EZAYI 11 - Bible en langue guiziga

Buy mijeŋŋe masa ya ka ar sukwi ngi Davit

¹ Mangal mizile a sa bawa ar sukwi ngi Zese, mihaŋ ngi widis a sa bawa avu slaslalak.

² ˀUf ngi Bumbulvuŋ a sa pi sar ar naŋ: i ˀUf mavul sinmijileŋ ati sli wala ngi gwat, i ˀUf ngi kuta vu waɗ ngi gi wirwir, i ˀUf ngi si na gwat waɗ ngi zluwun ti Bumbulvuŋ.

³ Joˀ zluwun ti Bumbulvuŋ a sa gaŋ kuyyo, naŋ anta sa ga kiita weˀe avu hiri mapura ta, naŋ anta sa juwa ɓi, asi a ɓam na ta.

⁴ Amma mizli hĩhĩyahaya, a sa ga taŋ kiita taŋ jeŋŋe, a sa ga gwat mikaslsla da misi murga ngisi ruwuyoyo. Mingiɓi naŋ a sa kiɗa hirwuyo, kaɓa makiɗam vu ti ganday, yo mi mabo ti balama, a sa kiɗa misi moˀoreheye vagay vagay.

⁵ Gi jeŋŋe, i kanda ngi dingiriŋ naŋ, gi teŋteŋ, i zeweɗ naŋ ngi tuwuɗa kwacay.

⁶ Kiri ɓuh a sa hinam ati zuŋ tumuŋ arleˀe, kokoyta a sa hin gweˀ avu zuŋ ˀaw, zuŋ sla ati zingaˀ ngi moboro, a sa zumam arleˀe, i mangal meciɗek masa jigina taŋ.

⁷ Sla ati luˀuf a sa zumam ar guva purla, ziri taŋhaya, a sa hinam ar kuɓuŋ purla. Mobor a sa zum murbuc kaɓa sla.

⁸ Zuŋ gaza a sa gi dungur a mi vigiɗ ngi govoŋ. Mangal meciɗek a sa tiɗa haŋ a mi vigiɗ ngi kwecesle.

⁹ Ar muwã mipal ngi Bumbulvuŋ na, mizli anta sa gam malambaˀ mata, anta sa guzuvuram vu mata. Naŋ kine, Bumbulvuŋ a sa naha hirwuyo ti sin naŋ, kaɓa yam manaha mubuliy.

¹⁰ Ti hin nah na, dideˀ ngi Zese a sa ndir kaˀ kaɓa drapo da mizli. Mizli gar a sa cufuɗam kuti ava. Dudok ngi Buymisemuŋ a sa wucuɗ ar li naŋ masa cifi ara.

Mizli muɓulahay mumoko nga Zeruzalem

¹¹ Ti hin nah na, is ngi mizli ngi Buymisemuŋhoy mindiram a Asiri, a Ezipte vay ruwuy, a Ezipte vay muŋ, a Sudaŋ, a Elam, a Babiloŋ, a Hamat-ngi-Siri waɗ ar matura ngir mubuliyey na, Bumbulvuŋ a sa ska haŋ ng'ar taŋ ngi mbiɗo hirnga taŋ ava ma,.

¹² A sa ngi gwat kaˀ da sukwi ngi mizli, ngi biga taŋ gwat naŋ masa ga, a sa jumo hirnga ngi mizli Israyele muɓulahaya, yo mizli Yudehey mizlaɗ a si gazlavay gar na, a sa kuso hirnga taŋ.

¹³ Suloŋ ngi Efrayim a sa kiɗmi, mizli mazliram ti Zudahay ta na, a sa ngizlaka taŋ, Efrayim kwana, anta sa gi suloŋ ti Zuda mata, yo Zuda kwana, anta sa gi mesene ti Efrayime mata ya.

¹⁴ A sa jumom, a gidiɗaka Filistiheye ng'asi pas ngi pastaˀa, ng'ar muwã taŋhaya, a sa vaka gwat ngi mizli misi tisi pas ngi miprikeye. A sa waka Edom ati Moˀapaya, dar mizli Amoŋhoy a sa gam cunuˀcunuˀ a mbuŋ taŋ.

¹⁵ Bumbulvuŋ a sa hisika yam ngir mubuliy mici zoɗ nga Ezipte kããk, a sa ska haŋ bur bur da mizaw Efrata, a sa ˀufo himiɗ ti gidaŋ ti balam naŋ, a sa wunka mizaw Efrat a wuzla tarnaˀ, ko ti mapiyapiya a sar kwana, a tuwuɗakaŋ.

¹⁶ ˀIs ngi mizli naŋhay mindiram ti siifa a Asiri na, a sa ka taŋ jiviɗ bir purla. A sa gi kaɓa naŋ mika bir purla da Israyeley, ti taŋ maboko ti ruwuy Ezipte na ya.