Ɓimezle ngi Yesu Kristu ZAŊ mitil di mi 9 - Bible en langue guiziga

Yesu muwuna hiri ngi mbur miyaka cak i dangar

¹ Ti Yesu macuh na, a pur mbur miyaka cak i dangar.

² Mizli ngi seˀehey a cufuɗakaŋ: «Kumani, migi mungra ɓa a sa yakaŋ cak i dangar na, i naŋ kwa malla i miyi naŋhay kwa?»

³ Yesu a mbiɗa: «I naŋ ta, yo i miyi naŋhay ta ma. Amma a gi kanah na, ɓa slra ngi Buymisemuŋ a njik avu naŋ.

⁴ Ani, i papas aruŋ ɗagay, anja i gam slra ngi mbur mislino ya. Duvuɗ ara ndilawa, mbur magi slra ti duvuɗo gu, anta.

⁵ Ti ya misi ar duniya aruŋ na, yi li minjahha ngi duniya.»

⁶ A dirba naŋ miɓi kahana na, Yesu a tuf tazlay a ruwuy, a huluɓ di murɓuk, a kuro avu hiri ngi mbur dangara.

⁷ Dar a ɓaŋ: «Aru, ara buna hiri ar futuŋ mazilaka Silowe.» A mbiɗeˀvra: Mislin. Dangar aru ng'ara, a buna hiri. Ti naŋ mamo na, ara pur kweŋ kweŋ muduba.

⁸ Midigwi naŋhay ati mizli mapurakaŋ zleˀe hõyyõ ar li suko gwat aciki jiviɗ na, a ɓam: «Hana i mbur masuk gwat a ciki jiviɗ tuwa takwa?»

⁹ Mizli mekelemey a ɓam: «I naŋ gisiŋ.» Numuŋhoyo: «Ĩˀĩ, i naŋ ta. I mbur mubam vu ti bi si.» Dar naŋ a ɓi: «I ya vuna si.»

¹⁰ Mizli a ɓakaŋ: «Na, hiri ɗik vuna a wun mbri mbri ska?»

¹¹ A mbiɗa taŋ di: «Mbur mazilaka Yesu na, a huluɓ murɓuk, a kuriy di avu hiri, a ɓiy: ‹Ara buna hiri a Silowe.› Dar yi ru, i bun, a dirba nah, hiri ɗu a wun.»

¹² A ɓakaŋ: «Mbur nah vuna naŋ amaka?» A mbiɗa: «Yi si na ta.»

Farisahay mucufuɗaka mbur dangar miɗiyi

¹³ A ram ti mbur dangar zleˀe tuwa ng'avi Farisahay.

¹⁴ Dambalaka Yesu muhulɓa murɓuk, muwunaŋ hiri na, tapas sabat.

¹⁵ Farisahaya kwana, a cufuɗakaŋ: «A gi mbri mbri wurenna, ka mapur naka?» A mbiɗa taŋ di: «A kuriy hohoy avu hiri, yi bunaŋ, a dirba nah, joˀ yi pur muduba.»

¹⁶ Farisa mekelemey a ɓam: «Mbur miga gwat hana a so ti vu Buymisemuŋ ta, asi naŋ anta ja ɓi ngi sabata ta.» Amma mekelemey a ɓam: «Mbur magi mungra, a ga cekene misi ka tayna gu mbri mbrike?» A wunkam ˀay ar wala taŋ.

¹⁷ Dar a ɓaka dangar tuwa ma: «Na, ka ki ɓi mbri a hirnga mbur muwunuw hiri vunaka?» A ɓa taŋ: «I mijiviɗi.»

¹⁸ Ɓa Yudehey a tiɓaka mbur nah i dangar zleˀe, ara pur muduba na, a ngumam ta, sey a ziloko miyi naŋhay daɗ le ɗagay.

¹⁹ Dar a cufuɗaka miyi naŋhaya: «Hana i mangal kum gisiŋ, kum maɓam a ya ka cak i dangar na kwa? A gi mbri mbri ɓa naŋ mapur wurenna na ka?»

²⁰ Miyi naŋhay a mbiɗaka taŋ di: «I sinaka le, i mangal ndra gisiŋ, yo cak naŋ i dangar.

