HEBEREY 9 - Bible en langue guiziga

Gi mikuli ngi muŋ ati gi mikuli a mbuŋ Buymisemuŋ ngi ruwuy

¹ Jumoˀay mudumbuŋ zleˀe na, gi mezegwel ngi huruk huruk a mbuŋ Buymisemuŋ ati hay ngi Bumbulvuŋ misi a ruwuy aka ada anga.

² Naŋ kine, guɗuk miɗiyaka zleˀe na, a zilaka guɗuk mudumbuŋ: «li mipal.» Misi a huroˀo: i li ɗuva lampehey, tabul waɗ ɗaf muvulahay le da Buymisemuŋ.

³ Nga duba godo minjar mucuw naŋ ma na, i guɗuk mazilaka «li mipal wãˀ»,

⁴ yo gwat ngi zluma mukuturɓuy, a gaka gwat nah ti ɓiri tapasl tapasl, yo akoti ngi jumoˀay, korkor hirnga naŋ sirit wãˀ ti ɓiri tapasl tapasl. Gwatay ada a hur akoti nah vuna, tutuŋ ngi ɓiri tapasl tapasl misi ti man ati ganday ngi Aroŋ mufuyuk waɗ belelerey misi ɓi ngi jumoˀay toh toh ar taŋ.

⁵ A hirnga akoti vuna ma na, foto ngi kerubeŋhey mabigaka dudok ngi muŋ, zlaraˀahaya njar njar sirit hirnga mi ngi akoti vuna. Wurenna i hin ngi supukum ɓi taŋ hizlek hizlek gar mata.

⁶ Gwatay gar i miɗiya taŋ kahana so, masayay a cam ngi gi slra taŋ ar pas gar ng'ar guɗuk mudumbuŋ.

⁷ Amma guɗuk mucuw naŋ na, sey masay madiɗa maci ng'ara is purla vur vi gar, yo sey a ci vuna ma na, ti pumbus ngi ginew a haŋ ngi gi mikuli, mikuli vur mungra ngi hirnga naŋ waɗ vur mungra ngi mizli gar.

⁸ Ti guɗuk mudumbuŋ misi ada aruŋ na, ˀUf Mipal a biga na, jiviɗ ngi ci ng'ar li mipal wãˀa, a wun t'aruŋ.

⁹ Gwat migi zleˀe gar na, i foto ngi hin muwurenna. Mbur mahuruk huruk a mbuŋ Buymisemuŋ gar na, gwat muvulahay ngi gi sedege ati mikulihey magaka taŋ tayna, a ndilaka ɗiya mevel ngi mburo gu ta.

¹⁰ Asi gwat tayna gar na, i ɓi ngi gwat ngi zumoy, gwat ngi sihey waɗ mezegwel ngi buna vuhoy wal wal haɗi. Tayna gar i mezegweley mizli titirahay magaka taŋ tewle, hã tapas Buymisemuŋ miɗiya gwataya le gar ti jiviɗ naŋ.

¹¹ Amma Kristu a so na, naŋ i masay madiɗa vur gwat mezlehey masa ndiloko tumbuŋ tuwa. A ga nga naŋ ar guɗuk madiɗa mifineˀ misi zleˀe, yo mifetek fetek wãˀ. I guɗuk, mizli miɗiyaka ta. Mbiɗeˀvra: naŋ anta i guɗuk ngi ruwuy aka ta.

¹² Kristu mici is purla tewle ng'ar li mipal wãˀ na, ɓa ngi lumo ndra jiviɗ ngi lih wãˀ ngi set na, a ci ti pumbus ngi bazuway ati ngi zir slahay ta, amma a ci ti pumbus ngi dumvu naŋ.

¹³ Asi mike na, pumbus ngi bazuway ati ngi gusoŋhoy, yo fucu ngi bulkoŋhoy mapaka pik pik ng'ar mizli misi diliheye, ada zuɓa taŋ dili ngi dumvu taŋ avra.

¹⁴ Na, pumbus ngi Kristu, naŋ gidaŋ fineˀ nah ta jak kwa? Naŋ ti haŋ naŋ, a vula hirnga naŋ ti ˀUf Mipal ngi sete, a gi di mikuli manja gwat malambaˀ araŋ. Pumbus naŋ a buna wuluk malambaˀ ngir mevel ndra, ɓa i huruk hurukam a mbuŋ Buymisemuŋ misi ti siifa.

