Ɓimezle ngi Yesu Kristu ZAŊ mitil di mi 2 - Bible en langue guiziga

Vula ngwas a Kana

¹ Ngi hin mimakir naŋ na, ara vulam ngwas a Kana, hirwuy Galile. Mumuŋ ngi Yesu naŋ da a diga.

² A zilaka Yesu le ati mizli ngi seˀeheye nga diga ya.

³ Mbaazla a tiki le. Mumuŋ ngi Yesu a ɓaŋ: «Mbaazla a tiki le avu taŋ.»

⁴ Amma Yesu a mbiɗaŋ di: «Ngwasa ki wuɗ mi avu ya ka? Pas ɗu a ndilo t'aruŋ.»

⁵ Mumuŋ ngi Yesu a ɓa gawlahaya: «Gwat naŋ maɓukum di gar na, gaka si.»

⁶ Magayak ngi ɗuguroy ada akẽh merkeɗe, Yudehey mabunam taŋ haŋ ati saray kaɓa mezegwel taŋ. Magayak purla gar na, a zlur yama gwat ngi litir skat gu.

⁷ Yesu a ɓa gawlahaya: «Nahaka magayak tayna ti yam.» Gawlahay tuwa a nahaka taŋ mbaf mbaf.

⁸ Yesu a ɓa taŋ: «Wurenna, nuwam, aram di da madiɗa ngi midi ɗafaya.» Joˀ a rakaŋ di.

⁹ Madiɗa ngi midi ɗafay tuwa a titila yam mitiri mbaazla tuwa. A so ti damaka na, a si na ta, amma gawla munuwa yamay a sinaka le ɓula. Dar a zilo mbur mavulakaŋ ngwasa,

¹⁰ a ɓaŋ: «Mbur gar na, a vula mbaazla mundumo da mizli dumbuŋ ɗagay zleˀe. A dirba nah, da mizli miziloko taŋ a wuɗ a wam gweˀ na, a vulaka taŋ mbaazla mukuyyo. Amma ka ki wi vu ti mbaazla mundumo hã wurenna mbrike?»

¹¹ Hana i cekene mudumbuŋ naŋ, Yesu miga a Kana hirwuy Galile. A biga dudok naŋ a diga. Joˀ mizli ngi seˀehey a tiɓakaŋ.

¹² A dirba nah, Yesu a ram nga Kapernahum ati mumuŋ, sukum naŋhay waɗ mizli ngi seˀeheye. Amma a gam hin neˀkini a diga.

Yesu ar hay ngi Bumbulvuŋ a Zeruzalem

¹³ Yesu aru nga Zeruzalem, vur muguzlum ngi Pak ngi Yudeheye, naŋ gweˀe.

¹⁴ A lum mizli migi terere ngi slahay, tumuŋhoy ati ɗiyuw dirgwaɗay waɗ mimbiɗi dalahay joˀ ar hay ngi Bumbulvuŋ a Zeruzaleme.

¹⁵ Akẽh na, a jum zeweɗ, a gi di laway, a ɓula taŋ cek ti haya ng'avra, jom ati tumuŋhoy waɗ slahaya, a zliɗa dala ngi mimbiɗi dalahaya, a putukuso tebur taŋhaya.

¹⁶ Dar a ɓa migi terere ngi ɗiyuw dirgwaɗaya: «Hilaka taŋ gar baɗ aka ng'avra. Hay ngi Baha, anja ki tiram di hay ngi gi terere ta.»

¹⁷ Mizli ngi seˀehey a wulkaka ɓimutohoko miɓi ani na: «Aw Bumbulvuŋ, may ngi hay ɗik a sa tiɓi a mevel ɗu ka vu!»

¹⁸ Dar Yudehey a cufuɗakaŋ: «Ki ga ndra cekene wana mabiga ndra di, k'ada ti jiviɗ ngi gi kahana vuna ka?»

¹⁹ Yesu a mbiɗa taŋ di: «Mbuzlaka hay ngi Bumbulvuŋ hana, i sa ndira hiri naŋ angi hin makir.»

²⁰ Dar Yudehey a ɓakaŋ: «A gam vi kukur mufaɗ nga merkeɗ ar li ndira hay misenna. Ka kisa ndira hiri naŋ angi hin makir mbrike?»

²¹ Amma hay ngi Bumbulvuŋ Yesu miɓa na, i dumvu naŋ vuna si.

²² Vurˀe, a dirba Yesu mislikiɗ ti wuzla mumucahay na, mizli ngi seˀehey a wulkaka ɓi naŋ miɓa na, a tiɓaka ɓimutoho ati ɓi Yesu miɓa tuwa.

Yesu a si na ɓi ngi kwacay ngi mburo le

²³ Ti Yesu misi a Zeruzalem, angi hin ngi muguzlum Pak na, mizli haɗa a tiɓakaŋ, asi taŋ mupuraka cekene, naŋ miga taŋ na.

²⁴ Amma Yesu a pula taŋ vu ta, vur a si na taŋ le kuy kuy gar.

²⁵ N'anta wuɗ mbur waɗ le, ɓa a gaŋ sedewo a hirnga mburo ta, asi naŋ ti hirnga naŋ, a si na ɓi ngi kwacay mburo le.