EZAYI 51 - Bible en langue guiziga

Bumbulvuŋ a laha mburo ngi sete

¹ Ya Buymisemuŋ i ɓi na: «Kum mizli miteŋteŋ ɗuwoy, kum masipam jiviɗ ngi lih na, cinaka mingiɓi ɗu. Puraka mandazlay, ya mubuslokum ava na, yo poporo muwã, ya muɗuɗokum ti raˀa na.

² Puraka Abraham cine kum, yo Sara muyi kum. Asi mike na, Abrahama, ti ya mizilaŋ na, naŋ zleˀe manja zuŋ, dar yi ɗuwulaŋ mi, yi sikaŋ haɗa.»

³ Haˀaw, ya Bumbulvuŋ i pura ircece le da walahay Siyoŋ, ircece a giy le ti diŋ ngi raˀahaya ma. Li mikirɗak kirɗak ngi raˀa, i tiri di jarne, yo li muˀulo ngi raˀa, i tiri di rak rak ka li muzuy zuy nga ya Bumbulvuŋ. Adiga na, sey mumul ati zluzluɓ, gi sise waɗ hurum ngi gwat ngi dunguroy tewle.

⁴ Kum mizli ɗuwoy, cinam mingiɓi ɗu kuy kuy, Kum sukwi ngi mizli ɗuwoy, jikoko slimiɗ ng'avi ya. Asi ɓimujuwa a sa bo tivi ya, yo kiita ya maga na, a sa gi i li minjahha ngi mizli.

⁵ Kiita ya masa ga na, naŋ gweˀe, laha vu a sa bugo vu gweˀ, a ndir mata. I sa ga, ɓa gwat ngi gi zuyo, a gi ti gidaŋ a wuzla mizli. Mizli mikileŋ kileŋhey a sa njaham hiri vur ya, yo a sa kutukom gidaŋ ɗu.

⁶ Zuɓaka hiri nga muŋ ɗi, yo puram nga ruwuyo ma ɗi. Haˀaw, muŋ a sa susuyum kaɓa cunju, hirwuy a sa hiryi kaɓa zana, dar mizli ngi raˀahay a sa micam kaɓa mevreŋhey. Amma laha vu ya masa ga na, a sa ndir ngi set, yo gi bugawla ɗu, anta sa kiɗ mi ta ndiɗaˀa.

⁷ Kum mizli misinaka ɓi mijeŋŋe le, yo kum mizli mijaka ɓimujuwa ɗu le a mevel kum na, cinaka mingiɓi ɗu ani. Ki zluwunam ti singir ngi mizli ar kum na ta, yo anja ko taŋ mazukum na, a hiryukum lesl ta.

⁸ Asi tuˀuf a sa zuma taŋ kaɓa zana, mumuyuŋ a sa zuma taŋ kaɓa gugumay mislirkeɗ. Amma gi jeŋŋe ɗu a sa ndir ngi set, gi bugawla ɗu a sa ndir vur dideˀ vur dideˀ.

Dira dibiɗ ɓa Bumbulvuŋ a biga gidaŋ naŋ

⁹ Bumbulvuŋ ɗu, slikiɗi, biga gidaŋ ɗike, slikiɗ kaɓa ar hin mucohomoy zleˀe na, kaɓa ar hin misi zlezlehey zleˀe. Mubuɗusla hirnga ngi ngoŋngoŋ Rahap na, i ka takwa? Mizliga ngoŋngoŋ ngir mubuliye gor njoŋ na, i ka ta kwa?

¹⁰ Mihisika mubuliy, waɗ yam ngir mubuliy madiɗahay na, i ka takwa? Mika jiviɗ ɓaˀ asi virzi ngi mubuliy, ɓa mizli mumbiɗaka hirnga taŋhay le, a cohom ti raˀa na, i ka takwa?

