HEBEREY 13 - Bible en langue guiziga

Gwat macira hiri da Buymisemuŋ

¹ Ndiram ti wuɗavu ar wala kumo, kaɓa sukumuŋ misikristuhoy.

² Tuɓam mulakay a hay kumoyo, anja ki puykom hirnga ta. Mbele tiɓi mulakay na, mizli mekelemey a tiɓam modrohoy le a hay taŋhaya, manja a sinakaŋ.

³ Wulkam angi mizli muroko angi dangaya, kaɓa kum angi dangay ati taŋ ya. Wulkam ar mizli muroko sam bonoyo, kaɓa ki ra sam bonoy ati taŋ ya.

⁴ Anja mbur a pura ɗuvavu ngi zil ati ngwasa, i gwat mupuɗaw. Anja zil ati ngwas a ndiram teŋteŋ ar wala taŋ. Asi sulomehey ati migi madamahaya, Buymisemuŋ a sa ga taŋ kiita.

⁵ Angi gwat ngi gi kum gar na, anja may dala a funukum gidaŋ ta. Kum mumulom ti gwat misi ada asi haŋ kumo. Vur Bumbulvuŋ ti hirnga naŋ a ɓi: «Y'anta sa puluw ta, y'anta sa hiziguw fuk ta.»

⁶ Vurˀe, i ɓam gu manja zluwuno: «Bumbulvuŋ i mijiniis asi ya, y'anta sa zluwun ti gwat neˀ ta. Mbur titra a giy mi gu ka?»

⁷ Wulkam keŋ angi mizli micawwa kumoy mubugukum jiviɗi, mutulukum mi ti ɓi ngi Buymisemuŋ na, Cifi taŋ ar siifa a sa kiɗ mi mbrike na! Sipaka tiɓi taŋ na.

⁸ Yesu Kristu, naŋ da nga naŋ nga naŋ, ngi dambu, dana, naŋ da kanah hã ngi sete.

⁹ Anja ki pulaka vu kumo, ɓa sukwi ngi dubun nawaya wanahayka gar a zuzukum ta. Naŋ kuy, ɓa mevel a lum gidaŋ ti gimezle ngi Buymisemuŋ ɓula, amma anta ti gwat ngi zum ta. Asi mizli masipam ɓi ngi «hana i ngi zum malla hana i ngi zum ta» na, a lumam di pula gir ɗaˀ ta.

¹⁰ Ndrˀada ti li gi mikuli a mbuŋ Buymisemuŋ, amma Yude masayay magam slra a hur guɗuko, t'anta ti jiviɗ ngi zuma gwat ngir li gi mikuli a mbuŋ Buymisemuŋ nah ta.

¹¹ Masay madiɗa aru ti pumbus ngi gineweye ng'ar li mipal wãˀa, ɓa a gi di mikuli ngi zuɓa mungra ngi mizli avra. Amma vagay ngi ginew tayna, a zlumaka taŋ a duba gala.

¹² Vurˀe, Yesu kwana, ɓa ngi zuɓa mungra ngi mizli avra ti pumbus nga naŋ na, a muc a duba gala.

¹³ Bukum, i ra jam di hirnga a duba gala so, ɓa i ɓusaka hina hirnga ka nga naŋ na.

¹⁴ Vur walahay ndra madiɗa, ndra misi anga a ruwuy aka na, naŋ anta ndir hã ngi set ta, amma i ra sipam walahay masa ndilo ndra tumbuŋ.

¹⁵ Hunumukum Buymisemuŋ ndrehhe, kaɓa i gi mikuli ndra tisi Yesu, mbiɗeˀvra: zila slimiɗ naŋ ti mingiɓi ngi balam ndra.

¹⁶ Gi mezle ati jini vu ar wala kum na, anja ki puykom di hirnga ta, asi misi kahana i gi mikuli a mbuŋ Buymisemuŋ macira hiri da Buymisemuŋ.

¹⁷ Cinaka mi da mizli mabugukum jiviɗe, yo hinam hirnga a mbuŋ taŋ. Asi t'anta hinjam ta hĩˀĩ vur ɓi ngi musuɗuk kumo. Asi mike na, a sa slufaka ɓi slra taŋ da Buymisemuŋ. Naŋ kanah, cinaka taŋ mi, ɓa a gaka slra taŋ ti mumul, anja ti niˀic ta. Da kanah ta na, ko gwat ngi sa pulukum gir, anta ara ta.

¹⁸ Diram dibiɗ ndrehhe vur ndra. Asi ndr'i sinaka le gisiŋ, mevel ndra i mezleŋ, i wuɗam gwat ngi gi ndra gar na, a ndir mezleŋ.

¹⁹ I ra hurdum ti gukum ambuh ambuh kum, tumbuloko Buymisemuŋ, ɓa a puliy jiviɗ ngi mi kutum ng'avu kumo.

Diradibiɗ

²⁰ Buymisemuŋ mavul zuy, mislikiɗa Buy ndra Yesu, mijigin madiɗa ngi tumuŋhoy ti wuzla mumucahay ti pumbus ngi jumoˀay ngi sete na,

²¹ anja a tiri ti kum wirwir ngi gi gwat mezle, naŋ mawuɗ gar. Gwat maciraŋ hiri na, anja a ga a hur ndra tisi Yesu Kristu, mizli mavulakaŋ dudok hã ngi set na. Amin!

Kiɗa mi ngi ɓi ati ji haŋ

²² Sukum ɗuwoy, ambuh ambuh kum, ɓusaka mi ngi vula gidaŋ hana. Na zle, mingiɓi ya mutuhukum di vuna, naŋ tororo ta.

²³ I wuɗ ɓa ki sinaka, a pulaka sukum ndra Timote le tir dangaya. Da a ndilo le kutum na, i sa ram cuwa nga purukumo.

²⁴ Jaka haŋ da mizli mabugukum jiviɗe, waɗ da mizli ngi Buymisemuŋhoy gar. Sukum ndra ngi Italihey ara jukum haŋ.

²⁵ Anja Buymisemuŋ a gukum mezle, gar kumo.