EZAYI 49 - Bible en langue guiziga

Gawla ngi Bumbulvuŋ (dimis mucuw naŋ.)

¹ Kum mizli mikileŋ kileŋhey, cinaka mingiɓi ɗu ani, kum mizli mizar zaray, jikaka slimiɗe. Bumbulvuŋ a ziliy zle ti taŋ miyikiy t'aruŋ, a zila slimiɗ ɗu zle ti ya misi a kwacay maha aruŋ.

² A giy mingiɓi ɗu kaɓa maslalam mikef kef, a ɗumiy ɗum ar susuɗuk ngi hur haŋ naŋ. A tiri ti mingiɓi ɗu kaɓa luvut mipiyeŋ piyeŋ, a ɗumiy ɗum ar gulum naŋ.

³ Dar a ɓiy: «Gawla ɗu i ka Israyel, yi sa biga dudok ɗu ti ka.»

⁴ Amma ya i ɓi na: «Yi gir vu ɗu gar ngataraŋ, i tika gidaŋ ɗu ngataraŋ, i ngi pula gir ta.» Dambalaka li lum ɗu, i Bumbulvuŋ, li lum ɗu naŋ avu Buymisemuŋ.

⁵ Asi mike na, wurenna, Bumbulvuŋ a ɓa le njah, naŋ mukicuwiy zle a kwacay maha na, ɓa i tiri gawla naŋ, ɓa ngi mo ti dideˀ ngi Zakopoyo ng'avaŋ, ɓa i cikilaŋ hirnga ngi Israyeleye jom ar leˀe. Akẽh so na, Bumbulvuŋ a puriy, ya puɗaw a mbuŋ naŋ muduba, yo gidaŋ ɗu i Buymisemuŋ vuna.

⁶ A ɓiy: «Ɓa ki tiri gawla ɗu, ki mo ti Israyeley mindiram ti siifa, yo ɓa sukwi ngi Zakopo, ki slikiɗaŋ deŋ a muŋ na, i hana tewle ta. Amma yi cufuw le hĩˀĩ, ɓa ki tiri li minjaha ngi sukwi ngi mizli gar, yo ɓa ɓi ɗu ngi lahavu na, a ndil hã ar hirwuy mikiɗ mi.»

Mizli mijahay mumoko gar taŋ

⁷ Ka, mizli maburɗukuw, mizli mahirsukuw, ka beke ngi misi moˀorehey, Bumbulvuŋ mimbiɗi hirnga ngi mizli, Buymisemuŋ mipal wãˀ ngi Israyele, a ɓuw na: «Da buy madiɗahay misa purukuw le na, a sa slikiɗam ti ka, yo yarmahay kwana, a sa hurukom a mbuŋ ɗike. A sa gaka kanah na, ngi ɗuva hirnga da ya Bumbulvuŋ miteŋteŋ, da ya Buymisemuŋ Mipal ngi Israyel muwunuw na.»

⁸ Bumbulvuŋ a ɓi na: «Ar hin ngi gi mezle na, yi ziluw mi le, ar hin ngi laha vu na, yi jinuw le. Yi cufuw le, weˀ vu ti ka hĩˀĩ, ngi jumoˀay da mizli. I sa ɗiya hirwuyo, hiri naŋ a muŋ, yo zlili mihirya ngisi ruwuy muwurenna na, yi sa wuɗka da mizli a muŋ.

⁹ Yi ɓa mizli dangayaya: «Boko!» Mizli ngir luvuŋhoyo, i ɓa taŋ: «Boko ng'ar li minjahha!» Ko taŋ maram a jiviɗ kwana, a sa lumam gwat ngi zum taŋ, yo a muwã micay cay kinehey kwana, a sa lumam li zumo.

¹⁰ May anta sa ja taŋ ta, madalyam anta sa ga taŋ ta. Vu miwik wik ngi ruwuy malla pas anta sa wura taŋ mata. Asi mike na, ya mbur mawuɗ taŋ haɗa na, i sa ru taŋ ng'ar miviɗiviɗi ngi yam miyaɓyaɓa.

¹¹ I sa ki jiviɗ a muwãhaya gar, i sa ɗiya jiviɗeye, a ndiram viriw viriw.

¹² Puraka ɗi, t'ani a soko zle kileŋ, cah mekelemeye, tir vay muŋ waɗ tir vay si pas ngi pastaˀa, numuŋhoyo, tir vay ruwuy Ezipte.»

¹³ Muŋ, ji salalay, hirwuy, zluzluɓu. Muŋwhay, jam salalay kiɗ kiɗi, asi mike na, Bumbulvuŋ ara vula gidaŋ da mizli naŋhaya, yo ara wuɗa mizli naŋ muvusohoyo.

