HABAKUK 2 - Bible en langue guiziga

¹ Slra ɗu ngi jigina mizlingreŋ na, i sa ga kuy kuy, i sa ndir deŋ ti deŋ a ciki gala, I sa jiɗa li, ngi cine Buymisemuŋ masa ɓi ar ya, yo vur cufuɗ ɗuwoyo, da yi sa mbiɗaŋ di ka wanaka na.

Buymisemuŋ mimbiɗa mingiɓi naŋ: mbur mijeŋŋe ati muguzuvura mizli

² Bumbulvuŋ a mbiɗiy mi, a ɓiy na: «Gwat ka mupura ti kleŋ na, toho toh toh, yo mbiɗeˀvra naŋ, toho nguɗ nguɗ ar belelerey, ɓa mizli a slufaka calala,

³ asi gwat ka mupura ti kleŋ na, hin naŋ i manja sli aruŋ. Naŋ gweˀ ngi kiɗa mi, anta sa gi slir ta. Da ki puraka le kaɓa ara mur na, kutukokoŋ, asi a sa ndilo gbaˀa, ko anta mur ta.

⁴ Pura, n'ani zlokoko ti huhumo vu naŋ na a diga, a si na gi gwat ti mevel purla ta, amma mbur mijeŋŋe, a ndir ti siifa mbele gi teŋteŋ naŋ.

⁵ Gisiŋ gisiŋ, mbaazla i mitikina vu, mbur mahuhum vu, anta musuk vu neˀ le ta ndiɗaˀ, a wuna mumburloko boŋ kaɓa vigiɗ ngi dika mizli, anta mbi ta wãˀ kaɓa mucu. A kuso sukwi ngi mizli le gar nga ciki naŋ, a ɗiɗo mizli le gar ng'avaŋ.

⁶ Amma mizli mujoko taŋ na, a sa jumom gar taŋ, a sa gaka taŋ mi ngi sliŋ ta sukwa? A sa ɓam: «Kum mandiram ar li kuso zlili haɗa ti hulo gwat ngi mizli na, hã ti vunaka? Kay kum ar bonoy! Na ki kusom di i duvus mifineˀ hirnga kum.

Ɓi ngi mendere

⁷ Mizli kum midindilam duvus avu taŋ vuna, a sa puɗukom, a sa ndiloko gurjik avu kumo, a sa gunjuɗukum takwa? Taŋ kwana, a sa tuɓukum gwat kumoyo ya.

⁸ Ki tiɓam gwat ngi sukwi ngi mizli le haɗa, is ngi mizli a sa tiɓaka ngi kumoyo ya. Asi ki pam pumbus ngi mizli le, ki gam moˀore le asi ruwuyo da walahay madiɗaŋ waɗ da mizli ngi raˀahay.

⁹ Kum malumaka migir da hay kumoyo ti slir, ɓa ngi luuma li cifi ngi mizli madiɗahay, ngi girjaha bonoyo kileŋ avra na, kay kum ar bonoy!

¹⁰ Gwat kum mawuɗam gi naŋ hana, i ngi pi mesem da hay kum: ngi ngizla mizli ti vendeke, yo ɓa ngi ziza hirnga kum tehhe a muŋ.

¹¹ Ko ɗugur ngi dalamay kwana a sa wudam ti kum, yo mbal ngi jaha hayay a sa mbiɗaka taŋ mi.

¹² Kum mandiraka walahayay ar pumbus ngi mizli, yo kum maɗuvam walahay madiɗa ti gi malambaˀ madiɗa na, kay kum ar bonoy!

¹³ Vurˀe, Bumbulvuŋ misi gidaŋ wãˀa, a ga slra naŋ ani: slra ngi mizli magaka a kiɗ mi ng'ar vu, sukwi ngi mizli a gam hirdam hirdam ngatara.

¹⁴ Asi si na dudok ngi Bumbulvuŋ, a sa naha hirwuyo kaɓa yam manaha mubuliy.

¹⁵ Kum mavulaka gwat ngi si da mizli migweˀ ngi vu kumoyo lahaɗ ti slalak ngi lugo vu, hã a wa mburo duwlak, a cuko zana, ɓa mizli a singiram ar naŋ migulndiŋ kine na, kay, kum ar bonoy!

¹⁶ Kumo, anja ki mbam ti dudok jak ma na, i mesem makuɗukum ɓaˀ ɓaˀa. Wurenna kumo kwana, wam duwlak duwlak, pulaka vu kumoyo gulndiŋ gulndiŋ kine ya. Sikiɗ ngi himaˀ Bumbulvuŋ mavula na, a sa mbiɗi ng'ar kum, a dirba kum mulumam dudok le na, busukum ngivi dangwal kumoy a sa ndilam.

¹⁷ Gisiŋ, moˀore kum migaka a Libaŋ na, a sa mbiɗi nga hirnga kum. Gwat misahmihey kum mingizlaka taŋ na, a sa kuɗukum, vur kum mipaka pumbus ngi mizli, kum migam moˀore asi hirwuy, ar walahay madiɗa waɗ da mizli ngi raˀahay gar na.

¹⁸ Misina ɗiya gwatay, maɗiyam kuli miciɗa ti ciɗey, malla mipa ti pi ngi dubuna gwat mijeŋ ta da mizli na, a pul gir ngi mike? Misina ɗiya gwat tayna, a pulaka mevel taŋ da kuli mingbimmehey, taŋ miɗiyaka taŋ tihaŋ taŋ na, vur mike?

¹⁹ Misliŋvu miɓaˀ a ruwuyo ki ɓakaŋ: «Slikiɗi.» Malla ɗugur muro lek leke, ki ɓakaŋ: «Puɗuku.» A dubunukum gwat gu kwa? Da ko naŋ sirit ti ɓiri tapasl tapasl malla ti ɓiri bara kwana, ko musuwun fiɗek anta avu taŋ ta na si.

²⁰ Amma Bumbulvuŋ a ro ar hay naŋ mipal. Hirwuy kurzluˀ gar a taˀa mi le siriw a ciki naŋ!»