HEBEREY 6 - Bible en langue guiziga

¹ Vurˀe, gwat mudumbuŋ dumbuŋhoy, ndra mudubunoko taŋ ar ɓi ngi Kristu na, pulukum tayna mbak. Akum nga mbuŋ ti gi gwat ngi mizli njah wãˀ muduba. Anja i mam hirik murdurba ng'ar ɓi ngi ɗuva virzi ngi ɓihey na mata, kaɓa: zila marava ar gi gwat malambaˀhay ati tiɓa Buymisemuŋ,

² dubun ar ɓi ngi ci ar yam ati buca haŋ a hirnga, slikiɗ ngi mizli mumucahay waɗ kiita ngi dirba wãˀ na, ko ndr'anta ɓaka taŋ mata.

³ Akum nga mbuŋ nga mbuŋ, da Buymisemuŋ a pula jiviɗ nah le na, gwat ndra magam i hana so.

⁴ Naŋ kine, gwat magi ta wãˀ ada, kaɓa ani: Mizli micifam le ɗaˀ zleˀe ar li minjahha ngi Buymisemuŋ, gwat muvulo di paɗ a muŋ na, a titilaka le, a jumom le zleˀe ati ˀUf Mipal,

⁵ Ɓimezle ngi Buymisemuŋ waɗ gidaŋ ngi duniya misi tumbuŋ na ma, a titilaka le.

⁶ Gar ti nah kwana, a ndilam le gbaˀ na si. Ɓa a pulaka gwat ngi gi taŋ nah, a mbiɗam ng'avu Kristu a muŋ ma na, a gi ta. Asi kite ara diraka Mangal ngi Buymisemuŋ sar mucuw naŋ avu dum mizlira, yo ara gam gwat ɓa mizli a zakaŋ.

⁷ Hirwuyo, yam ngi vuŋ mago ndrehhe ar naŋ na, da ara saŋ, yo da ara gi gwat kuy kuy da mizli muhuf naŋhaya na, Buymisemuŋ a ɗuwulaŋ mi.

⁸ Amma da hirwuy a zla le, ara pus hadaw ati giziŋ malambaˀ na, ɓa naŋ anta pul gir mata, naɓa Buymisemuŋ a sa nisaŋ gweˀe, angi kiɗa mi naŋ na, a sa wurakaŋ.

⁹ Amma kumo na, yeme ɗuwoy, ko da i ra ɓam kahana tekeɗe kwana, i sinaka le gisiŋ wãˀ, kum angi jiviɗ mezle aruŋ, jiviɗ ngi laha vu.

¹⁰ Asi mike na, Buymisemuŋ naŋ jeŋŋe, slra kum ati wuɗavu kum mibigaka ti slimiɗ naŋ, ti kum mijinaka misikristuhoy zleˀe ati kum mira gaka hã dana aruŋ gar na, naŋ anta puyuk di hirnga ta wãˀ.

¹¹ Amma gwat ndra mawuɗama so na, anja mbur gar a wuzla kumo, a hurdum hirdam kanah ava ma, hã avu kiɗa mi naŋ, ɓa gwat kum manjaham hiri njah vurˀe na, a gi gisiŋ gisiŋ.

¹² Anja ki gam masafaya ta. Mizli masa lumam zlili miɓaka taŋ ɓi nah le ɗaˀ le, asi tiɓi taŋ ati cici taŋ zlak na, i wuɗam na, anja ki sipaka sar taŋ.

Gwat Buymisemuŋ miɓa ɗaˀ le

¹³ Buymisemuŋ miɓa ɓi ngi gwat ɗaˀ le da Abraham na, a hudum ti slimiɗ naŋ vuna tehhe a muŋ, asi mbur madiɗa mifineˀ naŋ, ɓa a hudum ti naŋ na, anta.

¹⁴ A hudum, a ɓi: «Haˀaw, i sa ɗuwuluw mi, i sa ga ɓa ki yi haɗa.»

¹⁵ Abraham a ɓusa, a kutuko ɓi nah le, hã gwat Buymisemuŋ miɓaŋ di ɗaˀ le tuwa, a pura, a gi le.

¹⁶ Da mizli ara hudumom na, a hudumom ti slimiɗ ngi mbur mifineˀ taŋ, yo hudum i gwat migisiŋ makiɗa mi ngi tiri gar.

¹⁷ Mizli masa lumam zlili naŋ miɓa le ɗaˀ le nah, Buymisemuŋ muhudum hidam le na, dambalaka a wuɗ a biga taŋ di njah na, gwat naŋ mujuwa le a mevele na, anta mbiɗa mata si.

¹⁸ Vurˀe, gwatay ada cuw, anta mbiɗam ta wãˀ, Buymisemuŋ, gwat naŋ miɓal le ɗaˀ le ati hudum naŋ na, naŋ anta gi slir ar taŋ ta. Naŋ kine, ndra mizli mupulaka gwatay gar, ɓa i njaham hiri njah ar taŋ na, gwat tayna ara vulam ndra gidaŋ haɗa wãˀ.

¹⁹ Njaha hiri ndra njah nah na, naŋ avu ndra kaɓa gwat ngi dira membezleŋ ngi dumvu ndra dar gidaŋ gidaŋ. A ci sesẽŋ a duba godo ngir hay ngi Bumbulvuŋ a muŋ.

²⁰ Yesu a ci le vur ndra ar li nah dumbuŋ ar ndra si, a ci ngi wãˀ hã ngi sete, asi a tiri masay madiɗa a mbuŋ Buymisemuŋ le kaɓa Melkisedek.»