HEBEREY 3 - Bible en langue guiziga

Yesu a funa Moyise le

¹ Vurˀe, kum sukum ɗu misikristuhoy, Buymisemuŋ muzulukum na, puram hiri ng'avu Yesu, naŋ mislin, yo masay madiɗa a mbuŋ Buymisemuŋ ngi tiɓi ndra manjikaka na.

² Naŋ kine, Yesu, naŋ a gi teŋteŋ wãˀ avu Buymisemuŋ micifaŋ na, kaɓa Moyis migi teŋteŋ ar hay ngi Buymisemuŋ gar na ya.

³ Mbur mindira haya, a ɗuvakaŋ hirnga haɗi, fineˀ hay naŋ mindira vuna ta kwa? Naŋ kanah ya, Yesu a ndila le ngi lum dudoko fineˀ ngi Moyise.

⁴ Naŋ kine, hay gar na, mindir naŋ ada. Amma gwatay gar na, mindira taŋ i Buymisemuŋ.

⁵ Moyise, naŋ a gi gawla miteŋteŋ ar hay Buymisemuŋ gar na, ɓa ngi ga sedewo ngi ɓi masa ɓaka nga mbuŋ gar.

⁶ Amma Kristu, naŋ i Mangal miteŋteŋ ar hay ngi Buymisemuŋ gar. Da ndr'anta zluwunam ta, yo da i ra jijaham asi gwat ndra manjaham hiri aseˀe na, naɓa ndr'i hay naŋ.

Li muskavu Buymisemuŋ miɗiya da mizli naŋhay

⁷ Vurˀe, ˀUf Mipal a ɓi na: «Dana, da kum micinam ˀay ngi Buymisemuŋ le na,

⁸ anja ki tiram ti hirnga kumo gidaŋ, kaɓa ti hin kum mislikiɗam ɓi ava zleˀe, a wuzlaɓuh mikirɗak kirɗak, ɓa ki cam a kwacay naŋ na ta.»

⁹ Adiga: «Dideˀ kumoy a cam le a kwacay ɗu, ɓa a purikiy, yo a puraka gwat ya miga taŋ gar,

¹⁰ angi vi kukur mufaɗ na le ngbaŋ. Vurˀe, yi slikiɗ himaˀ ar mizli tayna, dar i ɓi: A ra zizam ndrehhe ar wuluk ngir mevel taŋ. Mizli tayna, a lumaka jiviɗ ɗu ta.

¹¹ Angi ya mislikiɗ himaˀ na, yi hudum, i ɓi: Tˀanta sa cam ng'ar li muskavu ɗu ta ndiɗaˀ wãˀ.»

¹² Vurˀe, sukum ɗuwoy, jam lesl, anja mbur a wuzla kum a ndir ti mevel malambaˀ ta, yo anja a ndir hirnga gidaŋ, ɓa a gwahakaŋ avu Buymisemuŋ misi ti siifa na ta.

¹³ Da ara ɓaka ɓi ngi «dana» hana aruŋ na, vulam gidaŋ ar wala kumo hin gar, ɓa ko wa gar ar wala kumo, anja mungra a gaŋ gilaw ɓa a tiri ti hirnga naŋ gidaŋ ta.

¹⁴ Naŋ kine, ndr'i gam slra wurenna jom ati Kristu, na gwat purla ani: ndra mupulakaŋ vu ndra mbak, zle angi zlivirzi naŋ na, sey da ndr'ada zlak gidaŋ gidaŋ ara far, hã vu kiɗa mi naŋ. A tohoko na:

¹⁵ «Dana, da kum micinam ˀay ngi Buymisemuŋ le na, anja ki tiram ti hirnga kumo gidaŋ, kaɓa ti hin kum mislikiɗam ɓi ava na ta.»

¹⁶ Naŋ kine, mizli micinam, yo mizlaka slikiɗa ɓi vuna i waniyka? I mizli gar muboko ti ngi hirwuy Ezipte mbele Moyis na ta kwa?

¹⁷ Yo angi vi kukur mufaɗ, Buymisemuŋ mislikiɗ himaˀ vuna ar waniyka? Ar mizli migam mungra, mindilam, mumucahay ɓaˀ ɓaˀ a wuzlaɓuh mikirɗak kirɗak na ta kwa?

¹⁸ Yo Buymisemuŋ muhudum, miɓi: Tˀanta sa cam angi li muskavu naŋ na ta na, a ɓi vuna vur waniyka? A ɓi vur mizli mislikiɗa ɓi tayna ta kwa?

¹⁹ Ndra mupuraka, taŋ micam gu ta na, asi hirnga taŋ migidaŋ na.