GALATAY 3 - Bible en langue guiziga

Ɓimujuwa malla tiɓi

¹ Haya, Galat gilaway, mudukum matay i waka? Yesu Kristu midira avu dum mizlira na, naŋ ngbah a mihiri kumo mayse?

² Ɓi purla ani, mbiɗikiy di: Kum mulumam ˀUf ngi Buymisemuŋ na, asi kum magam slra ti ɓimujuwa kwa, malla asi kum micinam Ɓimezle ngi tiɓi a mevel na kwa mbrike?

³ Kum i gilaway ar ɓi hana makwa? Kum mizlaka dumbuŋ na ti ˀUf ngi Buymisemuŋ, na wurenna, ki wuɗo kiɗaka mi naŋ ti gidaŋ ngi vu kum mbri mbri maka?

⁴ Gwatay kum mititilaka taŋ ngi gi gar na, i ngatara sukwa? Ingatara ta wãˀ si.

⁵ Buymisemuŋ mavulukum ˀUf naŋ, yo naŋ magi cekenehey a wuzla kum na, asi kum magam slra ti ɓimujuwa kwa malla asi kum macinam Ɓimezle ngi tiɓi a mevel na kwa mbrike?

⁶ Ɓimutoho a ɓi vur Abrahama na: «Abraham a tiɓa Buymisemuŋ le, joˀ Buymisemuŋ a puraŋ, naŋ jeŋŋe a mbuŋ naŋ vur tiɓi naŋ na.»

⁷ Sey ki slaka wala ngi ɓi so, dideˀ ngi Abrahamay migisiŋ gisiŋ na, i mitiɓihey.

⁸ Na zle, Buymisemuŋ masa ɗiya mizli Yudehey ta jeŋŋe a mbuŋ naŋ, asi tiɓi taŋ, Ɓimutoho a ɓa ɓimezle hana le daf dumbuŋ da Abrahama zleˀe si: «Buymisemuŋ a sa ɗuwula mi da sukwi ngi mizli gar tisi ka.»

⁹ Naŋ kine, Abraham a tiɓi le, yo mizli matiɓam gar na, Buymisemuŋ a sa ɗuwula taŋ mi jom ati naŋ ya.

¹⁰ Asi mizli macicam nga taŋ deŋ ar ɓimujuwa na, i minisahay le cek. Asi a tohoko na: «Gwat mutohoko gar angi ɓimujuwa na, ko wa gar muhurdum ngi gi naŋ ta na, i minisaŋ.»

¹¹ Na zle i gwat minjah si, mbur anta ndir jeŋŋe a mbuŋ Buymisemuŋ tisi ɓimujuwa ta. Vur Ɓimutoho a ɓi: «Mbur mijeŋŋe tisi tiɓi na, a sa ndir ti siifa.»

¹² Dambalaka, ɓimujuwa ati tiɓi na, i gwat mupurlahay ta. Ɓimutoho a ɓi: «Mbur magi slra ti ɓimujuwa mawuɗ na, a sa ndir ti siifa aseˀeŋ.»

¹³ Kristu a mbiɗa hirnga ndra le avu nis ngi ɓimujuwa. Naŋ vuna a tiri minisa le ar deɗe ndra. Naŋ kine, a tohoko na: «Ko wa gar midiraka le avu dum na, i minisa le.»

¹⁴ A gi kahana, ɓa Buymisemuŋ muɗuwula mi da Abraham na, a ndil gbaˀ avu mizli Yudehey ta na, tisi Yesu Kristu, yo ɓa i lumam ˀUf Mipal, naŋ miɓa ɗaˀ le zleˀe tuwa, tisi tiɓi.

Ɓimujuwa ati ɓi miɓa ɗaˀ le

¹⁵ Sukum ɗu misikristuhoy, Y'ani i wuɗ i ɓi kaɓa naŋ magi ar joˀ ngi mizli: Da mbur a toho mingiɓi naŋ le toh toh kuy kuy ti naŋ mumuc t'aruŋ na, ko mbur makiɗa ɓi nah avra, malla maco ɓi mekelem ng'ara gu, anta.