¹¹ Mizli Bumbulvuŋ mupula taŋ le tir dangaya, a sa moko, a sa coko ng'ar walahay Zeruzaleme, bal ti ji salalay kiɗ kiɗ. Mumul makiɗ mi ta a sa wucuɗa mihiri taŋ. Zluzluɓ ati mumul haɗa a sa gi avu taŋ, amma ndurɓo hiri ati niˀic a sa kil kileŋ avu taŋ.

Ki zluwunam mike, mizli ɗuwoy?

¹² Mavulukum gidaŋ i ya. Na mbur titira mamucu, masa kiɗ mi ka giziŋ na, ki zluwunam di ngi mike?

¹³ Dar ki puyukom hirnga ti Bumbulvuŋ jaka, dambalaka mugukum i naŋ, minjira muŋ bilir, yo muɗuva virzi ngi ruwuy i naŋ ngbaŋ. Vur hin gar na, ki ra jijikam kpar kpar, ti himaˀ ngi mbur muguzuvur kumo, kaɓa naŋ gweˀ ngi ngizlukum. Na himaˀ ngi mbur muguzuvurkum vuna, ama ani ska?

¹⁴ Neˀ aka na, mbur mija ar dangay tuwa, a sa puloko di. N'anta sa muc ar dangaya ta, naŋ anta sa ci a ruwuyo ta, yo gwat ngi zum anta sa kicaŋ ta ndiɗaˀ.

¹⁵ Bumbulvuŋ, Buymisemuŋ kumo i ya. I wusa mubuliye gizliwir gizliwir, yo i ga ɓa diɓel naŋ a hurum, slimiɗ ɗu: Bumbulvuŋ misi gidaŋ nwaˀ.

¹⁶ I njira muŋ le, yo i ɗuva hirwuyo le ndizl. Joˀ i ɓa Zeruzalemeye na: «Kum i mizli ɗuwoy.» I ca mingiɓi ɗu le a balam kumo, yo i ɗumukum le ɗum a susuɗuk ngi haŋ ɗuwoyo.

Zeruzalem, tuso didak a muŋ

¹⁷ Zeruzalemey, slikiɗam, slikiɗam deŋ ti deŋ. Bumbulvuŋ a vulukum himaˀ naŋ ngir sikiɗe, kumo, ki saka le, sikiɗ misi ti himaˀ makicuwur hirnga viw viw na, ki saka le, hã tay mi wãˀ.

¹⁸ A wuzla ziri kum mizilehey, kum miyaka taŋ gar na, ko pal mukusukum nga muska vu anta. A wuzla ziri kum mizilehey, kum migilaka taŋ na, ko pal mujukum haŋ kaw anta.

¹⁹ Bonoy zlaɓ zlaɓ cuw, a ndilukum le sar cuw, ani masa gukum kiita naŋ i waka? I moˀore ati hirya gwat, yo may ati vurum, na masa jukukum didak i waka?

²⁰ Ziri kum mizilehey a roko ɓaˀ ɓaˀ a ruwuy, a mazlaka jiviɗ madiɗahay gar, kaɓa muuni mija le ar gadaŋ. A roko ɓaˀ ɓaˀ, himaˀ ngi Bumbulvuŋ a kiɗa taŋ le ɓaˀɓaˀ, Buymisemuŋ kumo a guco taŋ mi le.

²¹ Aw walahay Zeruzalem ɗu muvuso le, ki wi le, amma ki wi ti mbaazla ta, cine mingiɓi ɗu ani so.

²² Buy ɗik Bumbulvuŋ, Buymisemuŋ ɗik, matiɓa hirnga ngi mizli naŋhay na, a ɓuw na: «Sikiɗ ngi himaˀ maguw hirnga viwwe, sikiɗ ngi ji mevel ɗu na, ani yi tiɓa le tisi haŋ ɗike. Zle dana na, k'anta sa sa mata wãˀ.

²³ I sa vula asi haŋ ngi mizli magukuw bonoy na, i mizli maɓukuw zleˀe: ‹Hin murkwacay, ɓa i cohom tir ka› tuwa. Ka, ki hina duba ɗike ar deɗe ngi li cuh, ar deɗe ngi jiviɗ ngi cuh ngi mizli.»