EZAYI 61 - Bible en langue guiziga

Mislin ngi Bumbulvuŋ, slin naŋ ng'ar slra, waɗ mingiɓi naŋ

¹ ˀUf ngi Bumbulvuŋ Buymisemuŋ naŋ da ar ya. Naŋ kine, Bumbulvuŋ a tiri ti ya mbur, naŋ muwuna le. A slino ya ɓa ngi so ti ɓi mezle da misi murgahay, ɓa ngi tisla mevel da mizli malikam, ɓa ngi tila mi ti ɓi ngi pula mizli mijahay le, ɓa ngi cuko celelu ngi dangayay avra,

² ɓa ngi tila mi ti ɓi ngi Bumbulvuŋ maga mezle da mizli, ti ɓi ngi hin ngi Buymisemuŋ ndra masa pula cuwal naŋ, naŋ masa tuso didak da mizli matuwam vagaya,

³ ɓa i tuwuɗa loppol a hirnga mizli mutuwa Siyoŋhoyo. Haˀaw, i sa tuwuɗa taŋ di i loppol gisiŋ, i pa taŋ fucu a hirnga ta, i sa pa taŋ urdi mimezle haɗa ngi vula mumul, i urdi ngi tuwa vagay ta, i sa vula taŋ zana ngi muguzlum, ar deɗe ngi ndurɓo hiri taŋ. Hana gar na, ɓa mizli a sa zilaka taŋ ‹Widis ngi ɗuva hirnga da Buymisemuŋ, yo guva ngi Bumbulvuŋ, mihĩˀĩ ngi biga dudok naŋ›.

⁴ Diŋ misi zleˀeheye, taŋ a sa paka taŋ a muŋ, hay mumbuzla ngi dideˀ taŋhay zleˀe na, a sa ndiraka taŋ a muŋ, walahay mikirɗak kirɗak misi zlezleheye, a sa ɗuvaka taŋ a muŋ.

⁵ Mizli mulakay a sa soko ti ka ti ka gar ngi jigina li, dar a sa jiginukum aw ati tumuŋhoyo. Ziri mizile ngi mizli mulakay a sa hufukum guvahaya, a sa ɗiyukum guva ngi gudubunoyo.

⁶ Kumo so na, a sa cukum slimiɗe ‹Migi mikuli ngi Bumbulvuŋhoy›, yo a sa zulukum ‹Migi slra ngi Buymisemuŋ ndrahay›. Ki sa zumam migidaŋ ngi sukwi ngi mizli, yo kisa jijaham ti zlili taŋhaya.

⁷ Ya Bumbulvuŋ i ɓukum na: «Ki pam mesem le zleˀe haɗa teˀe, hã makaw cuw ma kini, yo ar deɗe ngi lum kumo, i zi vu mukuyta wãˀ naŋ, mizli muzukum na. Vurˀe, ar hirwuy taŋ na, kisa lumam mi ngi kumo makaw cuw, yo kisa zluzluɓam, zle wurenna hã ngi sete.

⁸ Asi ya Bumbulvuŋ, gwat ngi gi zuy na, yi wuɗ di i naŋ, amma gwat ngi tiɓi ti gidaŋ na, yi pura ɓi nah hiris le. I sa vulukum migir kumo ti jiviɗ naŋ kaslsla, yo i sa jumˀay ati kumo ngi wãˀa.»

⁹ Mizli a sa sinaka dideˀ kumoyo, a wuzla sukwi ngi mizli ɓaˀ li, yo a sa sinaka tizer kumoyo, a wuzla mizli. Mizli misa puraka taŋ le gar na, a sinaka taŋ, taŋ i sukwi Bumbulvuŋ muɗuwula taŋ mi le.

Dimis ngi hunuma Bumbulvuŋ

¹⁰ I ra mumul haɗa, haˀaw i ra mumul vur Bumbulvuŋ. Membezleŋ ngi vu ɗu ara zluzluɓ vur Buymisemuŋ ɗu. Asi naŋ milihiy na, a kiy di i zana avu vu, naŋ micifi bugawla na, a sirtiy di i godo. Ya mamumul na, kaɓa gawla muzuɓ ngwas, mutuwuɗa hirnga le ti loppol ngi muguzlum, yo kaɓa meketeŋ ngi mbur miɗiya vu le ti gwat ngi wuya naŋhay.

¹¹ Naŋ kine, hirwuy a puso giziŋ, yo jarne a puso hilfa gwat ngi raˀahaya gar, naŋ kanah ya, ya Bumbulvuŋ i sa puso gi jeŋŋe ati hunuma vu a mbuŋ sukwi ngi mizli gar.