¹⁵ Vurˀe, Kristu i mbur mujumoˀay nawaya, mi ngi mbur vagay toh toh. Naŋ a muc ngi mbiɗa hirnga ngi mizli tir mungra, taŋ mugoko di zleˀe angi jumoˀay mudumbuŋ na, ɓa mizli mizilahaya, a lumam zlili ngi sete miɓa ɓi naŋ ɗaˀ le zleˀe tuwa muduba.

¹⁶ Da mi ngi mbur vagay toh toh ada akẽh na, naŋ kuy ngi si na sin le, mbur mutoho ɓi nah vuna a muc le.

¹⁷ Da mbur mutoho mingiɓi nah vuna, naŋ da ar siifa aruŋ na, mi ngi mbur vagay anta gi slra ta. Ɓa a sa gi slra na, sey da mbur mutuh naŋ vuna, a muc le far.

¹⁸ Vurˀe, ko jumoˀay mudumbuŋ vuna kwana, ɓa naŋ misa gi slra na, sey pumbus a pi sek le ɗagay.

¹⁹ Dumbuŋ na, Moyis a til mi ti ɓimuɗuva da mizli gar, kaɓa naŋ muluma ar ɓimujuwa. A dirba nah, a wuɗ pumbus ngi ngarihey ati ngi bazuwayaya, lahaɗ ti yam, a kuca da ɗerewol ngi ɓimujuwa vuna waɗ da mizli gar. A kuca ti zana gagaza ngi ngwic ngi tumuŋ waɗ ti mihaŋ ngi izop.

²⁰ A ɓa mizli: «Hana i pumbus ngi jumoˀay, Buymisemuŋ miɓa ɗaˀ le vur kum tuwa.»

²¹ Yo a kuca da guɗuk waɗ da gazlangahay magam taŋ slra ngi huruk huruk a mbuŋ Buymisemuŋ gar ti pumbus tuwa ma.

²² Avu ɓimujuwa mawuɗ na, vendeke ngi gwat gar na, a zuɓaka hiryi naŋ avra ti pumbusu, da pumbus a pi sek le ta na, naɓa pula mungra anta.

Mikuli ngi Kristu a zuɓa mungra avra

²³ Foto ngi gwat migisiŋ gisiŋ ngi muŋhoyo, da muzuɓa dili taŋ avra i mezegwel tayna na, naɓa gwat migisiŋ gisiŋ ngi muŋhoyo, a zlir le mazuɓa dili taŋ i gi mikuli a mbuŋ Buymisemuŋ mimezle.

²⁴ Vur mike na, hay ngi Bumbulvuŋ, Kristu mici anga na, i hay mizli miɗiyaka ti haŋ, yo i foto ngi hay migisiŋ gisiŋ naŋ na ta. Amma Kristu a ci nga muŋ vuna, ɓa a cici deŋ wurenna ar deɗe ndra a mbuŋ Buymisemuŋ.

²⁵ Yo anta ɓa ngi vula vu naŋ ngi gi mikuli a mbuŋ Buymisemuŋ is mbeˀ mbeˀ ta ma. Asi masay madiɗa ngi Yudeheye, vur vi gar na, a ci ceˀ le ng'ar li mipal wãˀa, ti pumbus ngi ginew a haŋ.

²⁶ Da Kristu a ga kanah zleˀe ta na, zle avu ɗuva virzi ngi duniya na, anja a si bonoy le is mbeˀ mbeˀe. Amma naŋ a bugo vu is purla tewle, gweˀ avu kiɗa mi ngi hin, ɓa a susuymo mungra ngi mizli ti gi mikuli a mbuŋ Buymisemuŋ ti hirnga naŋ tehhe a muŋ.

²⁷ Kpak naŋ na, mbur gar a muc pam le is purla, a dirba nah, Buymisemuŋ a gaŋ kiita.

²⁸ Naŋ kine, Kristu kwana, a vula hirnga naŋ ngi gi mikuli a mbuŋ Buymisemuŋ is purla, ɓa ngi zuɓa mungra ngi zigiduw haɗi avra, yo a sa bugo vu is purla sar mucuw naŋ ma, anta ngi zuɓa mungra mata, amma ngi laha mizli makutukokoŋ.