LEVIHEY 11 - Bible en langue guiziga

GWAT MANJA DILI ATI GWAT MISI DILI Gwat misãmi ngi zum ati ngi zum ta

¹ Bumbulvuŋ a ɓa ti Moyis ati Aroŋ na:

² «Ɓaka Israyeleye: A wuzla gwat misãmi ngi ruwuyoy gar na, misi ki zumaka taŋ zuyo, t'ani hĩ:

³ Misi zlenek wurkek cuw, yo maˀurom maˀurom gar na, ki zumaka tayna zuy.

⁴ Naŋ kine, gwat misãmihey maˀurom, yo misi zlenek wurkek cuw, malla misi zlenek wurkek ɓula, amma t'anta ˀurom ta na, ngi zumoy ta a wuzla t'anihĩ: zlogomo i ngi zum ta, asi a ˀur ɓula, amma zleneke wurkek cuw ta. I gwat mitika le ngi zumo.

⁵ Kucum, a ˀur ɓula, amma zleneke wurkek cuw ta. I gwat mitika le ngi zumo.

⁶ Mandaf, a ˀur ɓula, amma zleneke wurkek cuw ta. I gwat mitika le avu kumo.

⁷ Fedeme, zleneke wurkek cuw ɓula, amma naŋ anta ˀur ta. I gwat mitika le ngi zumo.

⁸ Ko ki zumaka useˀ taŋhaya ta, ko maara taŋ kwana, ki jaka haŋ avu taŋ ta. I gwat mitikahay le ngi zumo.

⁹ A wuzla gwat misãmi ngir yamay gar na, misi ki zumaka zuyo, t'ani hĩ: gwat misãmi ngir mubuliy malla ngi mizaw, misi saray njor njor ava, yo dubaˀ tupãˀ tupãˀ ava gar na, ki zumaka zuy.

¹⁰ Amma a wuzla taŋ, gwat misãmi memeɗehey ati gwat misi titiri ngir mubuliy ati ngi mizaway gar, misi gwat njor njor malla dubaˀ anta avu taŋ tupãˀ tupãˀ ta gar na, i mitikahaylengi zumo,

¹¹ yo a sa ndiram i mitikahay le avu kumo. Ko ki zumaka useˀ taŋ ta, yo ko ki gumbaˀaka maara taŋ ta.

¹² Gwat misãmi ngir yam, misi gwat anta njor njor ava ta, yo dubaˀ anta tupãˀ tupãˀ avu taŋ ta gar na, i mitikahay le ngi zumo.

¹³ A wuzla ɗiyuwoyo, misi ki pulaka, ki zumaka taŋ ta, asi i mitikahay le ngi zumo na, t'anihĩ: kurom, moloturzo, kurom ngi mi yam,

¹⁴ makalala, sukwi ngi kilkandaŋhay,

¹⁵ sukwi ngi magagakay,

¹⁶ maduli, kurek, cecegwrek, sukwi ngi zlamay,

¹⁷ biizim, yamedewle, kusuk tumburum,

¹⁸ pihu, sutete, mogodok,

¹⁹ membese mbese, sukwi ngi ngirkakahay, jorojoro waɗ kwekwenje.

²⁰ Gwat misi zlara, misãmihey gar na, i mitikahay le.

²¹ Na so na, gwat misi zlara, misãmihey, yo majiɗam car car gar na,

²² misi ki humbuɗaka taŋ zuy a wuzla taŋ na, anihĩ: sukwi ngi yukoy, ngi jarayay waɗ ngi mungurzlekey.

²³ Amma gwat misi zlara waɗ sar mufaɗ si gar na, i mitikahay le ngi zumo.

Ji haŋ avu gwat maso ti dili da mbur

²⁴ Gwat misãmi tayna gar, a sukum ti dili, waɗ ma na, ko wa gar mija haŋ le avu maara naŋ na, naɓa naŋ ti dili, hã pastaˀa.

²⁵ Da mbur muzuɓa maara taŋ le na, sey a buna zana naŋhaya ceɗ ceɗ le, yo naŋ ti dili hã pastaˀa.

²⁶ Gwat misãmihey, misi zlenek wurkek wurkek ta, yo maˀurom ta gar na, i gwat misi dilihey avu kumo, mbur mija haŋ le avu taŋ na, naŋ ti dili.

²⁷ Gwat misãmi misi sar mufaɗ mifaɗay maram ti mododok saray gar na, i gwat misi dilihey avu kumo, mbur mija haŋ le avu maara taŋhaya gar na, naŋ ti dili, hã pastaˀa.

²⁸ Yo mbur muzuɓa maara taŋ le ng'avra na, sey a buna zana naŋhaya ceɗ ceɗ le, yo naŋ ti dili, hã pastaˀa, asi i gwat mitikahay le ngi zumo.

