Ɓimezle ngi Yesu Kristu ZAŊ mitil di mi 12 - Bible en langue guiziga

Mariya mipa urdi da sar ngi Yesu

¹ A ndir hin merkeɗ ɓa muguzlum Pak a gi, Yesu aru nga Betani, walahay ngi Lazar, mbur naŋ mislikiɗa ti wuzla mumucahay tuwa.

² A gakaŋ gwat ngi zum hĩˀĩ da naŋ a diga, Marta ara sa taŋ di. Yo Lazara naŋ da a wuzla mizli mazumam gwat ati Yesu.

³ Dar Mariya a zuɓa koloba ngi urdi misi cikili naŋ haɗa, migaka ti nardi pal naŋ. A pa da sar ngi Yesu, a tukuɗaŋ di ti himac hirnga naŋ. Ziˀĩ ngi urdi tuwa a zlira haya gar.

⁴ Dar Yudas Iskariyot, mbur ngi wuzla mizli ngi seˀehey, masa vula Yesu ɓa a jaka na, a ɓi:

⁵ «A hiɗikaka urdi hana avra suloy, skat makir ɓa ngi vula dala naŋ da misi murgahay ta vur mike?»

⁶ Naŋ miɓi kahana na, a lik di i misi murgahay gisiŋ ta, amma vur naŋ i muhul, maja dala i naŋ, naŋ da hul dala mapaka ava vuna.

⁷ Dar Yesu a ɓi: «Pulaka ngwasa! Anja a ga kahana, a ɗiyiy ti ɗiyi ng'ar vigiɗi.

⁸ Misi murgahaya, kum ada ati taŋ ndrehhe, amma ya, y'anta ati kumo ndrehhe ta.»

⁹ Dambalaka zigiduw haɗa a wuzla Yudeheye, a cinaka le Yesu naŋ da a Betani. A ram nga diga vur Yesu vuna tewle ta, amma ɓa a puraka Lazar, mbur, naŋ mislikiɗa ti wuzla mumucahay tuwa ya.

¹⁰ Zle ti nah na, masay madiɗahay a juwaka le a mevel taŋ ɓa a kiɗaka Lazara vagaya ya.

¹¹ Asi Yudehey haɗa ara pulaka taŋ, ara tiɓaka Yesu asi Lazar vuna.

Yesu mici nga Zeruzalem

¹² Ngi li naŋ muwun na, zigiduw haɗa musoko ar muguzlumo, a cinaka na, Yesu ara sawa nga Zeruzaleme.

¹³ A wuɗam mihaŋ ngi dibinojehey, a bam nga ji di hirnga, a tilam mi: «Buymisemuŋ misi ti dudok! Anja Bumbulvuŋ a ɗuwula mi da mbur maso ti slimiɗ naŋ! Anja Buymisemuŋ a ɗuwula mi da buy madiɗa ngi Israyele!»

¹⁴ Yesu a lum jagara zungu, a jiɗ gilaˀ ara kaɓa ɓi mutoho miɓa:

¹⁵ «Ka walahay Siyoŋ, ki zluwun ta. Pura, buy madiɗa ɗik masawa, ar jagara zungu.»

¹⁶ Dumbuŋ na, mizli ngi seˀehey a slaka wala nah zleˀe ta. Amma ti Yesu mulum dudok na, a wulkam keŋ ar Ɓimutoho miɓi zleˀe vurˀeŋ, waɗ ar gwat taŋ migakaŋ di na, i nah vuna si.

¹⁷ Ti Yesu mizila Lazar ɓa a bo tir zivi, naŋ mislikiɗa ti wuzla mumucahay na, zigiduw misi ati naŋ tapasa ara ga sedewo naŋ.

¹⁸ Zigiduw muso ji di hirnga na vurˀeŋ, asi a cinaka ɓi ngi cekene naŋ miga na le.

¹⁹ Joˀ Farisahay a ɓam ar wala taŋ: «Kum ada puraka ya, kum anta sa ndilam ko mike ta. Puraka, duniya gar ara sipaŋ!»

Mizli a wuzla Grekey mawuɗam pur Yesu

²⁰ Mizli a wuzla Grekey ada musoko nga Zeruzalem ɓa a diram dibiɗ ngi muguzlumo.

²¹ A kirohoko ng'avi Filip, mbur ngi Betsayda, hirwuy Galile, a cufuɗakaŋ: Buy, i wuɗam pur Yesu na ta kwa!»

²² Filip ara ɓa da Andre, joˀ taŋ cuw taŋ a ɓaka da Yesu.

²³ Yesu a mbiɗa taŋ di: «Pas a ndila le, ɓa Mangal ngi mbur a lum dudok muduba.

²⁴ Gisiŋ gisiŋ, yi ɓukum na: da hilfa daw madiɗ a ruwuyo, a zĩˀĩ ta na, a ndir leŋ pal naŋ. Da a zĩˀĩ le na, a gi haɗa jak.

²⁵ Mbur mawuɗ siifa naŋ na, a zizaŋ, yo mbur mapura siifa naŋ hiris le ar duniya hana na, a sa ndir di hã ngi sete.

