HEBEREY 4 - Bible en langue guiziga

¹ Buymisemuŋ a ɓa ndra le ɗaˀ le, i sa cam ng'ar li muskavu naŋ. Jukum lesl so, anja ko mbur pal a wuzla kum a ɓi: a ndila ngi ci ng'ara ta na, anta.

² Asi i cinam di i Ɓimezle mupurla ka nga taŋ na ya. Amma mingiɓi, taŋ micinaka na, a jina taŋ ko neˀ ta wãˀ. Vur ti taŋ micinaka na, a tiɓaka ta.

³ Ndra mizli mitiɓam le na, i sa cam ng'ar li muskavu, Buymisemuŋ miɓa tuwa, a ɓi na: «Angi ya mislikiɗ himaˀ na, yi hudum, yi ɓi: Tˀanta sa cam ng'ar li muskavu ɗu ta ndiɗaˀ.» Ko ti slra naŋ mikiɗ mi zle ti naŋ miga duniya na kwana, ara ɓa na si.

⁴ Asi a ɓam ar Ɓimutoho vur hin mitarnaˀ naŋ na: «Angi hin mitarnaˀ naŋ na, Buymisemuŋ a musuk vu le avu slra naŋ gar.»

⁵ Yo a ɓam ar ɗerewol mekeleme ma na: «Tˀanta sa cam ng'ar li muskavu ɗu ta ndiɗaˀ.»

⁶ Vurˀe, mizli mudumbuŋhoy micinaka Ɓimezle na, a cam ng'ar li muskavu ta, asi a cinaka mi da Buymisemuŋ ta. Na kwana, jiviɗe, naŋ da baŋ aruŋ vur mizli mekelemeye, ɓa a cam.

⁷ Vurˀe, Buymisemuŋ a ɗuv hin mekelem le pal ma, a zilaka «dana.» Vi haɗi a dirba nah, Buymisemuŋ a ɓa ɓi ngi hin nah le zleˀe si, ti balam Davit angi ɗerewol: «Dana, da kum micinam ˀay ngi Buymisemuŋ le na, anja ki tiram ti hirnga kumo gidaŋ ta.»

⁸ Asi mike na, da Zozuwe a ci ti mizli le ng'ar li muskavu ngi Buymisemuŋ zleˀe na, naɓa Buymisemuŋ anta ɓi ɓi ngi hin mekelem pal mata.

⁹ Naŋ kine, hin ngi muskavu mekelem ada pal, Buymisemuŋ miwi di vu hĩˀĩ da mizli naŋhay.

¹⁰ Vur mbur gar mici le ng'ar li muskavu nah na, a zla muska vu avu slra naŋ le, kaɓa Buymisemuŋ mumusuk vu avu nga naŋ na ya.

¹¹ Da kine na, tumukum vu so, ɓa i cam ng'ar li muskavu nah, ɓa cine mi taŋ ta nah na, a hizigiɗ mbur purla ng'ar mungra ka taŋ vuna ya ta.

¹² Vur mike na, mingiɓi ngi Buymisemuŋ, naŋ titiri, naŋ ti gidaŋ haɗa. A zum raɓ raɓ, fineˀ maslalam gar mazum ti ka ti ka. A ci sesẽŋ ngbasl, hã a wuɗka wala ngi membezleŋ ati musuɗuk ngi dumvu ndra, yo hirzlik ngi vuhoy ati muzuzur ngir tesleye. A sla wala ngi may gwat ndra ati wuluk ngir mevel ngi mburo.

¹³ Ko gwat pal maɗum a mihiri ngi Buymisemuŋ gu, anta. Gwatay, naŋ miga taŋ gar na, taŋ ngurɗaɗ, cikislaɓ a mihiri naŋ. Gwat ndra migaka gar na, i sa slufaka da Buymisemuŋ cummo.

Yesu i masay madiɗa a mbuŋ Buymisemuŋ

¹⁴ Tiɓi ndra matilam di mi na, sey i jaka gidaŋ gidaŋ. Vur ndr'ada ti masay madiɗa a mbuŋ Buymisemuŋ, i Yesu Mangal ngi Buymisemuŋ. Naŋ a ngira muŋ le ŋcaht sesẽŋ avu Buymisemuŋ.

¹⁵ Asi mike na, masay madiɗa a mbuŋ Buymisemuŋ ndra, a ndila le ngi si bonoy asi hĩhĩy ndra. Vur a zlir ti tikiney le wal wal haɗi kaɓa ndra vuna ya, amma naŋ a gi mungra ko neˀ ta.

¹⁶ Vurˀe, kuruhukum manja zluwun ng'avu janga ngi Buymisemuŋ na so, li gimezle naŋ a diga, ɓa a pura ndra ˀircece, a ga ndra mezle, yo ɓa a jina ndra tapas naŋ muwuɗ le gar.