²⁹ Gwat misãmi mingweɗeŋ ngweɗeŋ ngi ruwuyoy, misi dilihey avu kum ani: guɗer, kotokom, sukwi ngi matakwal madiɗahay,

³⁰ mitiɓirslim, miɓilim ɓilim, ɗuwel, mombroŋ waɗ mozongozongo,

³¹ A wuzla gwat tayna cek, kum masa puram i mitikahay le ngi zumo na, i taŋ. Maara taŋhaya, da mbur mija haŋ le avu taŋ na, naŋ ti dili, hã pastaˀa.

³² Gwat tayna, da maara naŋ a diɗ le ar gwat wanaka gar na, naɓa gwat nah, a tiri le, naŋ ti dili, mbiɗeˀvra, ko gwat wanaka gar magam di slra, da i gwat ngi dum, da i zana, garak malla gabal, na zle, ko gwat ngi slra wanaka gar si. Sey a bunaka gwat nah ceɗ ceɗ le, amma a ndir naŋ ti dili, hã pastaˀa, a dirba nah, naŋ manja dili.

³³ Da gwat nah, a diɗ ng'ar magayak na, naɓa gwat ngir magayak nah gar a tiri le naŋ ti dili, yo sey a wahaka magayak nah avra wãˀ.

³⁴ Da mbur a pa yam ngir magayak nah le ng'ar gwat ngi zum wanaka gar na, naɓa gwat nah a tiri le naŋ ti dili. Naŋ kanah ma, gwat ngi si masaka zuy, misi zleˀe ar magayak ko wanaka gar na, a tiri le naŋ ti dili.

³⁵ Gwat purla a wuzla gwat misãmi tayna, da a diɗ le ng'ar gwat na, naɓa gwat nah a tiri le, naŋ ti dili. Da ko i li di ɗaf malla liwis kwana, sey ki wahaka taŋ avra, asi taŋ ti dili, yo sey a ndiram, i gwat misi dilihey avu kumo.

³⁶ Amma, da a diɗ ar miviɗiviɗi ngi yam, malla ar vigiɗ ngi yam na, yama taˀ naŋ na, naŋ manja dili, amma mbur mija haŋ le avu maara ngi gwat nah na, naɓa a tiri le naŋ ti dili ɓula.

³⁷ Gwat tayna, da maara taŋ purla a diɗ le ar hilfa gwat muwam di vu ngi zligi na, hilfa gwata, a ndir manja dili.

³⁸ Amma hilfa gwata, da kaɓa a pam yam le zleˀe ara si, yo maara ngi gwat tayna tuwa, a diɗ le ng'araˀa na, naɓa hilfa gwat nah na, naŋ ti dili.

³⁹ Da ginew ngi zum kum, a muc le, mbur mija haŋ le avu maara nah na, a tiri le, naŋ ti dili, hã pastaˀa.

⁴⁰ Mbur muzuma useˀ ngi ginew nah le na, sey a buna zana naŋhaya ceɗ ceɗ le, yo a tiri le naŋ ti dili hã pastaˀa. Mbur muzuɓa maara naŋ le ng'avra na, sey a buna zana naŋhaya ceɗ ceɗ le, yo a tiri le, naŋ ti dili, hã pastaˀa.

⁴¹ «Gwatay majam suɓulak ngisi ruwuy gar na, i mitikahay le ngi zumo.

⁴² Gwat tayna majam suɓulak a ruwuy gar, makurmuɗom ti kwacay, maram ti sar taŋhay mufaɗ malla ti saray mbeˀ mbeˀ gar na, ki zumaka taŋ ta, asi i mitikahay le ngi zumo.

⁴³ Gwatay majam suɓulak asi ruwuyo, ki dukoko taŋ ta, vur taŋ macam ti kum ar dili, yo ki pulaka taŋ a dukukum ta ndiɗaˀ, vur taŋ macam ti kum ar dili.

⁴⁴ Asi Bumbulvuŋ, Buymisemuŋ kumo i ya. Gam gwat kaɓa mizli muvuku vu taŋ, asi ya, ya pal. Gwatay mikirnini ngisi ruwuy hana na, ki jaka haŋ avu taŋ ta, vur kum macam ar dili ti haŋ kumo.

⁴⁵ Asi mubo ti kum ti ruwuy Ezipte i ya Bumbulvuŋ, ɓa yi tiri Buymisemuŋ kum. Sey so na, ndiram kum pal, asi ya, ya pal.»

⁴⁶ Ginewey, ɗiyuwoy ati gwat misi titirihey mingweɗeŋ ngweɗeŋ ngisi yamay, yo majam suɓulak asi ruwuy gar na, gwat mudubunahay vur ɓi taŋ i hana.

⁴⁷ Gwat mudubunahay na, ɓa ngi sli wala ngi gwat misi dili ati gwat manja dili, yo ngi sli wala ngi gwat misãmi ngi zumoy ati ngi zumoy ta.