EZAYI 7 - Bible en langue guiziga

Ezayi mi ɓa mingiɓi ngi Bumbulvuŋ da buy Ahas

¹ Ahas mangal ngi Yotam, dideˀ ngi Oziyasa, ara zum buy a si ruwuy Zuda. Ar hin tayna, Resiŋ, buy madiɗa ngi Siri ati Peka, mangal ngi Remaliya, buy madiɗa ngi Israyele, ara zlaka Zeruzaleme ngi kiɗa vu, amma a kiɗaka gu ta.

² A ɓaka ɓi nah le zleˀe da Ahas dideˀ ngi Davit, waɗ da mizli ngi hay naŋhaya, a ɓaka taŋ: «Mizli Sirihey a roko ndah ndah a Efrayim.» Dar buy ati mizli naŋhaya, didak a muɗa taŋ, a wusam ẽc ẽc kaɓa himiɗ mawus widisey a ɓuh.

³ Bumbulvuŋ a ɓa Ezaya: «Bam ati mangal ɗik Seˀar-Yasupo, ara lumaka Ahasa. N'ada ar kiɗa mi ngi zlazlar vay muŋ, a jiviɗ maru kini ng'ar guva ngi mubuna zanahay na.

⁴ Ki sa ɓaŋ na: ‹Ka cifi teˀ teˀ, ko ki zluwun ta. Resiŋ, mbur Siri waɗ mangal ngi Remaliya mijam mevel na, anja didak a muɗuw ti taŋ ta, ji mevel taŋ, naŋ kaɓa misliŋvuhoy cuw mangisam.

⁵ Mizli Sirihey ati Peka waɗ mizli Efrayimeye, a juwam ɓi le a kwacay taŋ, ɓa ara gukum malambaˀa, i si na le, a ɓam:

⁶ ‹Akum i ra gaka zluwun da hirwuy Zuda. Cukum ɓa i joko taŋ ng'asi ndra, yo mangal ngi Tabele, cufukum di i buy taŋ.›

⁷ Na ya, Bumbulvuŋ Buymisemuŋ, i ɓi na: «Ɓi hana anta sa cici ta, anta sa gi ta!

⁸ Asi walahay hirnga ngisi ruwuy Siri, i walahay Damas, yo Resiŋ, i buy ngi Damas tewle. A ndir vi kukur merkeɗ nga zlum, sukwi Efrayime a sa kiɗi.

⁹ Walahay hirnga ngi Efrayime, i Samari, yo mangal ngi Peka, i buy ngi Samari tewle. Da ki tiɓaka ɓi ɗu hana ta na, kum anta sa ndiram ti siifa ta.›»

Bumbulvuŋ miɓa ɓi ngi yi Emanuwel

¹⁰ Bumbulvuŋ a ɓa Ahasa, ava ma.

¹¹ A ɓaŋ: «Gwat mabiga ya Bumbulvuŋ, Buymisemuŋ ɗike, y'ada cik vu ar ka na, cufuɗa avu ya vuna. Anja i buguw di ar mijileŋ ngi ruwuyoy malla a dadala muŋ.»

¹² Ahas a mbiɗaŋ di: «Y'anta cufuɗ gwat ta, y'anta ci a kwacay Bumbulvuŋ ta.»

¹³ Ezayi a ɓaŋ: «Ka ati mizli ngi hay ɗikey, dideˀ ngi Davitey na, cinam so! Kum magiraka mizli na, muk ta kwa? Hã ki ra giraka Buymisemuŋ ɗu ɓula si na!

¹⁴ Bumbulvuŋ vuna tihaŋ naŋ ara vulukum gwat mabigi gwat ani: Puraka, zuŋ diili a sa gi hur, a sa yi mangal mizile, dar a sa zila Emanuwel.

¹⁵ Mangala, a sa zum sey i wursla ati mam, hã ar hin naŋ masa si na wuna mezle avu malambaˀa.

¹⁶ Dumbuŋ ɓa mangal a sa si na wuna mezle avu malambaˀa na, hirwuy ka mazluwun ti buyoy mucuw ngi raˀahay tuwa, mizli ngi raˀahay a sa pulaka.

¹⁷ Bumbulvuŋ a sa vulukum hin ngi bonoy haɗa, da ka ati mizli ɗikey waɗ muy ɗikeye. Zle avu Zuma buy ngi Israyel muwuduk avu zumabuy ngi Zuda na, ko a puram hin ngi bonoy kanah ɗaˀ ta. I buy Asiri masa gukum bonoy nah vuna.»

Asirihey mitiɓaka ruwuy, joˀ sisim a sirta kip

¹⁸ Ti hin nah, Bumbulvuŋ a sa fuyuk tooh, ɓa a bo ti jijiwiɗey misi ar kiɗa mi ngi mizaw Nil, waɗ mam misi asi ruwuy Asiri na ma.

¹⁹ A sa soko, a cifam cek ar hurjijiŋ mijileŋ waɗ ar poporohoy, ar kalafaya cek waɗ ar li ginewey mazumam anga gar.

²⁰ Ti hin nah, Bumbulvuŋ a sa wuɗo sliwiɗ hamac a dubazaw madiɗa, i buy Asiri. A sa hicukum hirnga ati ngwic ngi saraya ti naŋ, waɗ a sa hicukum mazlamaya ti naŋ ma.

²¹ Ti hin nah vuna, mbur gar a sa gil bulkoŋ pal waɗ away cuw.

²² Ɗuwa a sa gi haɗa, hã mizli a sa zumam wursla. Gisiŋ, mizli masa ndiram asi ruwuyo, a sa zumam wursla ati mam.

²³ Ti hin nah mana, guva misi gudubun virzi durmuk, ma hiɗik suloy gabal na, hadaw ati sisim a sa pusam ara.

²⁴ Mizli a sa tuvulom ara gulum gulum, asi hadaw ati sisim a sa pusoko taˀ hirwuyo gar.

²⁵ Amma muwãhay gar mahufaka taŋ zleˀe ti gam na, hadaw ati sisim a sa ga taŋ zluwun: a sa pulaka slahay a zumam, tumuŋhoy a laˀam ara.