˀ ti slimiɗ ɗu ta, asi da ki gaka le kanah na, ki hiryam di i slimiɗ nga ya Buymisemuŋ kum. I ya Bumbulvuŋ kum.

¹³ Ki zumaka mbur cil kumo ta, yo ki hulokoŋ gwat naŋ ta. Mbur mugukum slra le na, anja migir ngi slra naŋ a ndir avu kum, hã li a wun di ta.

¹⁴ Mbur midigizla na, ki zakaŋ ta, yo mbur dangar kwana, ki kakaŋ gwat a mbuŋ naŋ ɓa a diɗ ta. Kum masa bigaka, ki ra zluwunam ti ya Buymisemuŋ kumo na, ti gi kahana. I ya Bumbulvuŋ.

¹⁵ Gaka kiita kumoyo ti jiviɗ naŋ kasl kasl: ki jinaka mbur hĩhĩy vur naŋ i hĩhĩy si ta, yo mbur madiɗa kwana, ki ram ti mi aseˀeŋ vur naŋ i mbur madiɗa si ta. Amma, mizli ngisi ruwuy purla ati kum na, gaka taŋ kiita ti jiviɗ naŋ kasl kasl.

¹⁶ Muy kum na, ki kupakaŋ ɓi ta, yo mbur cil kumo, ki gilakaŋ ɓi, ɓa hã a kiɗakaŋ vagay ta. I ya Bumbulvuŋ.

¹⁷ Sukum kumo, ki gam di mesene a mevel kumo ta. Amma, mbur ngisi ruwuy purla ati kum na, bucakaŋ, ki wulkam cingiŋŋe ta, vur mungra naŋ masa mbiɗi nga hirnga kum.

¹⁸ Ki pulam cuwal ta, yo mbur ngisi ruwuy purla ati kum na, ki jakaŋ a kwacay ta. Sey mbur gar na, a wuɗ mbur cil naŋ kaɓa naŋ mawuɗ hirnga naŋ vuna. I ya Bumbulvuŋ.

¹⁹ Ɓimujuwa ɗuwoy ani na, jaka taŋ a hirnga: sukwi ngi ginew kumoy wal wal cuw na, ki jumoko taŋ ɓa a cifam ta. Ki zligam hilfa gwat ti sukwi wal wal cuw ar guva kumo ta. Zana mijaka le ti sukwi ngi gugumay wal wal cuw na, ki kaka avu vu ta.

²⁰ Ngwas beke, i mangasl ngi mbur mekelem, amma a mbiɗaka hirnga naŋ ta, yo i mupula le ta ma na, da mbur mihin di le na, sey mbur nah a wuruk. Na so na, a kiɗaka taŋ vagay ta ɓula, asi ngwas a mbiɗaka hirnga naŋ ta.

²¹ Sey mbur mizile aru ti zlengerek nga mizlingre guɗuk ngi zlir ti ya Buymisemuŋ, ɓa a gi di mikuli ngi ɗiya ɓi a mbuŋ ɗu.

²² Zlengerek ngi ɗiya ɓi tuwa, masay a gi di mezegwel ngi vula jiviɗ ngi pula mungra ngi mbur tuwa, a mbuŋ ya Bumbulvuŋ, ɓa mungra naŋ miga na, a puy avra.

²³ Ti kum misa cam le angi hirwuy Kanaˀan, yo da kum mihirvam widis ngi zum le gar na, avu kumo, yi taŋhaya, i ngi zumoy ta, hã vi makir, ki zumaka taŋ ta.

²⁴ Angi vi mumufaɗ naŋ na, a sa vulaka yi taŋhaya gar da ya Bumbulvuŋ, angi muguzlum ngi hunumavu.

²⁵ Angi vi muzlum naŋ so na, kisa zumaka yi taŋhaya. Da ki ra gaka kanah na, naɓa gwat ngi sifi kumoy a sikam nga mbuŋ nga mbuŋ. I ya Bumbulvuŋ, Buymisemuŋ kum.

²⁶ Li kum mislaka ˀay ngi ginew le ara na, ki zumaka useˀ naŋ tehhe ar li nah ta. Ki gam ketele ta, yo ki hizigam njol ta.

²⁷ Ki hijaka ngwic hirnga kumo ti ti teˀe ta, yo ki hijaka mivay ngi mazlamay kumo ta.

²⁸ Ciravu ngi bigi, i mbur magi vagay na, ki gaka kanah ta, yo ki gam weɗe ti cir avu vu kumo ta. I ya Bumbulvuŋ.

²⁹ Anja ki hizigiɗaka zuŋ mongoso kumo ng'ar sulome ta. Da kine na, naɓa hirwuy gar a sa gi sulome, gwat ngi mesem a sa gi zlar li.

³⁰ Hin ngi sabat ɗuwoyo, jaka taŋ a hirnga, ɗuvaka hirnga da hay ɗu. I ya Bumbulvuŋ.

³¹ Ki puram daˀas, ko ti jiviɗ wanaka ta, asi a ci ti kum ar dili. I ya Bumbulvuŋ, Buymisemuŋ kum.

³² Mbur misi hol tullo na, skikiɗam di, mbur midigila na, ɗuvakaŋ hirnga. Ki sa zluwunam ti ya Buymisemuŋ kumo kanah ya. I ya Bumbulvuŋ.

³³ Da moholoy muso le, a cifi le asi ruwuy kumo na, anja ki zumakaŋ gwat naŋhaya ta.

³⁴ Mbur moholoy nah na, anja ki gam di kaɓa i zuŋ ngi hay jaka, kaɓa i mbur ngi wuzla kum, yo sey ki wuɗakaŋ kaɓa ka mawuɗam vu kum vuna. Asi kum vuna kwana, ki cifam moholoyoy le zleˀe angi hirwuy Ezipte ya. I ya Bumbulvuŋ, Buymisemuŋ kum.

³⁵ Metir ngi wi gwatay, ɓiri muloˀ ngi pura dudok ngi gwatay waɗ gwat ngi wi gwat micilerey na, gam taŋ slra jeŋ jeŋ.

³⁶ Gam slra ti kilo mijeŋŋe, ɓiri muloˀ mijeŋŋe ngi pura dudok ngi gwatay, agwada waɗ litir mijeŋŋe. I ya Bumbulvuŋ, Buymisemuŋ kum, mubo ti kum ti ngi hirwuy Ezipte.

³⁷ «Ɓimujuwa ɗuwoy ati sirik ɗuwoy gar na, jaka taŋ a hirnga, yo gam taŋ slra. I ya Bumbulvuŋ.»