EZAYI 9 - Bible en langue guiziga

¹ Mizli maramdigi ar luvuŋ zleˀe na, ara puraka li miciɗak ciɗaka. Mizli micifam ar li mitimbiɗim zleˀe na, li ara pusluɗ ar taŋ njahha.

² Bumbulvuŋ, ki ska cira hiri taŋ le, yo ki giɗa mumul taŋ le. Mizli ara cinam ndum a mbuŋ ɗike, kaɓa macinam ndum ar li gi sifi, kaɓa majam salalay ar li wuɗka gwat mitiɓa ar vurum.

³ Asi galalaŋ migindiɗ ar taŋ ati ganday ng'ir pepesl taŋ, waɗ tokom ngi buy ngi slra mitakˀay le, makiɗa taŋ ti naŋ na, ki ngila taŋ le avra kaɓa ar hin ka miba hirnga da Madiyanay na.

⁴ Tarak ngi sar soje mesene kumoy mawaka ruwuy ar li ru, yo zana ngi himiɗ mujuguɓo le ar pumbus na, taŋ mezle ngi wur, vu a zuma taŋ.

⁵ Asi a yam ndra mangal le, a vulam ndra mangal mizile le. Bumbulvuŋ a vulaŋ gidaŋ ngi zumabuy le. A hunumaka ti slimiɗey ani: «Mukuti vu mezleŋ, Buymisemuŋ migidaŋ, Cine ngi set, Buy leleŋ.»

⁶ A sa ndaha gidaŋ naŋ ngi zuma buyo, a sa ga ɓa zuy a kiɗ mi ta. A sa cifi ar janga ngi buy Davite, yo a sa ru ti zumabuy naŋ, a sa cica, a tira gidaŋ gidaŋ, ti gi gwat mikaslsla waɗ ti gi jeŋŋe, zle wurenna hã ngi sete. Hana i Bumbulvuŋ misi gidaŋ wãˀ masa ga ti vula vu naŋ migǝr gǝr.

Gwat, Bumbulvuŋ mambur hima aseˀe

⁷ Bumbulvuŋ a ɓi ɓi ngi bonoy le da dideˀ ngi Zakopoyo, amma a mbiɗi nga hirnga zumabuy ngi Israyeley.

⁸ Mizli gar a sinaka le, Mizli Efrayimey ati Samarihey a huhumom vu, a ɓam:

⁹ «Dalam mindira ti brike, a mbizli le, amma i sa ndiraka ti ɗugur mihirkahay. A ngumaka bazlawaraya le, amma i sa ngam miterey ar li taŋ.»

¹⁰ Bumbulvuŋ a vula gidaŋ le da mesene ngi Rasiŋhey ng'ar Israyeleye, a pa mi le da mizli mazliram ti taŋ ta.

¹¹ Mizli Siriheye, sek a mbuŋ, Filistiheye, ti dirba, dar a ndaka Israyeleye suɗuk suɗuk. Amma, bam ti nah kwana, mevel ngi Buymiseuŋ a tisl t'aruŋ, a ro haŋ pak ng'ar taŋ aruŋ na si.

¹² Buymisemuŋ, mizli naŋ makiɗa taŋ tuwa, a moko ng'ava ta. a puram jiviɗ ngi mo ng'avu naŋ Bumbulvuŋ misi gidaŋ wãˀa ta.

¹³ Vurˀe, ar hin purla si na, asi ruwuy Israyele, Bumbulvuŋ a buko hirnga ati dangwala, waɗ mihaŋ ngi dibinoje ati lavaɗaya.

¹⁴ Mizli micawwahay ati madiɗahaya, i hirnga, mijiviɗ migi slireye, i dangwal.

¹⁵ Miki mbuŋ tayna, a zizaka mizli le, dar mizli maram asi taŋ, a zuɓam jiviɗ malambaˀ.

¹⁶ Vurˀe, Bumbulvuŋ ara zuɓ himaˀ ar gawla taŋhaya, anta sa pura ircece da mutuhu ati wudiga taŋhaya ta. Asi mike na, taŋ gar i miziriɗa mihey, i migi malambaˀhay, yo mingiɓi taŋ gar i mi ngi gilaw. Amma bam ti nah kwana, mevel ngi Bumbulvuŋ a tisl t'aruŋ, a ro haŋ pak ng'ar taŋ aruŋ na si.

¹⁷ Gisiŋ, moˀore a tiɓi kaɓa vu mawura hadaw ati sisim, irne naŋ a ki nam nam ng'asi widis memeɗe mingiriɗ asi dum, dar cunju a ngis tirslik.

¹⁸ Buymisemuŋ, misi gidaŋ wãˀ miji mevel haɗa na, hirwuy gar a jijik, mizli a ndiram le da vu a zuma taŋ, ko mbur malaha sukum naŋ gu anta.

¹⁹ A mbuɗam tir vay hazum, a zumam, amma may a ja taŋ na si, a mbiɗam tir vay gula, a zumam, amma anta mbam ta mbur gar a jigin mi avu cala.

²⁰ Muy ngi Manasehey a sa humbuɗam muy ngi Efrayimey, muy ngi Efrayimeye kwana, a humbuɗam muy ngi Manasehey aya, a jumom cuw taŋ ng'ar muy ngi Zudahay. Amma, bam ti nah kwana, mevel ngi Buymisemuŋ a tisl t'aruŋ, a ro haŋ pak ng'ar taŋ aruŋ na si.