Ɓimezle ngi Yesu Kristu ZAŊ mitil di mi 1 - Bible en langue guiziga

Mingiɓi ngi li minjahha, yo ngi siifa

¹ Angi zlivirzi ngi gwatay gar na, Mingiɓi naŋ da zlezle si. Mingiɓi, naŋ ati Buymisemuŋ, Mingiɓi i Buymisemuŋ.

² Mingiɓi naŋ da ati Buymisemuŋ zle angi zlivirzi naŋ.

³ Buymisemuŋ miga gwatay gar na, ti naŋ. Gwat migi manja naŋ na, ko anta loŋ ta.

⁴ Siifa a bo ti vaŋ, yo siifa i li minjahha ngi mizli.

⁵ Li minjahha ara pusluɗ angi luvuŋ. Yo luvuŋ a sla wala nah ta.

⁶ Buymisemuŋ a slino mbur ada, a zilaka Zaŋ.

⁷ Naŋ a so i migi sedewo, ɓa a ɓa ɓi ngi li minjahha vuna, ɓa mizli gar a tiɓam ti seˀeŋ.

⁸ Naŋ i li minjahha vuna ta ɓula, amma i migi sedewo vur li minjahha vuna.

⁹ Mingiɓi i li minjahha migisiŋ gisiŋ. A so a ruwuyo, ɓa a ga li njahha da mbur gar.

¹⁰ Mingiɓi, naŋ da zleˀe angi duniya, Buymisemuŋ miga duniya na, ti naŋ, amma mizli ngi ruwuyoy a sinakaŋ ta.

¹¹ A so ar hirwuy nga naŋ, amma mizli nga naŋhay a tiɓaka so naŋ ta.

¹² Amma mizli mitiɓaka so naŋ, yo mitiɓakaŋ a mevel taŋ gar na, a vula taŋ gidaŋ, ɓa a tiram ziri ngi Buymisemuŋhoy.

¹³ A ya ka taŋ i ziri ngi Buymisemuŋhoy na, anta kaɓa kpak ngi mizli titrahay a ruwuy misenna ta, anta vur a ya ka taŋ i ziri ngi mbur zil kine ta ma, amma i Buymisemuŋ muwuɗu.

¹⁴ Yo Mingiɓi tuwa a tiri mbur titra le. A cifi a wuzla ndra ti gimezle ati ɓi ɓi mikaslsla haɗa. I puraka dudok naŋ le. I dudok ngi Mangal kirmalay mulumo di avu Cine.

¹⁵ Zaŋ a ga sedewo naŋ, a til mi, a ɓi: «Puraka, mbur ya miɓa ɓi naŋ zleˀe tuwa: ‹Mbur ara sawa a dirba ɗu, amma naŋ madiɗa fineˀ ya, asi zle ti taŋ miyikiy t'aruŋ na, naŋ da zlezle si.›»

¹⁶ Asi mike na, ndra gar i lumam mi ngi ndra le ar gimezle naŋ mihaɗi na, a ɗuwula ndra mi nga mbuŋ nga mbuŋ.

¹⁷ Buymisemuŋ a vulo ɓimujuwa tisi haŋ ngi Moyis. Amma gimezle ati ɓi mikaslsla na, i lumaka tisi haŋ ngi Yesu Kristu.

¹⁸ Ko mbur mupura Buymisemuŋ ɗaˀ anta wãˀ. Amma Mangal naŋ kirmalay mujom ati Cine na, a biga ndra di le.

Zaŋ mici mizli ar yam migi sedewo

¹⁹ Mizli madiɗa ngi Yude ngi Zeruzalemey a slinoko masayay ati levihey ɓa a cufuɗaka Zaŋ: «Ka ki waka?»

²⁰ Zaŋ a mbiɗa taŋ di njah: «Yi Messi ta.»

²¹ A cufuɗakaŋ: «Na, ki wa ska? Ki Eli kwa?» Zaŋ a mbiɗa: «Ĩˀĩ, yi Eli ta.» A cufuɗakaŋ ma: «Na, ki Mijiviɗ kwa?» A mbuɗa taŋ di: «Ĩˀĩ, yi naŋ ta.»

²² Dar a ɓakaŋ: «Na, ki wa ska? Anja ɓa i ra mbiɗaka ɓi nah da mizli mislinoko ndra na. Ka ki ɓi mbri a hirnga ɗik vuna ka?»

²³ Zaŋ a slufa taŋ mingiɓi ngi mijiviɗ Ezayi miɓa zleˀe: «Yi ‹Mbur matil mi a wuzlaɓuh: Ɗiyaka jiviɗ da Bumbulvuŋ cir cir kuy kuy!›»

²⁴ Dambalaka a wuzla mizli muslunoko taŋ ng'avi Zaŋ vuna, Farisahay ada.

²⁵ A ra cufuɗakaŋ ava na si: «Da ki Kristu ta, ki Eli ta, ki Mijiviɗ ta ma na, ki ci mizli ar yama si mbrike?»

²⁶ Zaŋ a mbiɗa taŋ di: «Yi ci mizli ar yam tewle si, amma mbur ada a wuzla kumo, ki si na ka ta

²⁷ A ra sawa a dirba ɗu, amma yi ndila ter ngi puska zeweɗ ngi tarak naŋ ta.»

