EZAYI 21 - Bible en langue guiziga

Hirwuy Babiloŋ mikiɗ mi

¹ Tila mi vur li papala ngi mi mibuliy. Mesene ara so tir li papala, tir ruwuy magi zluwun. A so kaɓa musure matuwuɗa mubuliy Negev.

² I pur gwat ti kleŋ, gwat magi zluwun ani. Muvula mbur mavul cil naŋ ngi ji, mihirya gwat, mahiryi gwat. Buymisemuŋ a ɓi na: «Elamay, zlaka kiɗa vu! Medey, ndahaka walahaya! I sa kiɗa mi ngi huhumo vu walahay nah wãˀa.»

³ Ani wurenna, ɗugur duba ɗuwoyo, ara jijikam ngbaˀngbaˀ, vu ara jiy kaɓa ngwas ar li yi. I ro ar li lik haɗa, i cine gu ta, i ra zluwun haɗa, i pura gu ta.

⁴ Mevel anta ar haya ta, i ra jijik ti zluwuno. Li mizuyyo ngi pastaˀ ya mawuɗ zleˀe tuwa, a sa tiri avu ya i muɗa didaka.

⁵ A soko ti gwat ngi zum, mijiɗa li ara jiɗa, mizli ara zumam, ara sam. Gurjik sina, a cinam widi: Gurjik si na, i cinam widi kaˀ: «Madiɗa ngi sojehey, slikiɗam! Puyaka mal da mbaray kumoyo!»

⁶ Asi Bumbulvuŋ a ɓiy na: «Aru, cica mijiɗa li deŋ, ɓa a ɓa ɓi ngi gwat naŋ masa pura.

⁷ Da a pur mota ngi vurum le, pilisey cuw maɗiɗakaŋ, mbur ar zungu, mbur ar zlogomo na, anja a ji lesl kuy kuy, anja a ji lesl kuy kuy makaw cuw.»

⁸ Mbur mijiɗa li a widi: «Kumani, y'ada hiipas ar li ɗu ngi jiɗa li, y'ada kap ti duvuɗu deŋ ar li ɗu ngi jigina li.

⁹ Gwat masawa ani: i mbur ar mota ngi vurum, pilisey cuw maɗiɗakaŋ. Dar a ɓi: A diɗ le, hirwuy Babiloŋ a diɗ le! Kuli naŋhay mideŋ deŋ zleˀe gar, a roko meɗ meɗ, kurosso a ruwuy.»

¹⁰ Kum mizli ɗuwoy, Bumbulvuŋ mukuɗukum kaɓa maɗugom daw a məlaŋ na, i cino gwat hana avu Bumbulvuŋ, misi gidaŋ wãˀ, Buymisemuŋ ngi Israyel. I tilukum mi ti ɓi nah le.

Duvuɗo naŋ mbrike?

¹¹ Tila mi vur walahay Duma. A ra wudoko ng'avi ya ti Seˀir, a ɓikiy: «Mijiɗa li, duvuɗo naŋ mbrike? Mijiɗa li, duvuɗo naŋ mbrike?»

¹² Mijiɗa li a mbiɗa: «Li ara wun, amma i duvuɗ aruŋ na si. Da ki wuɗam, ki cufuɗikiy ava na, sey kisa moko aruŋ.»

Mizli ngi Dedaŋ ati ngi Kedaray makilam

¹³ Tila mi vur hirwuy Arap. Kum muzuɓa mulak hiɗim hiɗim ngi Dedaŋhay, ti duvuɗo, kisa ra hinam a wuzla widis mingriɗ ngi ruwuy Arap.

¹⁴ Kum mizli ngi ruwuy Temahay, mizli misi yam ara ga taŋ na, ara jam taŋ hirnga, a raka taŋ ti yam. Mizli mira kilam le na, kilam nga mbuŋ taŋ, a raka taŋ ti gwat ngi zum.

¹⁵ Asi ara kilam vur kiɗ ti maslalam, vur maslalama, i mupuka le pak, leke, i mihila le hac, a kilam vur kiɗa vu a bul vu le.

¹⁶ Bumbulvuŋ a ɓiy na: «Andir vi pal aruŋ, i vi kaɓa ngi soje migi slra ngi dalahay, dudok ngi ruwuy Kedar a sa kiɗ mi wãˀ,

¹⁷ yo a wuzla soje ngi Kedaraya, misi lekey waɗ migi vurumoyo, a sa ndiram neˀkini si.» I ya Bumbulvuŋ, Buymisemuŋ ngi Israyel miɓa.