HEBEREY 10 - Bible en langue guiziga

¹ Ɓimujuwa ngi Moyise, anta biga gwat migisiŋ gisiŋhey na ta. Naŋ i susuɗuk ngi gwat mezlehey masa ndiloko. Mizli makirohoko ng'avu Buymisemuŋ na, ko ti mikuli mupurlahha makiɗ mi ta, magaka vur vi gar na tekeɗe kwana, ɓimujuwa a ndila ɓa a ɗiya taŋ fetek feteke gu ta.

² Mizli madilkam a mbuŋ Buymisemuŋ ti jiviɗ kahana, da mevel taŋ a biga taŋ di le, mungra anta vu taŋ ta na, anja gi mikuli a mbuŋ Buymisemuŋ anta zleˀe mata?

³ Amma vur vi gar na, gi mikuli a mbuŋ Buymisemuŋ tayna ara ka taŋ mumuyuŋ zay sla a slimiɗ, ɓa a puykam hirnga ti mungra taŋhaya ta.

⁴ Asi pumbus ngi gusoŋ ati ngi bazuwayaya, a zuɓa mungra ngi mizli avra gu ta wãˀ.

⁵ Vurˀe, hirak ɓa Kristu maco ng'ar duniya na, a ɓa Buymisemuŋ: «Mikuli ti ginewey ati sedegehey na, ki wuɗ taŋ ta, dar ki ndiriy dumvu.

⁶ Ginewey mazlumukuw taŋ zlam zlam wãˀ ati mikuli ngi pula mungra gar na, a cirukuw hiri ta.

⁷ Joˀ yi ɓi: «Aw Buymisemuŋ, yi so le, ɓa i ga gwat ka mawuɗo, ka taŋ mutohoko vur ya angi ɗerewol muvuku vu taŋ na.›»

⁸ A ɓi dumbuŋ na: «Mikulihey, sedegehey, ginew mazlumaka taŋ ati mikuli ngi pula mungra gar na, ki wuɗ taŋ ta, anta cirukuw hiri ta.» Na, a gaka mikuli tayna vuna kaɓa ɓimujuwa maɓa ngbaŋ.

⁹ Dar a ɓi ma: «Y'ani, i so le, ɓa i ga gwat ka mawuɗo.» Buymisemuŋ a susuymo mikuli magalahaya le gar, a ci ngi Kristu ar deɗe taŋ.

¹⁰ Yesu Kristu muzuɓa mungra ndrahay avra ti mikuli, naŋ miga is purla ti dumvu naŋ na, a gi di i gwat Buymisemuŋ muwuɗu.

¹¹ Masay gar na, a ndir deŋ ti deŋ vur hin gar ngi ga slra naŋ. A vul di i gwat ngi gi mikuli a mbuŋ Buymisemuŋ misi purlahha ndrehhe. Gwat ngi gi mikuli a mbuŋ Buymisemuŋ tayna, anta zuɓaka mungra ngi mizli avra gu ta ndiɗaˀ.

¹² Kristu miga mikuli vur mungra ngi mizli is purla na, a dirba nah, a cifi tir vay hazum ngi Buymisemuŋ hã ngi sete.

¹³ Mindiraŋ wurenna, sey kutuko Buymisemuŋ masa pa mesene naŋhay asi sar naŋ, ar deɗe ngi gwat ngi ɗuva sar.

¹⁴ Naŋ kine, sedege naŋ miga is purla na, mizli, naŋ mazuɓa mungra taŋhay avra na, a ɗiya taŋ le hã ngi sete.

¹⁵ ˀUf Mipal kwana, a ɓa ndra di le njah, asi dumbuŋ na, a ɓi:

¹⁶ «Jumoˀay ɗu, ya masa jum ati taŋ, a dirba hin tayna na, anihĩ: Bumbulvuŋ a ɓi: Ɓimujuwa ɗu, ya masa vula taŋ di na, i sa ca taŋ di a mevel taŋ, i sa toho taŋ di toh toh ar lesl taŋ.

¹⁷ Mungra taŋhay ati malambaˀ taŋhaya, y'anta sa wulka ɓi nah mata.»

¹⁸ Naŋ kine, da mungra i mupula le na, anta gam sedege vurˀe mata.

Kuruhukum ng'avu Buymisemuŋ

¹⁹ Naŋ kine, sukum ɗu misikristuhoy, i lumam jiviɗ le baŋ wãˀ ngi ci ng'ar li mipal wãˀa, mbele pumbus ngi Yesu.