²¹ Amma naŋ mapur wurenna, a gi mbri mbrike na, i si na ka ta I sinaka mbur muwunaŋ hiri vuna ta ma. Cufuɗakaŋ, naŋ vuna i zuŋ mata ma na, anja a mbiɗa ɓi ngi hirnga naŋ ti haŋ naŋ!»

²² Miyi naŋhay a ɓam kahana, vur a zluwunam ti Yudeheye. Asi Yudehey a jumom ˀay le ar wala taŋ, a ɓam: «Ko wa gar miɓi le: ‹Yesu i Mesi› na, a ɓulaka tir hay ngi dira dibiɗ avra.»

²³ Miyi naŋhay miɓam: «I zuŋ mata, cufuɗakaŋ» na, vurˀeŋ.

²⁴ Farisahay a ziloko mbur dangar tuwa sar mucuw naŋ ma, a ɓakaŋ: «Ɓi njah a mbuŋ Buymisemuŋ! Ndr'i sinaka le, mbur nah i mbur migi mungra.»

²⁵ A mbiɗa taŋ di: «Da i mbur magi mungra, yi si na ta. Gwat purla ya misina na: yi dangar zleˀe ɓula, amma wurenna, i ra pur muduba.»

²⁶ A ɓakaŋ: «A guw di i gwat mike? A wunuw hiri vuna mbri mbrike?»

²⁷ A mbiɗa taŋ di: «Yi slufukum di le zleˀe si mayse, amma ko ki cinam ta. Ki wuɗam ɓa ki cinam sar pal ava ma vur mike? Malla kum vuna, may kum ada ngi tiri mizli ngi seˀehey aya kwa mbrike?»

²⁸ Joˀ Farisahay a zlaka, a zakaŋ, a ɓakaŋ: «Ka ki mbur ngi seˀeŋ. Ndr'i mizli ngi si Moyisey.

²⁹ Ndr'i sinaka le, Buymisemuŋ a ɓi ɓi le da Moyise, amma mbur nah a so ti damaka na, i si na ka ta»

³⁰ Mbur tuwa a mbiɗa taŋ di: «hẽˀe, da a so ti damaka na, ki sinaka ta? Gwat ngi zuma hirnga vuna i nah so. Na, a winiy hiri ɗu le ta ya kwa?

³¹ I sinaka le, Buymisemuŋ anta tiɓa mi ngi mizli migi mungraˀahaya ta, amma a tiɓa mi ngi mbur mazluwun di, yo magi gwat naŋ mawuɗo.

³² Mbur a wun hiri ngi mbur miyaka cak i dangar na, i cinam ɓi nah ɗaˀ ta.

³³ Da mbur hana a so ti vu Buymisemuŋ ta na, anja a gi gwat ko neˀ le gu ta.»

³⁴ A mbiɗakaŋ di: «Ka guzluv ar mungra zle ti taŋ muyukuw caka, ɓa ki so dubuna ndra gwat mbri mbrike?» Dar a ɓulaka tir hay ngi dira dibiɗe ng'avra.

³⁵ Yesu a cine na, a ɓulaka mbur tuwa le. Dar ara lumaŋ, a ɓaŋ: «Ki tiɓa Mangal ngi mburo le kwa?»

³⁶ Mbur a mbiɗaŋ di: «I wa ska Buy? Ɓa yi tiɓaŋ na.»

³⁷ Yesu a ɓaŋ: «Yawwa, ki ra pura ta kwa? Mbur maɓuw hana i naŋ vuna.»

³⁸ Mbur tuwa a ɓaŋ: «Yi tuɓuw le Buy.» Dar a girdiˀ a mbuŋ naŋ.

³⁹ Joˀ Yesu a ɓi: «Yi so ar duniya misenna ɓa ngi sli kiita, ɓa mizli mapuram tahay a puram, yo mapuramay kwana, a hulufom.»

⁴⁰ Farisahay misi ati naŋ micinaka mingiɓi nah na, a ɓakaŋ: «Gwat asinta, ndra kwana, ndr'i muhulufohoyo ya kwa mbrike?»

⁴¹ Yesu a mbiɗa taŋ di: «Da kum i dangaray zleˀe na, anja ani, mungra anta avu kumo ta. Amma wurenna ki ɓam: ‹I ra puram.› Mungra kumo naŋ da ndrehhe na, vurˀe.»