Buymisemuŋ i milaha mizli naŋhay

¹⁴ Zeruzalemey a ɓam: «Bumbulvuŋ a pula ndra le zlaɗa, Bumbulvuŋ a puyuk hirnga le ti ndra.»

¹⁵ Amma Bumbulvuŋ a mbiɗa taŋ di: «Ngwas ada puyuk hirnga ti baybay naŋ kwa? Ngwas ada pula wuɗa zuŋ naŋ mubo ti kwacay naŋ kwa? Da ko naŋ da puyuk di hirnga tekeɗe kwana, ya, y'anta puyuk hirnga ti kumo ta.

¹⁶ Slimiɗ kumo, i toho le ngeɗ ngeɗ a hur haŋ ɗuwoyo, yo mohol mugun hirnga kumoyo, hiri ɗu anta zuɓ paɗ le ti raˀa ta.

¹⁷ Zeruzalem, mizli masa ndirukuw hiri naŋ a muŋ na, ara ndiloko kutum, yo mizli muwuhukuw, mumbuzlukuw na, ara kilam le kileŋ avu ka.

¹⁸ Zuɓa hiri, pur gun gun hirnga ɗike ɗi: ziri ɗikey ara kusom cek, ara soko ng'avi ka. Ya Bumbulvuŋ i ɓi na, kaɓa ya misi ti siifa gisiŋ na, haˀaw, kisa ka taŋ lat lat avu vu kaɓa gwat ngi wuya, kisa juwa taŋ a dingiriŋ kaɓa mangasl ngi mbur mujuwa kanda naŋ le.

¹⁹ Haˀaw, hirwuy ɗik a tiri diŋ le, slalahay i muwahahay le, hirwuyo kirɗak kirɗaka. Haˀaw, zle wurenna, li pi hay a sa tiri ɓuc ɓuc a mizli ɗikeye. Mizli mingizl ɗikey zleˀe na, a sa kiraham kileŋ avu ka.

²⁰ Kum misi kaɓa manja ziri zleˀe tuwa na, kisa cinam, ara ɓukum: «Li a gi le ɓuc ɓuc haɗa avu ndra, ɓucom neˀ neˀe, vulam ndra li pi haya.»

²¹ Dar kisa ɓam ti kwacay kumo: «Ziri hanayna, miyam ndra taŋ i waniy maka? Ndra zleˀe manja ziri, dirlayay, mijahay le nga hirwuy mulak, mususuymohoy le wãˀa. Na misa gila ndra ziri hanayna i wa maka? Ani ndra zleˀe jojoˀ pal ndra, na taŋ hanayna, taŋ zleˀe ama ska?»

²² Ya Bumbulvuŋ Buymisemuŋ, i ɓi na: «Ani i sa vurka sukwi ngi mizli, yo i sa nga drapo ɗu kaˀ ngi bigi gwat da mizli. Joˀ mizli tayna a sa sukum ti ziri mizile kumoyo, kaw kaw a haŋ taŋhaya, ziri mongoso kumoyo, joˀ a gagala ˀay taŋhaya.

²³ Masa tiram masay kumoy, i buy madiɗahay, yo masa vulukum gwat ngi zumo, i ziri taŋ maˀãyay. A sa hurukom a mbuŋ kumo, midibiɗ da ruwuy da ruwuy, a sa tirnaˀaka lagwada ngi vi sar kumoyo. Dar kisa sinaka muduba, yi Bumbulvuŋ, mizli manjaham hiri asi ya na, t'anta sa pam mesem ta.»

²⁴ Gwat mitiɓaka le ar vurum na, ada sa tiɓaka gu a muŋ ma kwa? Mbur dangaya, ada lahakaŋ gu ti haŋ mbur misi moˀore aruŋ ma kwa?

²⁵ Haˀaw, ya Bumbulvuŋ i ɓi na: «Gisiŋ, gwat bugawla mitiɓa le ar vurumo, i sa tiɓa a muŋ. Yo mbur mijaka le ar dangaya, i sa lahaŋ ti haŋ mbur misi moˀore. Zeruzalemey, mizli mazlukum ngi kiɗa vu na, i ya masa kiɗ vu ati taŋ, yo ziri kumoyo, i ya masa laha taŋ.

²⁶ Mizli maguzuvurukum na, i sa ga ɓa a zumaka useˀ ngi vu taŋ tehhe a muŋ. A sa wam ti pumbus taŋ tehhe a muŋ, kaɓa mawam ti mbaazla mabo jor jor tir mutusu. Dar mizli misi ti siifahay gar a sa sinaka muduba, maluhukumo, i ya Bumbulvuŋ, mimbiɗi hirnga kumo, i ya bugawla ngi Zakop.»