²⁰ A wuna ndra jiviɗ nawaya le, maru ti ndra ng'ar siifa, a duba godo, mbiɗeˀvra: dumvu naŋ.

²¹ Ndrˀada ti masay madiɗa a mbuŋ Buymisemuŋ, micifa le, i madiɗa wãˀ ar hay ngi Buymisemuŋ.

²² Vurˀe, kuruhukum ng'avu Buymisemuŋ, ti mevel mezle so, ti tiɓi migisiŋ gisiŋ, ti mevel mubuna le avu wuluk malambaˀ gar, ti dumvu mubuna le ti yam mipal

²³ Anja i giram ta, ndra tulukum mi ti ɓi ndra manjaham hiri aseˀe na, asi Buymisemuŋ, gwat naŋ miɓa le ɗaˀ le gar na, naŋ teŋteŋ araŋ.

²⁴ Anja mbur gar a ki slimiɗ ar cala, ɓa i lumam gidaŋ ngi wuɗavu ati ngi gi mezle.

²⁵ Anja i pulaka ru ar cikil ndraˀahaya, kaɓa mizli mekelemey misirkam le, maram mata na ta. Amma jom ti kum mapuraka hin ngi Buymisemuŋ mandilo gweˀ na, vulukum gidaŋ ar wala ndra.

²⁶ Ndra misinaka ɓi mikaslsla le, a dirba nah, da i ra gam mungra waˀwaˀ na, naɓa gi mikuli a mbuŋ Buymisemuŋ mekelem pal vur mungra, anta mata.

²⁷ Amma sey zluwun ti kutuko kiita ati vu mihilɓiɓ masa zuma mesene ngi Buymisemuŋhoy na tewle.

²⁸ Ɓimujuwa ngi Moyise, da mbur mingila le, yo da mizli cuw malla makir a gam sedewo le na, a kiɗaka mbur nah vagay, manja puraŋ ˀircece.

²⁹ Mbur makirpa Mangal ngi Buymisemuŋ, magi lambaˀ ti pumbus ngi Yesu mipa ngi jumoˀay, naŋ muzuɓaŋ mungra naŋ avra ti naŋ, yo a za ˀUf Mipal, magi mezle na ma na, mbur nah a sa lum bonoy mihimaˀ kuyta wãˀ ta jak kwa?

³⁰ Naŋ kine, mbur miɓi ani na, i sinaka le: «Mapul cuwal i ya, mawurka mungra i ya.» Yo a ɓi ma: «Bumbulvuŋ a sa ga kiita da mizli naŋhaya.»

³¹ Diɗ asi haŋ ngi Buymisemuŋ misi ti siifa na, kay a gi zluwun mukuy ta wãˀ.

³² Ɓi migi avu kum zlezle zleˀe na, wulkaka keŋ ɗagay: Kum mulumam li minjahha lum si na, a dirba nah, kisam bonoy le haɗa, yo ki gam vurum madiɗa le.

³³ A zaka mizli kumoy mekelemeye le a wuzla mizli, a sipaka taŋ le nder nder. Yo mizli kumoy numuŋhoyo kwana, a vulaka gidaŋ le da mizli masam bonoy kanah tuwa.

³⁴ Asi mike na, kisam bonoy le jom ati mizli mijaka taŋ ng'ar dangay na, yo ki tiɓaka le ti mumul, ɓa a tiɓaka zlili kumoyo gar. Vur ki sinaka le, kum ada ti zlili mimezle mazik hã ngi sete.

³⁵ Cici kum mizlak gidaŋ gidaŋ na, ki pulaka ta, kisa lumam migir haɗa aseˀeŋ.

³⁶ Kum ti may ngi ɓusa ɓi, ɓa ngi gi gwat Buymisemuŋ mawuɗo, yo ɓa kahana so na, kisa lumaka gwat naŋ miɓa le ɗaˀ le na.

³⁷ Asi mike, a tohoko na: «Asi a ndir neˀkini, a ndir mata, mbur masa sawa tuwa, a sa sawa, naŋ anta sa mur mata.

³⁸ Amma mbur ɗu mijeŋŋe na, a sa ndir ti siifa tisi tiɓi. Amma da a mi le nga durba na, membezleŋ ngi dumvu ɗu anta sa mumul vurˀe ta.»

³⁹ Ndra, ndr'i mizli mamam nga durba, ɓa nga zizi na ta. Amma ndr'i mizli matiɓam ngi laha musuɗuk ndrahay.