Ɓimezle ngi Yesu Kristu ZAŊ mitil di mi 6 - Bible en langue guiziga

Yesu mimba mizli durmuk zlum

¹ A dirba nah, Yesu a tuwuɗ nga duba yam madiɗa ngi Galile, ada zilaka yam Madiɗa ngi Tiberiya ma.

² Zigiduw haɗa ara sipaŋ, asi taŋ mupuraka cekenehey, naŋ mumbulo misi jijihey tuwa.

³ Vurˀe, Yesu a jiɗ nga muwã, a cifi a diga ati mizli ngi seˀeheye.

⁴ Naɓa muguzlum Pak ngi Yudeheye, naŋ gweˀe.

⁵ Yesu a zuɓa hiri paɗɗa, keɗ na, zigiduw haɗa ara so ng'avaŋ, a ɓa Filipe: «I sa hiɗikoko ɗaf ngi zum da mizli hanayna amaka?»

⁶ Naŋ maɓi kahana na, a wuɗ ɓa a ci a kwacay Filipe, asi naŋ vuna a si na gwat naŋ masa ga le si.

⁷ Filip a mbiɗaŋ di: «Ko ɗaf ngi suloy skat cuw ɓuluˀ ɓuluˀ kwana, anta tisla taŋ ta.»

⁸ Mbur pal a wuzla mizli ngi seˀeheye, Andre sukum ngi Simoŋ Piyer, a ɓaŋ:

⁹ «Ani, mangal ada aka ti ɗaf zlum waɗ kilif memeɗehey cuw, amma a gi mi geˀ da mizli mihaɗa kahana ka?»

¹⁰ Dar Yesu a ɓi: «Ɓaka taŋ a cifam a ruwuy.» Giziŋ ada haɗi angi li nah vuna. Joˀ mizli a cifam so. Taŋ zileye, a gam gwat ngi durmuk zlum gu.

¹¹ Yesu a hila ɗafahay tuwa, a ga sise da Buymisemuŋ. A dirba nah, a wuɗkaka da mizli mujoˀjoˀhoy tuwa. A gi ti kilife kanah ma, a vula taŋ di ka taŋ mawuɗam.

¹² A dirba taŋ mimbam na, Yesu a ɓa mizli ngi seˀeheye: «Cikilaka is naŋ mubulngus bulngus mindire, ɓa ko neˀ a hiryi ta.»

¹³ A cikilaka is ngi ɗaf zlum mizli muzumam ava tuwa, a naham di gadagar kuruˀ nga cuw.

¹⁴ Mizli tuwa mupuraka cekene Yesu miga nah na, a ɓam: «Mbur hana i Mijiviɗ gisiŋ! Mijiviɗ ngi so angi duniya tuwa, i naŋ vuna!»

¹⁵ Amma Yesu misina a wuɗam a tikakaŋ ˀay ɓa a cakaŋ ar buy na, a sumuɗ silaŋ pal naŋ nga muwã tuwa ma.

Yesu muru ti sar a hirnga yam

¹⁶ Pastaˀ migi na, mizli ngi seˀehey a pam sar sesẽŋ nga miyam madiɗaŋ.

¹⁷ A cam palalam, ara ram kini nga Kapernahum ti duba zaw vay mekelem. Duvuɗ a ji le si, amma Yesu a ja taŋ is t'aruŋ.

¹⁸ Himiɗ a zla gi ti gidaŋ, yam a ki totoŋ ɓaˀ ɓaˀa.

¹⁹ A kukuroko palalama le, a gi gwat ngi kilometir zlum malla merkeɗ gu si. Dar a puraka Yesu ara ru ti sar a hirnga yama, ara kiroho ng'avi palalama, joˀ zluwun a ga taŋ.

²⁰ Amma Yesu a ɓa taŋ: «I ya, ki zluwunam ta!»

²¹ A wuɗam ɓa a zuɓakaŋ ng'ar palalama zleˀe, amma ar nah vuna si na, palalam a luuma hirwuyo le kric ar li taŋ maram ng'ara tuwa.

Zigiduw maru ti sipa Yesu

²² Li naŋ muwun na, mizli mindiram a dubazaw vay mekeleme, a wulkam keŋ, palalama zleˀe akẽh purla tewle, yo ma na, Yesu a ci palalam asi mizli ngi seˀeheye zleˀe ta ma, taŋ a ram pal taŋ.

²³ Amma palalam mekelemey a soko tir walahay Tiberiya, a ndiloko gweˀ avu li taŋ muzumaka ɗaf, Buy Yesu miga sise da Buymisemuŋ vurˀe tuwaŋ.

²⁴ Zigiduw mupura Yesu naŋ anta akẽh ta, yo ko mizli ngi seˀeheye, t'anta ma na, a cam palalam tayna tuwa, a ram nga puroko di a Kapernahumo.

