KOLOSOY 1 - Bible en langue guiziga

Ji haŋ

¹ I ya Pol, Buymisemuŋ a wuɗ le ɓa i tiri mislin ngi Yesu Kristu, waɗ sukum ndra Timote,

² matohoko ɗerewol hana da mizli ngi Buymisemuŋhoy misi a Kolos, sukum ndra miteŋteŋhey tisi Yesu Kristu na. Anja Cine ndra Buymisemuŋ a gukum mezle, a vulukum zuy.

Pol maga sise da Buymisemuŋ

³ Ti ndra mira diram dibiɗ ndrehhe vur kumo na, i ra gaka sise da Buymisemuŋ, Cine ngi Buy ndra Yesu Kristu.

⁴ Asi mike na, kum mitiɓaka Yesu Kristu, yo kum mawuɗam mizli ngi Buymisemuŋhoy gar na, i cinaka ɓi nah le,

⁵ asi njaha hiri kumnjah ar gwat muwukum di vu a muŋ na. Najaha hirri kum nah na, a tulukum mi ti ɓi nah le, i Ɓimezle, ɓi mikaslsla ngi Buymisemuŋ,

⁶ mindil hã a hay kum na. Ɓimezle ara yi zinga, yo ara njih nga mbuŋ nga mbuŋ ar duniya keɗeɗe gar. Naŋ kanah ya, a gi le a wuzla kumo, zle ti hin kum misinaka Buymisemuŋ ara gukum mezle ar ɓi mikaslsla naŋ na,

⁷ kaɓa Epafras, ngama ndra, cil ndra, ndra magam slra bumoˀ mudubunukum di na. Epafras ara gi slra ar deɗe ndra, ka mbur miteŋteŋ migi slra ngi Kristu.

⁸ A ɓa ndra ɓi ngi wuɗavu kum, ˀUf Mipal mavulukum di na le.

⁹ Vurˀe, zle ti hin ndra micinaka ɓi kum na, i pulaka diradibiɗ vur kumo ta. I ra cufuɗaka Buymisemuŋ, ɓa ki sinaka gwat naŋ mawuɗo kuy kuy wãˀ, ɓa ˀUf naŋ a vulukum sinmijileŋ gar waɗ lesle,

¹⁰ ɓa kahana na, ki cifam ka Bumbulvuŋ mawuɗ, yo ɓa ki sipam gi gwat maciraŋ hiri wãˀ. Joˀ kisa gam slra mezle ti sukwi wal wal gar, yo kisa sinaka Buymisemuŋ nga mbuŋ nga mbuŋ.

¹¹ I ra cufuɗaka Buymisemuŋ, ɓa ki lumam gidaŋ ar gwat gar ti gidaŋ ngi dudok naŋ, ɓa kanah na, ko bonoy wanaka gar na, ki hurdumom, ki ɓusaka gu.

¹² Gaka sise da Cine ndra ti mumul. Asi i naŋ miga, ɓa ki ndilaka ngi luuma mi ngi kum angi gwat naŋ miwi di vu angi li minjahha da mizli naŋhay na.

¹³ A tuɓo ndra le tir gidaŋ ngi luvuŋ, aru ti ndra ng'ar zumabuy ngi Mangal naŋ, naŋ mawuɗo.

¹⁴ Mucuko ndra, yo mupula mungra ndrahay na, i Mangal naŋ vuna.

Kpak ngi Kristu ati slra naŋ

¹⁵ Kristu i foto ngi Buymisemuŋ mizli mapuraka gu ta na, i modogom ar gwatay Buymisemuŋ miga taŋ gar.

¹⁶ Asi Buymisemuŋ miga gwat ngi muŋhoy ati ngi ruwuyoy gar na, ti seˀeŋ. Gwat mizli mapuraka taŋ gu ati mapuraka taŋ gu ta, zuma buyoy ati gidaŋhay, madiɗa ati gidaŋ ngi wi mizli gar na, Buymisemuŋ a ga taŋ gar ti seˀeŋ, yo vurˀeŋ.

¹⁷ Yo naŋ vuna, naŋ da dumbuŋ angi gwatay gar. Gwatay mijah jah ar li taŋhay gar na, tiseˀeŋ.

¹⁸ Cikil ngi misikristuhoy i dumvu, naŋ i hirnga naŋ. I zli virzi ngi gwat, i modogom mislikiɗ dumbuŋ ti wuzla mumucahay, ɓa a cifi, naŋ i mudumbuŋ a hirnga gwatay gar.

¹⁹ Asi Buymisemuŋ a hĩyã le, ɓa naŋ vuna wãˀ, a ndir jom ati Mangal naŋ.

²⁰ Yo gwatay naŋ miga taŋ gar na, a ɗiya ɓi naŋ ati naŋ Buymisemuŋ tisi Mangal naŋ. Gwat ngi ruwuyoy ati ngi muŋhoy gar na, Buymisemuŋ a cica ɓi ngi vula taŋ zuyo, tisi pumbus ngi Mangal naŋ muɓul ar dum mizliraŋ.

²¹ Yo zleˀe na, kum kileŋ avu Buymisemuŋ, kum i mesene naŋhay wãˀ, asi gwat ngi gi kum malambaˀ na.

²² Amma wurenna, Buymisemuŋ a ɗiya ɓi kumo le ati naŋ tisi dumvu ngi Mangal naŋ mamuco, ɓa ti muc naŋ na, kum ada a mbuŋ naŋ, kum i mizli naŋhay, manja ɓi ngi mbuɗukum hirnga aseˀe, mizli manja zluɓa ɓihey.

²³ Amma so na, kum mitiɓam na, anja ki cicam kuykuy, zlak gidaŋ gidaŋ, anja ki pulaka vu kum, ki kiraham kileŋ avu njaha hiri angi Ɓimezle, kum micinaka na ta. Ɓimezle mitilam di mi da mizli asi gazlavay kurzluˀ gar na, ya Polo, i tiri le yi mbur migi slra nah.

Slra Pol miga ngi jina Cikil ngi misikristuhoy

²⁴ Wurenna, i ra mumul ti bonoy ya masa asi kumo. Asi da dumvu ɗu ara si bonoy na, kite yi kiɗ di mi ngi bonoy ngi Yesu misa vur dumvu naŋ, mbiɗeˀvra: Cikil ngi misikristuhoy na.

²⁵ I tiri le yi migi slra da Cikil ngi misikristuhoy, kaslsla avu slra Buymisemuŋ muvuliy di, ɓa yi ga vur kum na: i kiɗa mi ngi tila mi ti ɓi ngi Buymisemuŋ.

²⁶ I ɓi mufuna wuluk ngi mbur muɗum zleˀe, zle misi nga dana ta, amma wurenna, Buymisemuŋ a njika le da mizli naŋhaya.

²⁷ Buymisemuŋ a wuɗ ɓa mizli naŋhay a sinaka ɓi muɗum nah na, i ɓi madiɗa, yo naŋ ti dudok haɗa a wuzla mizli duniyahaya. Mbiɗeˀvra: Kristu a wuzla kum, kum minjah hiri asi dudok naŋ na vurˀeŋ.

²⁸ Ndra matilam di mi na, i naŋ vuna. Ndra maɓaka mbur gar ɗaˀ ɗaˀ le, yo ndra madubunaka sinmijileŋ ko wanaka gar, da mburo duban duban le na, ɓa mbur gar a tiri manja hereweɗ ar naŋ mujom ati Kristu.

²⁹ Ya magi slra, yo ya macik vu ti gidaŋ naŋ mihaɗa a hur ɗu na, vurˀeŋ.