HEBEREY 7 - Bible en langue guiziga

Melkisedek, buy madiɗa, yo i masaya ma

¹ Melkisedek nah na, i buy madiɗa ngi Salem, i masay ngi Buymisemuŋ Mimadiɗa. Ti Abraham mamawa tir vurum, a dirba naŋ mitika ˀay da buy madiɗahay na, Melkisedek a bi, ara ji di hirnga, dar a ɗuwulaŋ mi.

² Abraham a vulaŋ mukuruˀ ngi gwat naŋhay gar. Dumbuŋ na, slimiɗ Melkisedeke, mbiɗeˀvra: «buy madiɗa mijeŋŋe.» Yo ma na, i buy ngi Salem, mbiɗeˀvra: «buy leleŋ.»

³ A sinaka cine ati mumuŋ naŋ ta, ko a sinaka tizer naŋ ta ma. A ɓaka ɓi ngi yi naŋ ati muc naŋ ɗaˀ ta wãˀ si. Naŋ a bam vu ati Mangal ngi Buymisemuŋ. Naŋ a ndir i masay hã ngi sete.

⁴ Puraka ɗi, Melkisedek, mbur madiɗa nah na, Abraham, dideˀ ndra madiɗa, a vula mukuruˀ ngi gwat mimezle, naŋ mulumo di ar vurumo gar da naŋ.

⁵ Dambalaka masayay muboko ti ngi tizer ngi Levi gar na, ɓimujuwa a ɓi: t'ada ti jiviɗ ngi cufuɗa mukuruˀ ngi gwat gar avu mizli Israyeleye. Mbiɗeˀvra: A cufuɗaka avu sukum taŋhay tehhe, dideˀ ngi Abrahamay vuna ya ngbaŋ.

⁶ Melkisedeke, i dideˀ ngi Levi ta ngbaŋ, amma a lum mukuruˀ ngi gwataya le avu Abrahama. Dar a ɗuwula mi da Abraham, mbur Buymisemuŋ miɓaŋ ɗaˀ le vur gwatay, naŋ masa vulaŋ taŋ tuwa jaka.

⁷ Mbur maɗuwul mi na, i madiɗa fineˀ mbur maɗuwulakaŋ mi ti ɗuwulo. Ko ngila mi anta ar nah ta wãˀ.

⁸ Yo dideˀ ngi Levihey malumam mukuruˀ ngi gwat na, taŋ i mizli mamicamay. Amma Melkisedeke, Ɓimutoho a ɓi le njah vurˀe, naŋ anta muc ta.

⁹ Abraham muwurka mukuruˀ ngi gwat naŋhay na, kite Levi vuna a wurka le ya.

¹⁰ Vur ti Melkisedek muru nga ji hirnga ti Abraham na, naɓa Levi, naŋ a kwacay dideˀ naŋ Abraham aruŋ.

¹¹ Gi mikuli ngi levihey na, i ɗuva virzi ngi ɓimujuwa muvulaka da Israyeley. Amma da levihey a gam di i mikuli mijeŋŋe naŋ zleˀe na, i wuɗam masay mekelem angi tizer ngi Melkisedeke, mbak angi tizer ngi Aroŋ ngi mi aruŋ maka?

¹² Asi da gi mikuli a mbuŋ Buymisemuŋ a mbiɗi le na, sey a mbiɗaka ɓimujuwa cummo ya.

¹³ Na mbur, Ɓimutoho maɓi vurˀe vuna, sukwi nga naŋ, naŋ pal, ko muy naŋ masay migi mikuli a mbuŋ Buymisemuŋ anta.

¹⁴ Naŋ kine, i sinaka le kuy kuy wãˀ, Buy ndra Yesu, a ya ka angi sukwi ngi Yuda, Moyis miɓa ɓi ngi masayay ar ɗerewol na, a ɓi vur sukwi ngi Yuda ɗaˀ ta.

Masay mekelem mubam vu ati Melkisedek

¹⁵ Masay mekelem mubam vu ati Melkisedek a bo le, kite ɓi hana a bun hiri le kuy kuy wãˀ ma.

¹⁶ A cifakaŋ i masay na, kaɓa ɓimujuwa ngi mizli masipaka na ta, amma a cifi i masay ti gidaŋ ngi siifa makiɗ mi ta wãˀ.

¹⁷ Vur mike na, Ɓimutoho a ga sedewo naŋ ani: «Ki masay hã ngi sete, kaɓa Melkisedeke.»

¹⁸ Naŋ kanah, ɓi micica misi zleˀe a kiɗ le avra, asi i hĩhĩy, yo slra naŋ anta mata.

¹⁹ Asi ɓimujuwa a gi gwat ani muduba na, anta. Amma wurenna, gwat ngi njaha hiri mimezle vurˀe na, i lumam le, ndra makiraham ng'avu Buymisemuŋ gu na, mbele naŋ.

²⁰ Yo bac nga hirnga nah ma na, Buymisemuŋ a hudum le, asi mizli mekelemey mitiram masayay na, Buymisemuŋ a hudumvur taŋ ta.

²¹ Amma Yesu mitiri masay na, Buymisemuŋ a hudum le vurˀe ɓula, a ɓi: «Bumbulvuŋ a hudum le, naŋ anta mbiɗa mingiɓi naŋ ta: ‹Ki masay hã ngi sete.›»

²² Vurˀe, jumoˀay mimezle gisiŋ gisiŋ na, i sinaka avu Yesu.

²³ Gwat mabiga wãˀ naŋ vuna ma na, ani: mizli mekelemey mitiram masayay na, taŋ zleˀe haɗi, asi mike na, t'anta ndiram caˀa ta, a roko micam.

²⁴ Amma Yesu, naŋ da ndrehhe, gi mikuli a mbuŋ Buymisemuŋ nga naŋ anta mbak le da mbur mekelem ta.

²⁵ Vurˀe, Yesu, mizli makiraham ng'avu Buymisemuŋ tiseˀe na, a ndila le ngi laha taŋ wãˀ ngi sete, asi naŋ da ti siifa ndrehhe ngi tumbulo Buymisemuŋ ar deɗe taŋ.

²⁶ Yesu i masay madiɗa a mbuŋ Buymisemuŋ, ka ndra mawuɗam. Naŋ pal, malambaˀ ati mungra anta ava ta, naŋ wal avu migi mungraˀahaya. Buymisemuŋ a zuɓa le hã nga duba muŋ.

²⁷ N'anta kaɓa masay madiɗa a mbuŋ Buymisemuŋ mekelemey na ta. Gi mikuli vur hin gar, dumbuŋ vur mungra ngi hirnga naŋ, yo vur ngi mizli gar na, naŋ anta ti may ngi gi naŋ ta. A ga nga naŋ le is purla tewle, ti naŋ muvula hirnga naŋ tehhe a muŋ.

²⁸ Bimujuwa ngi Moyise, a cifi masay madiɗahay i mizli hĩhĩyahay. Amma mingiɓi ngi Buymisemuŋ miɓa ti hudum, a dirba ɓimujuwa na, a cifi masay madiɗa, i Mangal mindila le kaslsla wãˀ hã ngi sete.