²⁵ Yo ti taŋ mulumaka a duba yam madiɗa tuwa na, a ɓakaŋ: «Kumani, ki ndilo aka ngi vunaka?»

²⁶ Yesu a mbiɗa taŋ di: «Gisiŋ gisiŋ, yi ɓukum na: kum masipikiy na, anta vur kum mupuram cekenehey na ta, amma vur kum muzumam ɗaf, hã ki mbam ndus na.

²⁷ Anja ki gam slra ngi luuma ɗaf mahiryi ta, amma ngi luuma ɗaf mazik, mavul siifa ngi sete. Ɗaf Mangal ngi mbur masavulukum di, asi mbur Cine Buymisemuŋ muɗuv haŋ angi naŋ na, i naŋ vuna.»

²⁸ Joˀ a ɓakaŋ: «Ani, i gam mbri ɓa i gam slra ngi Buymisemuŋ vuna ka?»

²⁹ Yesu a mbiɗa taŋ di: «Slra ngi Buymisemuŋ anihĩ: Sey ki tiɓaka mbur naŋ mislino di na far.»

³⁰ A ɓakaŋ: «Na, ka ki gi cekene wana, ɓa i purakaŋ, yo ɓa i tuɓukuw vuna ka? Ki sa gi di i slra wanaka?

³¹ Dideˀ ndrahay a zumam man le a wuzlaɓuh mikirɗak kirɗaka, a tohoko ɓi nah anihĩ: A vula taŋ ɗaf ngi zum muso paɗ ti muŋ.»

³² Amma Yesu a ɓa taŋ: «Gisiŋ gisiŋ, yi ɓukum na: muvulukum ɗaf ngi muŋ na, i Moyis ta, amma i Baha mavulukum ɗaf migisiŋ gisiŋ maso paɗ ti muŋ.

³³ Asi ɗaf ngi Buymisemuŋ mavulukum di na, i ɗaf mapo sar paɗ a muŋ, yo mavula siifa da duniya.»

³⁴ Dar a ɓakaŋ: «Inga vula ndra ɗaf nah vuna ndrehhe sini, Buy.»

³⁵ Yesu a ɓa taŋ: «Yi ɗaf mavul siifa. Mbur maso ng'avi ya na, may anta sa jaŋ mata wãˀ. Mbur matiɓiy na, yam anta sa gaŋ mata ndiɗaˀ.

³⁶ Amma yi ɓukum di le: ki purikiy le ngbaŋ, ti nah gar kwana, kum anta tiɓaka ta.

³⁷ Mizli Baha mavuliy taŋ gar na, a sa soko ng'avi ya. Yo mbur maso ng'avi ya na, y'anta sa hizigaŋ avra ta ndiɗaˀ.

³⁸ Vur yi po sar paɗ a muŋ, ɓa yi gi gwat ngi mongoy ɗu ta, amma gwat mbur mislino ya mawuɗo.

³⁹ Gwat mbur mislino ya mawuɗo n'anihĩ: mizli naŋ muvuliy taŋ na, anja i zizi mbur pal a wuzla taŋ ta. Amma angi hin ngi dirba wãˀ na, anja i slikiɗa taŋ ti wuzla mumucahay a muŋ.

⁴⁰ Asi gwat Baha mawuɗ na, n'anihĩ: Ko wa gar mupura Mangala le, yo mitiɓaŋ le na, anja a lum siifa ngi sete, angi hin ngi dirba na, yi sa slikiɗaŋ ti wuzla mumucahaya.»

⁴¹ Zle ti nah na, Yudehey a zlaka a dirɗaka Yesu, vur naŋ miɓi: «Yi ɗaf mupo sar paɗ ti muŋ» tuwa.

⁴² Joˀ a ɓam ma na: «Hana i Yesu mangal ngi Zozef tuwa ta kwa? I sinaka cine ati mumuŋ le ngbaŋ. Wurenna a ɓi a po sar paɗ ti muŋ mbri mbrike?»

⁴³ Yesu a mbiɗa taŋ di: «Pulaka dirɗa vu ar wala kum na.

⁴⁴ Ko mbur maso ng'avi ya gu anta, sey da Baha mislino ya muso di le far. Ya i sa slikiɗaŋ ti wuzla mumucahay ar hin ngi dirba wãˀ.

⁴⁵ Mijiviɗey a tohoko zleˀe, a ɓam na: Taŋ gar a sa dubunam avu Buymisemuŋ. Ko wa gar micin mingiɓi ngi Baha le, mitiɓa ɓi nah le na, a so ng'avi ya.

⁴⁶ Mbur mupura Baha ɗaˀ anta, sey mbur muso ti vu Buymisemuŋ na, naŋ a pura Cine le ɓula.

⁴⁷ Gisiŋ gisiŋ, yi ɓukum na: ko wa mitiɓi le na, naŋ da ti siifa ngi sete.

