GALATAY 1 - Bible en langue guiziga

Ji haŋ

¹ I ya mislin Pol. Yi mislin ngi mizli ta, ko yi mislin ngi mbur ta ma, amma yi mislin ngi Yesu Kristu waɗ ngi Cine naŋ Buymisemuŋ mislikiɗaŋ ti wuzla mizli mumucahay.

² Yo mutuhukum ɗerewol hana da kum Cikil ngi misikristu ngi hirwuy Galat na, i ndra jom ati sukum ndrahay misi ati ya aka gar.

³ Anja Cine ndra Buymisemuŋ ati Buy ndra Yesu Kristu, a gukum mezle, a vulukum zuy.

⁴ I Kristu ti haŋ naŋ muvula hirnga naŋ ngi laha ndra tir mungra ndraˀahaya, ɓa a tuɓo ndra moh avu duniya magi malambaˀ hana, kaɓa Cine ndra Buymisemuŋ muwuɗu.

⁵ Anja i hunumakaŋ hã ngi set ngi samadin! Amin.

Ɓimezle naŋ purla tewle

⁶ Buymisemuŋ a zulukum asi gimezle ngi Kristu. Na ma na, ki mbiɗam duba kutum avaˀa, ɓa ki tiɓam ɓimezle mekelem pal ma na, a zumiy hirnga le.

⁷ Wãˀ naŋ na, ɓimezle mekelem pal anta. Yi ɓukum kahana asi mizli mekelemey ada, ara zlurukum dibiɗi, a wuɗam ɓa a mbiɗaka Ɓimezle ngi Kristu pal.

⁸ Amma da ko mbur mekelem, ko i ndra, malla ko i modro ngi muŋ matulukum mi ti ɓimezle mekelem pal avu ngi ndra mutulukum di na, anja a nisakaŋ.

⁹ I ɓukum di le zleˀe si, wurenna i mukum hiri naŋ ava ma: Da mbur ara tulukum mi ti ɓimezle mekelem pal avu ngi kum micinaka na, anja a nisaka mbur nah.

¹⁰ Ani wurenna so na, i pur di i jiviɗ ɓa i mizli mangilam ti ya wuy kwa, malla Buymisemuŋ kwa? Yi pur di i jiviɗ ngi cira hiri da mizli kwa? Da yi pur di i jiviɗ ngi cira hiri da mizli na, naɓa yi gawla ngi Kristu mata.

Pol mitiri mislin ngi Kristu

¹¹ Sukum ɗu misikristuhoy, y'ani ɓukum di njah: Ɓimezle ya mutulukum di mi hana, i ngi mbur titira ta.

¹² Na zle, yi lumo di avu mbur ta, yo i mbur mudubuniy di ta ma, amma i Yesu Kristu minjikiy di.

¹³ Asi ti ya masipi jiviɗ ngi Yudehey zleˀe na, ki cinaka ɓi ngi gwat ya maga na le. Cikil ngi misikristu, mizli ngi Buymisemuŋhoyo, i sipa taŋ nder nder ti gidaŋ wãˀ, yo i hurdum le hirdam ɓa i ziza taŋ.

¹⁴ Jiviɗ Yudehey masipaka na, ja ɓi nah le, i ra ru di nga mbuŋ nga mbuŋ fineˀ vendeke ngi Yude mendele ɗuwoy ati muy ɗuwoyo. Ya wirwir haɗa ar sirik ngi dideˀ ndraˀahaya.

¹⁵ Amma Buymisemuŋ ti gimezle naŋ na, a winiy le zle a kwacay maha, yo a ziliy le ti mezle naŋ, a pura le kuy,

¹⁶ ɓa a biga Mangal naŋ avu ya, ɓa yi til di mi kutum a wuzla mizli Yudehey ta na, manja ngila wuy ko neˀ avu mburu.

¹⁷ Ko nga Jerusalem, avu mislin mudumbuŋhoy angi ya na kwana, i ru ta. Amma i ru nga ya nga hirwuy Arap, akẽh i sa mo nga Damas a muŋ.

¹⁸ Yo vi makir a dirba nah so na, i ru nga Jerusaleme, ɓa i sinam vu ati Piyere. I cifam cuwa hin kuruˀ nga zlum.

¹⁹ Yi pur mislin mekelem ko pal ta, sey Zak, sukum ngi Buy ndra Yesu tewle.

²⁰ Ɓi ya matuhukum di hana na. Yi ɓa njah a mbuŋ Buymisemuŋ, i slir ta.

²¹ A dirba nah, i ru nga hirwuy Siri ati Silisi.

²² Amma ar hin nah gar na, Cikil ngi misikristu ngi Yudeheye, a purikiy ɗaˀ ta.

²³ Sey a cinam mizli maɓam: «Mbur masipa ndra nder nder zleˀe tuwa na, ara til mi ti Ɓimezle ngi tiɓi a mevel, naŋ muwuɗ ziza ɓi nah zleˀe tuwa.»

²⁴ Joˀ a hunumaka Buymisemuŋ asi ɓi ɗu.