GALATAY 6 - Bible en langue guiziga

Jinam vu ar wala kumo

¹ Sukum ɗu misikristuhoy, da ki lumam mbur le kasl ar li gi gwat malambaˀ na, anja kum misi ti ˀUf ngi Buymisemuŋ na, ki moko di ng'ar jiviɗ mezle a muŋ. Na so na, anja ti mevel mezleŋ. Ka kwana, sey ki ji lesle. Ka ki ci ar tikine gu ta wal kwa?

² Jinam vu ti jijira gwat ar wala kumo. Kahana na, naɓa ɓimujuwa ngi Kristu na, ki gaka le.

³ Asi, da mbur ara pura vu naŋ kaɓa a ndila mburo le, dambalaka a ndil ko mike ta na, a gi di i gilaw da hirnga naŋ tehhe a muŋ.

⁴ Amma anja ko wa gar, a pur gwat ngi gi nga naŋ nga naŋ. Da i mezle na, a jijih asi nga naŋ tewle, anja a wa ati ngi mbur mekelem ta.

⁵ Asi mbur gar a sa jijir di i gazlanga nga naŋ nga naŋ.

⁶ Anja mbur madubunakaŋ ɓi ngi Buymisemuŋ na, a wunka zlili naŋ gar ati mbur madubunaŋ gwata.

⁷ Ki gam gilaw da vu kum ta: Anta gam dungur ti Buymisemuŋ ta. Asi mbur a sa gi i sifi ngi gwat naŋ mizliga le cummo.

⁸ Da mbur a zligi di gwat macira hiri da dumvu naŋ na, a sa gi sifi ngi mucu. Amma da mbur a zligi di gwat macira hiri da ˀUf Mipal na, a sa gi sifi ngi siifa ngi sete.

⁹ Anja i giram ti gimezle ta. Asi da hin naŋ misa ndila le, i pulaka ta na, i sa gam sifi ngi gwata.

¹⁰ Naŋ kine so, da ndra mulumam haŋ le gar na, gukum mezle avu mizli gar, wãˀ naŋ na, avu sukum ndra mitiɓihey.

Kuti ati ji haŋ ngi durba wãˀ

¹¹ Puraka gwat mutoho hana, naŋ gwiriɗ gwiriɗ, mutuhukum di, i ya ti haŋ ɗu.

¹² Mizli mawuɗam tukukum ˀay ngi ci mizaw na, a wuɗam di i huhumo vu, ɓa mizli a puraka taŋ tewle. A gam kahana gar na, ɓa mizli a sipaka taŋ nder nder asi ɓi ngi dum mizlira ngi Kristu ta.

¹³ Asi ko taŋ mici mizaway vuna kwana, t'anta gaka gwat ɓimujuwa mawuɗo ta. A wuɗam sey a tukukum ˀay ngi ci mizawa na si, ɓa slimiɗ taŋ a zil haɗa.

¹⁴ Ya na, y'anta wuɗ ɓa slimiɗ ɗu a zil haɗa vur gwat mekelem pal ta ndiɗaˀ wãˀ, sey vur dum mizlira ngi Buy ndra Yesu Kristu tewle. Asi mike na, avu ya, duniya i mumuca le, yo ya kwana, i mumuca le avu duniya, mbele dum mizlira tuwa.

¹⁵ Ɓi ngi ci mizaw, malla ci mizaw ta gar na, i gwat mupuɗaw ta. Amma gwat mupuɗawa, i tiri mbur nawayaŋ.

¹⁶ Anja Buymisemuŋ a vula zuy, a ga mezle da mizli gar masipaka ɓi micica hana, yo waɗ da Israyel mizli naŋhaya ma.

¹⁷ Zle dana na, anja ko mbur a giriy mata, asi y'ada ti vivi ngi Yesu avu dumvu ɗu.

¹⁸ Sukum ɗuwoy, anja Buy ndra Yesu Kristu a gukum mezle gar kumo. Amin.