⁴⁸ Yi ɗaf mavul siifa.

⁴⁹ Dideˀ kumoy a zumam man le a wuzlaɓuh mikirɗak kirɗaka, yo a micam le.

⁵⁰ Amma ɗaf maposar paɗ ti muŋ na, ɓi naŋ anihĩ: mbur misa zuma le na, anta sa muc mata wãˀ.

⁵¹ «Yi ɗaf misi ti siifa maposar paɗ ti muŋ. Mbur masa zum ɗaf hana na, a sa ndir ti siifa hã ngi sete. Yo ɗaf ya masa vula vuna i meficek ngi vu ɗu, i vula ɓa mizli ngir duniya a ndiram ti siifa.

⁵² Dar Yudehey a ngilam mi ti gidaŋ ar wala taŋ, a ɓam: «Mbur hana a vula ndra meficek ngi vu naŋ gu ɓa i zumaka mbri mbrike?»

⁵³ Joˀ Yesu a ɓa taŋ: «Gisiŋ gisiŋ, yi ɓukum na: da ki zumam meficek ngi Mangal ngi mburo ta, yo da kisam pumbus naŋ ta na, kum anta kisa lumam siifa a hur kumo ta.

⁵⁴ Mbur mazum meficek ngi vu ɗu, yo masi pumbus ɗu na, naŋ da ti siifa ngi sete, yo i sa slikiɗaŋ ti wuzla mumucahay ar hin ngi dirba.

⁵⁵ Asi meficek ngi vu ɗu i ɗaf migisiŋ gisiŋ naŋ, yo pumbus ɗu i gwat ngi si migisiŋ gisiŋ naŋ.

⁵⁶ Mbur mazum meficek ngi vu ɗu, yo masi pumbus ɗu na, naŋ da jom ati ya, yo ya kwana, y'ada jom ati naŋ ya.

⁵⁷ Baha mislino ya, naŋ ti sifa, ya misi ti siifa na mbele naŋ, naŋ kanah ya, mbur misa zumiy le na, a sa ndir ti siifa mbele ya.

⁵⁸ Peŋ mupo sar paɗ ti muŋ n'anihĩ: a bam vu ati ngi dideˀ kumoy muzumaka na ta, asi taŋ a micam le. Amma mbur misa zum ɗaf hana le na, a sa ndir ti siifa hã ngi sete.»

⁵⁹ Hana i dubuna gwat ngi Yesu da mizli ar hay ngi dira dibiɗ a Kapernahum.

Mingiɓi mavul siifa ngi sete

⁶⁰ Mizli haɗa a wuzla mizli ngi seˀeheye, a dirba taŋ micinam ɓi hana na, a ɓam: «Ɓi hana naŋ tuwaˀa. Macina gu i waka?»

⁶¹ Amma Yesu a si na le a mevele, mizli ngi seˀehey ara sisikamˀay ar ɓi nah, a ɓa taŋ: «Ɓi nah a wuɗ a ngizli ti kum avu jiviɗe kwa?

⁶² Ani da kisa puraka Mangal ngi mburo le, ara jiɗ ng'ar li naŋ misi anga zleˀe na mbrike?

⁶³ Mavul siifa i ˀUf ngi Buymisemuŋ. Meficek ngi vu anta gi gwat ko neˀ ta. Mingiɓi ya muɓukum di na, i ˀUf, yo i siifa.

⁶⁴ Amma mekelemey ada a wuzla kumo, anta tiɓam ta.» Vur mizli matiɓam ta ati mbur masa vulaŋ ɓa a jakaŋ na, Yesu a si na taŋ le zle dumbuŋ si.

⁶⁵ A ɓi ma: «Vurˀe, yi ɓukum na: ko mbur maso ng'avi ya gu anta, sey da Baha mupulaŋ jiviɗ nah le far.»

⁶⁶ Zle tapasa, mizli ngi seˀehey haɗa a pulakaŋ, a ram aseˀe mata.

⁶⁷ Dar Yesu a cufuɗa mizli mukuruˀ nga cuwoyo: «Na, kumo, ki wuɗam cuh le ya kwa?»

⁶⁸ Amma Simoŋ Piyer a mbiɗaŋ di: «I sa ram ng'avi waka, Buy? Kˀada ti mingiɓi mavul siifa ngi sete.

⁶⁹ Ani ndra, i tiɓaka le, i sinaka le, ki mbur Mipal ngi Buymisemuŋ.»

⁷⁰ Yesu a mbiɗa taŋ di: «Muwunukum, kum mukuruˀ nga cuwoy na, i ya ta kwa? Amma mbur pal a wuzla kum i Satan!»

⁷¹ A ɓi na vur Yudas, mangal ngi Simoŋ Iskariyot. Asi mbur ngi wuzla mukuruˀ nga cuwoy, masa vula Yesu ɓa a jakaŋ na, i naŋ.