HEBEREY 1 - Bible en langue guiziga

Ɓi ngi Buymisemuŋ, Mangal naŋ miɓa

¹ Zleˀe na, Buymisemuŋ a ɓa dideˀ ndraˀahaya le, is mbeˀ mbeˀe, ti jiviɗ wal wal haɗi, a cinaka ɓi nah baɗ avu mijiviɗ naŋhay.

² Amma angi hin ngi dirba muwãˀ ndra misi anga hana na, mingiɓi ngi Buymisemuŋ, i cinaka baɗ avu Mangal naŋ. Buymisemuŋ a cifaŋ i buy ngi gwatay gar, yo a ga duniya ti seˀe ma.

³ Mangal nah na, i wucuɗ ngi dudok ngi Buymisemuŋ, Buymisemuŋ, naŋ kahana kahana na, a bugo di le wãˀ. Yo majaha gwatay gar na, i naŋ ti mingiɓi naŋ migidaŋ. A dirba naŋ mubuna mungra ngi mizli avra na, a cifi a muŋ tir vay hazum ngi Buymisemuŋ migidaŋ wãˀa.

Mangal ngi Buymisemuŋ a funa modrohoyo le

⁴ Mangal ngi Buymisemuŋ, a tiri madiɗa le fineˀ modrohoyo wãˀ. Vurˀe, Buymisemuŋ a caŋ slimiɗ mupuɗaw haɗi fineˀ nga taŋ.

⁵ Asi mike na, Buymisemuŋ miɓi angi Ɓimutoho: «Ki Mangal ɗu, i yuw le dana» na, Ko a ɓi vur modrohoyo ɗaˀ kahana ta. «I sa tiri Cine naŋ, naŋ kwana, a sa tiri Mangal ɗu» na, a ɓa taŋ ɗaˀ ta ma.

⁶ Yo ti Buymisemuŋ mawuɗ ɓa a slino Mangal naŋ modogom ng'ar duniya na, a ɓi: «Anja modro ngi Buymisemuŋhoy gar a dilkam a mbuŋ naŋ.»

⁷ Buymisemuŋ a ɓi vur modrohoyo na: «I tiri himiɗ ti modro ɗuwoyo, yo i tiri irne vu ti migi slra ɗuwoyo.»

⁸ Amma a ɓi vur Mangal naŋ na: «Aw Buymisemuŋ, janga ngi Zumabuy ɗike, a ndir hã ngi samadin. Ki sa Zumabuy ɗike ti gi kiita jeŋ jeŋ.

⁹ Ki wuɗ ɓi mijeŋŋe, ki hirsa ɓi malambaˀa. Aw Buymisemuŋ, Buymisemuŋ ɗike, mupuw mal ngi vula slra na vurˀe. A puw mumul kaɓa mal a hirnga ɗike. I mal mavul mumul, fineˀ ngi cil ɗikeye.»

¹⁰ Yo Buymisemuŋ a ɓi ma na: «Aw Bumbulvuŋ, muɗuva virzi ngi hirwuy, zle angi zlivirzi naŋ i ka. I ka miga muŋ ti haŋ ɗiki.

¹¹ Gwat tayna gar a sa kiɗam mi. Amma ka, k'ada ndrehhe. Haˀaw, taŋ gar a sa gam magala kaɓa zana.

¹² Ki sa fuɗa taŋ kaɓa mafuɗam godo. Haˀaw, a sa mbiɗam kaɓa zana. Amma ka, k'ada ngi ɗik ngi ɗik ndrehhe, yo vi ɗike, anta sa kiɗ mi ta ndiɗaˀ wãˀ.»

¹³ Buymisemuŋ ɓa a ɓi: «Cifi joˀ tir vay hazum ɗu, hã ɓa yi hina mesene ɗikey asi sar ɗike, ar deɗe ngi gwat ngi ɗuva sar» na, ko a ɓi vur modro naŋhaya kahana ɗaˀ ta ndiɗaˀ.

¹⁴ Modrohoy vuna gar i musuɗukoy, yo a gam slra ngi Buymisemuŋ maslina taŋ ngi jina mizli masa lumam lih na ta kwa?