EZAYI 16 - Bible en langue guiziga

Hirwuy Moˀap mucufuɗ jini avu Zeruzalem

¹ Buy Moˀapay a ɓam: «Anja a slinoko ti zlengerek da buy ngi ruwuy Zuda, zle ar walahay Sela, bal ti wuzlaɓuh, da buy Zuda a muwã Siyoŋ.»

² Ngwas Moˀapay a ndiram ar li tuwuɗa mizaw Arnoŋ kaɓa ɗiyuwoy makilam aka aka, asi a ɓulaka taŋ le tir hay taŋhaya.

³ Ngwas Moˀapay a ɓaka walahwuy Zeruzaleme: «Inga vula ndra kuti, juw ɓi kaˀa. Ti wuzla papas hana, sirta ndra sirit, kaɓa duvuɗ masirta li ti luvuŋ naŋ, ɗumo moholoy ndraˀahaya, ndra makilam na, ki njika ndra ta.

⁴ Pula jiviɗ da moholoy ndraˀahaya, a cifam asi hirwuy ɗike, anja ki vulaka taŋ li ɓa a ɗumom mbur mangizla taŋ na. Mbur mangizla ndra, naŋ anta sa ndir ti siifa ndrehhe ta. Ɓi ngi ngizla vu a sa kiɗ mi. Mbur mingizl ndra a sa pula hirwuy ndra.

⁵ Akẽh na, zuma buyo, a sa ndir gidaŋ gidaŋ ndrehhe ti gi mezle ɗik na. Ar guɗuk ngi Davite, mbur miteŋteŋ a sa cifi ara ngi gi kiita, hiri ɗeŋ ɗeŋ ngi ga ɓimuɗuva mitaˀ gar, waɗ a sa wus vu ngi gi gwat mijeŋŋe ma.»

Zeruzalem anta ga gwat neˀ da Moˀapa gu ta

⁶ Huhumo vu mifineˀ gidaŋ ngi Moˀapay, hirsa vu taŋ, huhumo vu taŋ, cici taŋ ar ɓi purla ta, ati gi taŋ zlokoko lambaˀ na, ndr'i cinam ɓi naŋ le.

⁷ Na wurenna, Moˀapay ara tuwam vu taŋ tehhe, ara tuwam cek. A likam maɗaf ngi gudubun mutos tos ar vu, madaka a ruwuy Kir-Herese. A likaka haɗa hã a niˀicam, a hĩhĩyam di wãˀ.

⁸ Asi ɓuh ngi Heseboŋhoy a hiryi le. Guva ngi gudubun ngi Sipma, mbaazla naŋ mawa buy ngi sukwi ngi mizli ɓaˀ ɓaˀ na, a zli zle a Yaser hã yik nga wuzlaɓuh mikirɗak kirɗaka, yo mihaŋ naŋhay a ndilam sesẽŋ ar mubuliy.

⁹ Ani wurenna, i ra tuwam ati mizli Yaserey ar gudubun ngi Sipma. Heseboŋ ati Elale, i ra bunukum ti tuwuy ngi hiri ɗu: Ar li ngila gudubun kum ati gi sifi kumoyo, salalay a kiɗ mi le.

¹⁰ Ar guva ngi widis kumoyo, cira hiri ati mumul anta mata, yo ar guva ngi gudubun kumoy misi ar miɗingire, zluzluɓ anta mata, jiɗa mececẽleŋ anta mata. Anta ɗucom gudubun ar kisahaya mata, salalayay a kiɗ mi le.

¹¹ Hur kwacay ɗu ara jijik kaɓa gujuvur ar Moˀapaya. yo mevel ɗu ara niˀic ar Kir-Herese.

¹² Mizli a sa puraka Moˀapay masa giram ng'ar li miɗingirey, ɓa a ram nga tumbulo Bumbulvuŋ ar hay naŋ, amma i ngatara na si.

¹³ Hana i mingi ɓi Bumbulvuŋ miɓa ar Moˀapay zleˀe zlezle.

¹⁴ Ani wurenna, Bumbulvuŋ a ɓi na: «Vi makir aka na, vi ngi gi slra ti dala, ko mizli madiɗa ngi Moˀapay, ko mizli ngi si ruwuy naŋ taˀ gar, anta sa lumam dudok mata. A sa ndiram mizli njiraˀ kini, i ngi sluf ta.»