HABAKUK 1 - Bible en langue guiziga

¹ Hana i mingiɓi, Bumbulvuŋ minjika da mijiviɗ Habakuk, ɓa ara til di mi.

Mijiviɗ maka zil da Buymisemuŋ ɓa a kilo widi naŋ

² Aw Bumbulvuŋ ɗu, ya maziluw ɓa ki kilo widi ɗu na, a nduluw takwa? Ani ki cine ta. I ziluw asi mizli ara gikiy moˀore, ani k'anta lih vu ta ma.

³ Ki bigiy malambaˀ ɗu na, ɓa i pura vur mike? Ki wuɗ ki pura maguzuvuram vu na kwa? A ciki ɗu, sey i ngizla vu ati moˀore tewle, da ara gam kiita na, tiri a gi wuwwo.

⁴ Mbak ko a gam slra ti ɓimujuwa mata, ɓi mikaslsla anta bo mata wãˀ. Mbur misi moˀore a cici lak lak avu mbur mijeŋŋe, mbak a juwaka mbur mijeŋŋe kaˀ kaˀ laŋ ti kiita.

Buymisemuŋ mimbiɗami ngi ɓi naŋ: Babiloŋ mitiɓa li

⁵ Bumbulvuŋ a ɓi na: «Puraka gwat magi a wuzla sukwi ngi mizli, anja a gukum welele! Asi zle wurenna, mbur a wuɗ a gi gwat ti gi, ani da ara ɓukum di na, kum anta tiɓaka ɓi nah ta.

⁶ Puraka, y'ani i bo ti mizli Babiloŋhoyo le ɓuyoh, taŋ i mizli manja ircecehey, yo misi moˀorehey ma. A gunoko ruwuyo hã a ram kileŋ, ɓa ngi tiɓa li misi inga taŋ ta.

⁷ A gam zluwun, yo a muɗam didak da mbur ma. Ɓimujuwa taŋ ati gi madiɗa taŋ na, i taŋ maɗuvaka ti haŋ taŋ.

⁸ Pilis taŋhay a wusam vu fineˀ kokoytahay, a jam vu fineˀ kiriɓuhoy majam gwat ti pastaˀa. Mukukuro pilis taŋhay a gam slra teˀ. Mukukuro pilis taŋhaya, a soko tir li mikileŋ, a surom, kaɓa kurom masur nga vi gwat.

⁹ Puraka, taŋ masoko hiri taˀ nga mbuŋ ɓa a sa gam moˀore, a kusoko dangayaya le kos kos kaɓa muyuŋ.

¹⁰ A ra singiram ar buyoyo a puraka yaramahaya, kaɓa gwat ngi dunguroy. Li muguno ti mohol, anta muɗa taŋ didak ta, ɓa ngi tiɓi naŋ na, a ɗiyam li miɗingir.

¹¹ Akẽh so na, a mbiɗaka wuluko. A cohom tir li mekelem, a cam ar mungra, a puraka gidaŋ taŋ, kaɓa i ngi huruk huruk ava.

Mijiviɗ maka zil da Buymisemuŋ ava ma

¹² Zle ar zli virzi ngi gwatay na, Bumbulvuŋ i ka takwa? Buymisemuŋ ɗu, Mipal kine, i ka takwa? K'anta muc ta. Bumbulvuŋ ɗu, ki cifa Babiloŋ ngi gi kiita da mizli, ki cifa kaɓa mandazlay muwã, ɓa ngi kuta ndra.

¹³ Pura hiri ɗike, malambaˀ anta ara ta, ki ɓusa pura malambaˀa gu ta, maguzuvraka mizli na, k'anta wuɗ pur naŋ ta, k'anta ngum pura bonoy ngi mizli ti hiri ta. Na, mitikina vuhoyo ki pura taŋ ti hiri na vur mike? Da mbur misi moˀore ara njirsla mbur mijeŋ fineˀ naŋ na, ka lek lek vur mike?

¹⁴ Mizli titiraˀahaya, ki gi ti taŋ kaɓa kilifey ar yam sukwa? Yo kaɓa gwat memeɗehey makurmuɗum a ruwuy, misi mijigin taŋ anta mbrike?

¹⁵ Mizli Babiloŋhoy a jaka taŋ cek ti ngalum, a jaka taŋ ti zuva, a paka taŋ ng'ar zuva. Dar Babiloŋhoy a mumulom, a zluzluɓam.

¹⁶ Akẽh na, a gam mikuli da zuva taŋhay, a wuraka taŋ ˀurdi, asi taŋ mazumam gwat mundum hã a mbam na, mbele taŋ.

¹⁷ A sa zukoko zuva taŋhay avra, ɓa ngi hila mizli ngi sukwi mekelemey, manja musuka vu, manja ircece kwa?