¹⁶ Naŋ kanah gisiŋ, gwat Buymisemuŋ miɓa ɗaˀ le na, da Abraham waɗ da dideˀ naŋ. A ɓi ɓi ngi dideˀhey kaɓa taŋ mbeˀmbeˀ ta. Amma a ɓi ɓi ngi dideˀ purla si, mbiɗeˀvra: Kristu.

¹⁷ Wuluk ɗu anihĩ: Buymisemuŋ a ɗiya ɓi nah le kuy kuy waɗ toh toh da Abrahama zleˀe si. A dirba nah vi skat ti kukur makir ma na, ɓimujuwa a ndilawa. A susuymo ɓi mutuho hana ta. Da a susuymo le zleˀe na, anja gwat Buymisemuŋ miɓa ɗaˀ le na, a susuyum le ya.

¹⁸ Na, da Buymisemuŋ a vula gwat da mburo asi naŋ maga gwat ɓimujuwa mawuɗ na, kite mbur a luuma tisi gwat Buymisemuŋ miɓa ɗaˀ le na mata. Dambalaka Buymisemuŋ miga mezle da Abraham na, tisi gwat naŋ miɓa ɗaˀ le na.

¹⁹ Na, Buymisemuŋ a vulo ɓimujuwa naŋ, vur mi ska? A ko di a meˀe, ɓa a njika gwat naŋ mawuɗ ta na cici, ɓa hã dideˀ ngi Abraham, naŋ miɓi a sa vulaŋ gwat tuwa, a so ɗagay. Ɓimujuwa nah na, i modro ngi Bumbulvuŋhoy musoko di, waɗ mbur deŋ ar wala.

²⁰ Na, mbur mideŋ ar wala vuna, mbiɗeˀvra: naŋ ar wala ngi mizli haɗi. Amma Buymisemuŋ naŋ pal naŋ.

Ɓimujuwa naŋ hĩˀĩ vur mike?

²¹ Hana mbiɗeˀvra, ɓimujuwa a ngi ngila ɓi ngi gwat Bumbulvuŋ miɓa ɗaˀ le na sukwa? Kanah ta wãˀ. Asi mike na, da Buymisemuŋ a vulo ɓimujuwa, i ɓi misi gidaŋ ngi vula siifa na, kite Buymisemuŋ a pura mburo jeŋŋe a mbuŋ naŋ tisi ɓimujuwa.

²² Amma Ɓimutoho a ɓi: mizli gar ara hinam hirnga a mbuŋ mungra, taŋ angi dangay misi purla, ɓa gwat Buymisemuŋ miɓa ɗaˀ le na, a gi da mitiɓihey tisi taŋ matiɓaka Yesu Kristu.

²³ Dumbuŋ angi tiɓi na, ɓimujuwa a gica ndra le ar dangay, ɓa ngi kutuko tiɓi masa njiko vu.

²⁴ Naŋ kine, majigina ndra zleˀe i ɓimujuwa, hã Kristu a sawa, ɓa Buymisemuŋ a pura ndra jeŋŋe a mbuŋ naŋ tisi tiɓi.

²⁵ Amma a dirba tiɓi na, ndr'anta hinam hirnga a mbuŋ mijigin nah mata.

²⁶ Asi mike na, kum gar i ziri ngi Buymisemuŋhoy tisi tiɓi kum, asi kum mujom ati Yesu Kristu.

²⁷ Haˀaw, kum micam ar yam gar asi kum mujom ati Kristu na, kite ki kaka Kristu le avu vu.

²⁸ Vurˀe, mbur Yude malla Grek, asinta, beke malla diimu, asinta, zil malla ngwas, asinta. Asi kum jom purla gar kumo, tisi Yesu Kristu.

²⁹ Da kum i ngi Kristuhoy na, naɓa kum i dideˀ ngi Abrahamay, yo ki lumam gwat Buymisemuŋ miɓa ɗaˀ le na le.