HEBEREY 5 - Bible en langue guiziga

¹ Naŋ kine, masay madiɗa a mbuŋ Buymisemuŋ gar na, a winakaŋ ti wini a wuzla mizli, ɓa ngi gi slra ngi jumo taŋ ˀay ati Buymisemuŋ. Slra naŋ i gi sedege waɗ gi mikuli a mbuŋ Buymisemuŋ ngi zuɓa mungra ngi mizli avra.

² Mizli magam tir manja sin naŋ ati mingizlam le avu jiviɗe na, naŋ a ndila le ngi sla wala taŋ, vur naŋ vuna kwana, naŋ ti hĩhĩy wal wal gar aya.

³ Asi naŋ misi ti hĩhĩy tuwa na, sey a gi mikuli a mbuŋ Buymisemuŋ vur mungra ngi hirnga naŋ waɗ vur mungra ngi mizli ma.

⁴ Mbur a ca slimiɗ masay madiɗa a mbuŋ Buymisemuŋ da hirnga naŋ tehhe a muŋ gu ta, sey da Buymisemuŋ mizila le, kaɓa naŋ mizila Aroŋ na far.

⁵ Naŋ kine, Kristu mitiri masay madiɗa a mbuŋ Buymisemuŋ na, i naŋ muwuɗ dudok da hirnga naŋ tehhe a muŋ ta. Naŋ mitiri na, asi Buymisemuŋ a ɓaŋ le: «Ki Mangal ɗu, i yuw le dana.»

⁶ Yo a ɓaŋ le ar ɗerewol mekeleme ma: «Ki masay ndrehhe, kaɓa Melkisedek.»

⁷ Ti Yesu misi a ruwuy zleˀe na, a dir dibiɗ, a tumbulo Buymisemuŋ malahaŋ gu tir muco, ti tila mi ti tuwuy a hiri. Buymisemuŋ a cine dira dibiɗ naŋ le, asi naŋ mihin hirnga.

⁸ I Mangal ngi Buymisemuŋ ngbaŋ, ko ti nah gar kwana, a sirka cinami le ti bonoy naŋ misa gar.

⁹ Naŋ mitiri manja hereweɗ so na, mizli macinakaŋ mi gar na, a tiri le i buy milih taŋ hã ngi sete.

¹⁰ Naŋ kine, Buymisemuŋ a ɓa le njah: Yesu i masay madiɗa a mbuŋ Buymisemuŋ kaɓa Melkisedek.

Ji lesl, vur pula tiɓi

¹¹ Ndrˀada ti mingiɓi ngi ɓi haɗi ar ɓi hana. Amma naŋ tuwaˀ ɓa ngi bugukum mbiɗeˀvra naŋhaya. Asi kum anta slaka wala ngi ɓi kwaŋ kutum ta.

¹² Anja kum i mudubuna gwatay da mizli zlezle si, amma ani, ki roko wuɗam ɓa a dubunukum gwat mudumbuŋ dumbuŋhoy ar zlivirzi ngi mingiɓi ngi Buymisemuŋ aruŋ na si. Kum ti may ngi ɗuwa aruŋ, mbak ngi ɗaf ngi mizli micawwahaya le.

¹³ Mbur masi ɗuwa na, i zuŋ meciɗek aruŋ, naŋ anta sla wala ngi gwat mijeŋŋe gu ta.

¹⁴ Ɗafa, i gwat ngi mizli mitiram mizli le. Taŋ a sirkaka sli wala ngi gi gwat mezle ati malambaˀa le.