²⁸ Gwat tayna gar a gam ar walahay Betani, ti dubazaw Zurdeŋ, ar li Zaŋ maci mizli ar yam.

Yesu i tumuŋ ngi Buymisemuŋ

²⁹ Li naŋ muwun na, Zaŋ a pura Yesu ara sawa ng'avaŋ, dar a ɓi: «Puraka, tumuŋ ngi Buymisemuŋ mazuɓa mungra ngi duniya.

³⁰ Naŋ i mbur ya miɓa ɓi naŋ zleˀe: ‹Mbur ada sawa a dirba ɗu, naŋ madiɗa fineˀ ya, asi naŋ da zle dumbuŋ angi ya› tuwa.

³¹ Ya vuna, i sinaŋ zleˀe ta, amma yi so ci mizli ar yam tewle ɓa Israyeley a sinaka, i naŋ.»

³² Zaŋ a ga sedewo naŋ, a ɓi: «Yi pura ˀUf ngi Buymisemuŋ mapo sar kaɓa gonok paɗ a muŋ, a so cifi a hirnga naŋ.

³³ Yi sinaŋ zleˀe t'aruŋ, amma Buymisemuŋ mislino ya ngi ci mizli ar yama, i naŋ miɓiy: ‹Mbur ka masa pura ˀUf Mipal masa po sar, a so cifi a hirnga naŋ na, maci mizli ar ˀUf Mipal vuna, i naŋ.›

³⁴ Ya Zaŋ, i pura le, i ɓa le njah gisiŋ, Mangal ngi Buymisemuŋ, i naŋ.»

Yesu mizla zila mizli ngi seˀehey

³⁵ Li naŋ muwun na, Zaŋ naŋ da deŋ angi li tuwa ma ati mizli ngi seˀehey cuw.

³⁶ A ɗuva hiri taˀ angi Yesu macuh na, a ɓi: «Puraka, tumuŋ ngi Buymisemuŋ ani!»

³⁷ Mizli mucuw ngi si Zaŋhay tuwa, a cinaka naŋ miɓi na le, a sipaka Yesu.

³⁸ Yesu a mbiɗi, a pura taŋ ara sipakaŋ, a ɓa taŋ: «Ki sipam mike?» A ɓakaŋ: «Rabbi, ki ra cifi amaka?» Rabbi mbiɗeˀvra Kumani.

³⁹ Yesu a ɓa taŋ: «Soko, kisa puraka.» Dar a ram so, a puraka li naŋ micifi anga, naɓa a gi ng'avi pastaˀ wãˀ. A zikam bummoˀ ngi pas nah.

⁴⁰ Mbur pal a wuzla mizli mucuw tayna micinam mingiɓi ngi Zaŋ, misipaka Yesu na, i Andre sukum ngi Simoŋ Piyer.

⁴¹ Andre ara luuma Simoŋ, sukum naŋ migisiŋ gisiŋ dumbuŋ kwaɗay, a ɓaŋ: «I lumaka Mesi le.» Mesi, mbiɗeˀvra: ‹Kristu.›

⁴² Andre tuwa aru ti Simoŋ ng'avi Yesu. Yesu a ɗuva hiri taˀ angaŋ, a ɓi: «Ki Simoŋ, mangal ngi Zaŋ. A sa zulukuw Kefas.» A mbiɗivra: «mandazlay muwã.»

⁴³ Li naŋ muwun na, Yesu a wuɗ aru nga Galile. A ji hirnga ti Filip, a ɓaŋ: «Sipiy.»

⁴⁴ Dambalaka Filip i mbur ngi Betsayda, hirwuy ngi ti Andre ati Piyer.

⁴⁵ Filipe kwana, ara luuma Natanayele ya, a ɓaŋ: «Mbur mutohoko ɓi naŋ ar ɓimujuwa ngi Moyis ati ngi mijiviɗey zleˀe tuwa, i lumaka le. I Yesu ngi Nazaret, mangal ngi Zozef.»

⁴⁶ Natanayel a ɓaŋ: «Gwat mupuɗaw a bo baɗ ti Nazaret kwa?» Filip a ɓaŋ: «So pura.»

⁴⁷ Yesu mupura Natanayel maso ng'ava na, a ɓi vurˀeŋ: «Mbur Israyel migisiŋ gisiŋ ani. Anta gi gilaw da mbur ta wãˀ.»

⁴⁸ Natanayel a ɓaŋ: «Ki siniy amaka?» Yesu a mbiɗaŋ di: «Ti ka misi asi ˀuruf na, yi puruw le zle ti Filip muziluw t'aruŋ.»

⁴⁹ Dar Natanayel a ɓaŋ: «Kumani, ki Mangal ngi Buymisemuŋ, ki buy madiɗa ngi Israyel.»

⁵⁰ Yesu a ɓaŋ: «Ki tiɓiy vur ya muɓuw yi puruw le asi ˀuruf tewle na kwa? Ki sa pur gwat madiɗahay mifineˀ hana vuna ma!»

⁵¹ A ɓaŋ ma: «Gisiŋ gisiŋ yi ɓukum na: kisa puraka muŋ a sa wucuh wucah, modro ngi Buymisemuŋhoy ara jiɗam, ara poko sar nga hirnga Mangal ngi mburo.»