KOLOSOY 2 - Bible en langue guiziga

¹ Naŋ kine, i wuɗ ɓa ki sinaka, i ro ar li cika vu mukuy ta wãˀ asi kumo, yo asi mizli ngi Lawdisehey waɗ asi mizli mekelemey haɗa mupuraka deŋ ɗu vuna ɗaˀ ta.

² Ya mawuɗ na, ɓa a ndiram ti tumo vu a mevel taŋ, ɓa a ndiram jom purla ti wuɗavu, a ndilaka luuma lesl mihaɗa ngi Buymisemuŋ, waɗ ɓa a sinaka gwat mufuna wuluk ngi mbur ngi Buymisemuŋ zleˀe na, mbiɗeˀvra: Kristu.

³ Sinmijileŋ ati sin maso ti vaˀa gar na, taŋ ɗum ɗum angi Kristu.

⁴ Ya maɓa kahana na, ɓa anja mbur a gukum gilaw ti mingiɓi mideɗek koloŋ koloŋ ta.

⁵ Ko da y'anta deŋ ti vu ɗu a wuzla kumo ta tekeɗe kwana, amma ar wuluko, y'ada a wuzla kumo gisiŋ. Da ya mira purukum, ki ra gaka slra kumo kasl kasl, yo kum ada zlak gidaŋ gidaŋ ar tiɓi Kristu na, i mumul.

Ndr'ada jom ati Kristu

⁶ Naŋ kanah, ani, ki tiɓaka Yesu Kristu le, i Buy kum. Na, zuɓaka jiviɗe jom ati naŋ so.

⁷ Diram dimbasl, yo cam hǝɗ hǝɗ angi naŋ. Ndiram gidaŋ gidaŋ ar tiɓi kumo, kaɓa taŋ mudubunukum di, yo gaka sise fineˀ gidaŋ da Buymisemuŋ.

⁸ Jam lesl, anja mbur a jukum ti mazaɓ ngi dubun ngi mizli ta. Gi gilaw ngatara hana, a so tivi sirik ngi mizli, tivi gwat misi gidaŋ ngir duniyahay, anta tivi Kristu ta.

⁹ Asi Buymisemuŋ wãˀa, a tiri dumvu, naŋ da jom ati Kristu.

¹⁰ Yo kumo, ki jumom le wãˀ ati Kristu. Gi madiɗa ati zuma buyoy gar na, i naŋ miwa taŋ.

¹¹ Ar kum mujom ati Kristu na, a cukum le a mizaw. I ci mizaw ngi mbur titra ta, amma i ci mizaw Kristu mica, ɓa ngi cuko vu ndra magi mungra na avra.

¹² Ti taŋ mucukum ar yam na, kite a dikukum le ati Kristu. Yo ki slikiɗam le tir muco bumoˀ ma, asi gidaŋ ngi Buymisemuŋ mislikiɗa Yesu ti wuzla mumucahay ti naŋ na, ki tiɓaka le.

¹³ Yo kumo, i mumucahay zleˀe asi kum magam mungra waɗ kum micam mizaw ta na. Amma Buymisemuŋ a vulukum siifa le jom ati Kristu. A puya mungra ndraˀahaya le gar avra.

¹⁴ Duvus misi a hirnga ndra, mabiga i zluɓaka le, ɓimujuwa mamo di nga hirnga ndra na, Buymisemuŋ a susuymo le avra, a dira le avu dum mizliraŋ.

¹⁵ Buymisemuŋ a cuko gidaŋ ati buy ngi gwat migidaŋhay mazumam buy ar wala ngi muŋ ati hirwuyo le, a pa taŋ mesem a mbuŋ mizli gar. A pa taŋ le sek a mbuŋ naŋ, aru ti taŋ nga wuzla mizli, Mangal naŋ mitika taŋ ˀay le.

¹⁶ Zle wurenna, anja mbur a gukum kiita asi ɓi ngi gwat ngi zum ati gwat ngisi ta, malla ko asi ɓi ngi muguzlum, malla kiya muslo le, malla asi ɓi ngi sabata ta.

¹⁷ Tayna gar na, i susuɗuk ngi gwat masa sawa na tewle si, amma miwãˀ naŋ na, i Kristu.

¹⁸ Anja ki pulaka mbur a pukum hirnga ti ɓi malambaˀ ta. Mizli mekelemey ada, a hĩyãm gi gwat mabiga kaɓa ara sipaka ɓi ngi Buymisemuŋ dar dar. A hĩyãm huruk huruk a mbuŋ modro ngi Bumbulvuŋhoy. A ɓam ɓi ngi gwat taŋ mupuraka ti kleŋ, yo lesl ngi hirnga taŋ a vula taŋ huhumvu.

¹⁹ Kristu i hirnga ngi dumvu, mizli tayna, t'anta joɓ joɓ ava ta. Dumvu gar, malum gwat ngi zum, yo naŋ mujoɓ joɓ ar li purla ti hirzlik naŋhay, waɗ ti mizlir naŋhay, yo naŋ magil kaɓa Buymisemuŋ mawuɗ na, mbele Kristu.

Muc waɗ siifa ati Kristu

²⁰ Ki micam le jom ati Kristu, yo Buymisemuŋ a guhukum le gwah tivi gwat ngi duniyahaya. Na, ki hinam hirnga avu gwat ngi duniyahaya, kaɓa siifa kum a cir tisi duniya ɓula si mbri mbri maka?

²¹ Kaɓa ani: «Ki si gwat hana ta», «ki titila gwat hana ta», «ki wusa gwat hana ta.»

²² Tayna gar na, i gwatay, da a gam taŋ slra le na, a susuymom le si. I ɓi ngi mizli muɗuvaka, yo madubunaka da mizli tewle.

²³ Ɓi mizli maɗuvaka tayna, taŋ kaɓa i ɓi ngi lesl ɓula. Kaɓa ni: sipi jiviɗ avu mevel ngi mbur, hina hirnga, gi bonoy haɗi da dumvu. Amma ko gwat mupuɗaw anta ara neˀ ta, i gwat ngi cira hiri da dumvu tewle.