²⁶ Da mbur a wuɗ le ɓa a gi gawla ɗu na, anja a sipiy, yo ar li ya misi anga na, gawla ɗu a sa ndir anga ya. Da mbur ara gi gawla ɗu na, Baha a sa ɗuvaŋ hirngaŋ.

²⁷ «Wurenna, membezleŋ ngi dumvu ɗu ara muɗiy, i sa ɓi mbrike? Baha, lihiy ar pas ngi bonoy hana kini kwa? Amma, ani yi so hĩˀĩ vurˀe ma.

²⁸ Baha, ga ɓa slimiɗ ɗik a zil.» Dar ˀay a cino paɗ a muŋ: «Yi ga le si ɓa slimiɗ ɗu a zil, yo i sa ga ɓa a sa zil ava ma.»

²⁹ Zigiduw misi akẽh micinaka na, a ɓam: «I ndisl ngi vuŋ.» Mekelemey a ɓam: «I modro miɓaŋ.»

³⁰ Yesu a ɓa taŋ ma: «ˀAy micino hana, vur ya ta, amma vur kum jaka.

³¹ Wurenna, i pas ngi gi kiita da duniya hana. Wurenna, yarma ngi duniya hana, a sa ɓulaka avra.

³² Nga ya na, da a sa zuɓikiy le baɗ ti ruwuyo nga muŋ na, i sa ɗiɗa mizli gar ng'avi ya.»

³³ Mingiɓi hana a bigi di i jiviɗ ngi muc naŋ masa muc di.

³⁴ Zigiduw a mbiɗaŋ di: «I cinam ar ɗerewol ngi ɓimujuwa na: Mesi a sa ndir caˀa. Na, ki ɓi: a sa zuɓaka Mangal ngi mburo nga muŋ mbri mbri maka? Mangal ngi mbur vuna i waka?»

³⁵ Yesu a mbiɗa taŋ di: «Li minjahha naŋ da zik neˀ a wuzla kumo ɗagay. Ti kum misi ar li minjahha aruŋ na, aram digi ɓa luvuŋ a sirtukum ta. Asi da mbur ara ru digi ar luvuŋ na, anta si na aru kini nga ka ta.

³⁶ Ti kum misi ar li minjahha aruŋ na, tiɓaka li minjahha a mevel kumo, ɓa ki tiram ziri ngi li minjahhahay.» A dirba Yesu miɓa taŋ ɓi hana na, a bi, a ɗum cik avu taŋ.

Yudehey a tiɓaka Yesu ta

³⁷ Ko ti Yesu migi cekenehey haɗa mur taŋ Yudehey na kwana, a tiɓakaŋ ta,

³⁸ ɓa mingiɓi ngi mijiviɗ Ezayi a gi muduba, a ɓi zleˀe na: «Bumbulvuŋ, ɓi ndra miɓaka na, mitiɓa i waka? Yo gidaŋ ngi Bumbulvuŋ na, a bigi avu waka?»

³⁹ A tiɓakaŋ gu ta, vur mike na, Ezayi vuna a ɓa le ma, a ɓi:

⁴⁰ «Buymisemuŋ a hulufo taŋ le, a tir ti hirnga taŋ le gidaŋ, ɓa hiri taŋ a pur mata, ɓa mevel taŋ a sla wala ngi ɓi mata, anja a mbuɗoko ng'avi ya ta, vur ya maɗiya taŋ.»

⁴¹ Ezayi a ɓi kahana vur a pura dudok ngi Yesu le, yo naŋ miɓi na, vurˀeŋ.

⁴² Ko a wuzla madiɗa ngi Yudehey vuna kwana, mizli haɗa asi taŋ a tiɓakaŋ le. Amma anta njikaka ɓi nah ta, asi Farisahay. A zluwunam vur taŋ maɓulaka taŋ tir hay ngi dira dibiɗ taŋ avra.

⁴³ Asi ngilawuy ngi mizli mangilam taŋ wuy na, a hĩhĩyam di i nah, fineˀ ngila wuy Buymisemuŋ mangil taŋ na le.

⁴⁴ Angi nah na, Yesu a til mi: «Mbur matiɓiy na, a tiɓi di i ya ta, amma i mbur mislino ya.

⁴⁵ Yo mbur mapuriy na, a pur di i mbur mislino ya.

⁴⁶ Ya, li minjahha, i so le ar duniya, ɓa ko wa gar matiɓiy na, a ndir ar luvuŋ ta.

⁴⁷ Da mbur a cine mingiɓi ɗu le, a ja a hirnga ta na, i ya magaŋ kiita ta, asi yi so ngi laha duniya, yi so ngi gi kiita ta.

⁴⁸ Mbur mahizigiy avra, yo matiɓa mingiɓi ɗu ta na, migi kiita naŋ, naŋ da. I mingiɓi ya miɓa na masa gaŋ kiita ar hin ngi dirba.

⁴⁹ Asi ya miɓi na, i ɓi ngi mongoy ɗu ta, amma ɓi ya maɓa, yo ya manjika na, i Baha mislino ya miɓiy di.

⁵⁰ Yo i si na le, ɓimuɗuva naŋ i siifa ngi sete. Ɓi ya maɓa na, i ɓa kaɓa Baha miɓiy di na.»