EZAYI 10 - Bible en langue guiziga

Mizli magaka gwat ngi ji mevel da Bumbulvuŋ

¹ Mizli majuwam ɓi ngi gi malambaˀhay yo matohom gwat toh toh ar ɓi maso ti mendere na, kay taŋ ar bonoy.

² Anta gam kiita mijeŋŋe da mizli hĩhĩyahaya ta, gwat ngi gi zuyo, a tikaka misi murga ngi si mizli ɗuwoyo, ɓa a gaka ta. A zumaka wudigahaya, a vaka gwat ngi mutuhuhoyo.

³ Ti hin Buymisemuŋ masa kuti vu ti bonoy, yo burgataŋ masa so zle kileŋ na, kisa gam mbrike? Ki sa kilam ng'avi wa ɓa a jini ˀis asi kumo ka? Ki sa paka zlili kumoy amaka?

⁴ Mindir sey ki hurukom duba a wuzla mizli dangayay, sey ki ndilam ɓaˀ ɓaˀ a wuzla mizli mumucahay. Amma, bam ti nah kwana, mevel ngi Buymisemuŋ a tisl t'aruŋ, a ro haŋ pak ng'ar kum aruŋ na si.

Kuw ngi Asirihey a fini gidaŋ le

⁵ Buymisemuŋ a ɓi na: «Hirwuy Asiri, i tokom ngi haŋ ɗu, kay naŋ ar bonoy. I sa biga mevel ɗu ti ganday mikaw ngi haŋ naŋ vuna.

⁶ I slina soje naŋhaya nga ga bonoy da sukwi ngi mizli misi moˀorehey, i pula taŋ a zliram dibiɗ ati mizli maslikiɗikiy mevel, ɓa a hilaka gwat taŋhaya, a vaka taŋ, ɓa a kirpaka taŋ a si sar kaɓa ndileɓ a jiviɗi.

⁷ Amma soje naŋhaya a cinaka kanah ta, a wulkaka a mevel taŋ kanah ta. Asi a wulkam nga taŋ, i ngizl taŋ, ɓa a susuymom sukwi ngi mizli haɗa.

⁸ Taŋ a ɓam na: «Madiɗa ngi soje ndraˀahaya taŋ haɗa kaɓa buy taŋhay vuna takwa?

⁹ Walahay Kalne a gam di kaɓa hirwuy Karkemis na takwa? Malla Harmata, a gam di kaɓa Arpat na ta kwa? A gam ti ruwuy Samari kaɓa migam ti ruwuy Damas na ta kwa?

¹⁰ Da i ja zumabuy ngi kuli taŋhaya le asi haŋ, da kuli miciɗa ti ciɗ taŋhaya, taŋ fineˀ misi a Zeruzaleme ati misi a Samari na,

¹¹ gwat ya miga da ruwuy Samari waɗ da kuli naŋhay na, naɓa yi sa ga da ruwuy Zeruzalem ati kuli naŋhaya ta wal kwa?»

¹² Amma ti Bumbulvuŋ misa kiɗa mi ngi slra naŋ le gar a muwã Siyoŋ waɗ a Zeruzaleme na, buy Asiri mahuhum vu, yo naŋ mahiris vu na, Buymisemuŋ a sa kutaŋ ti bonoy.

¹³ Asi buy Asiri a ɓi: ‹Ya miga gwatay gar na, ti gidaŋ ngi haŋ ɗu, waɗ ti sin ɗu mijileŋ, asi ya ti lesle. Maakway ngi sukwi ngi mizli, i susuyumo taŋ le, yo gwat taŋ muwam di vu, i va taŋ le pay. Mizli mijoˀ ar janga ngi buyoyo, i putukuso taŋ le a ruwuy kaɓa bugawla.

¹⁴ I ca haŋ le ng'ar zlili ngi mizli kaɓa macam haŋ ng'ar hay ngi ɗiyuw. Yi hila gwat ngisi ruwuyo le cek, kaɓa mahilam tesl ɗiyuw mupula le ar haya, mbak ko mbur loŋ muwus anta, ngi wuna mi malla ngi tuwuy anta.›

¹⁵ Zlimbe ada huhum vu mbak mbur mangum di gwata kwa? Gwat ngi cira dum ada vul ɗongor da vu naŋ mbak mbur magi di slra kwa? Naŋ kine ya, tokom anta kiɗa mbur mapuka ta, ganday anta zuɓa haŋ ngi mbur magidi slra ta!

¹⁶ Vurˀe, Bumbulvuŋ Buymisemuŋ, misi gidaŋ wãˀa, a sa ga ɓa mizli naŋ muzlumbrahay a zaham. Yo vu a sa tiɓi asi virzi ngi dudok taŋ, kaɓa hay mawur.

¹⁷ Bumbulvuŋ, li njah ngi Israyele, a sa tiri vu, yo Buymisemuŋ mipala, a sa tiri irne vu ɓa a wura, yo a zuma sisimey ati hadawaya pay hin purla si.

¹⁸ Ɓuh misi widis ngiriɗ ati widis ngi zumoy mikuy teˀ na, a sa wura taŋ zlizlir zlizlir kaɓa jiji masuɓ mbur.

¹⁹ A si ruwuy Asiri, widis ngiriɗ, a sa ndir neˀkini, ko zuŋ kwana, a slufa taŋ slaf gu.

Mizli Israyeley mindiram ti siifa

²⁰ Ti hin nah na, mizli Israyeley mindiram ti siifa ati is ngi hay Zakopoyo, anta sa wuɗam jiniˀis ngi mbur mikiɗ taŋ zleˀe na mata, Amma a sa wuɗam jiniˀis migisiŋ gisiŋ ngi Bumbulvuŋ, Buymisemuŋ mipal ngi Israyel.

²¹ Is ngi sukwi Zakop mindiram, a sa moko, a sa moko ng'avu Buymisemuŋ migidaŋ.

²² Aw sukwi Israyel, da ko mizli kumoy taŋ haɗa kaɓa muyuŋ a mi mubuliy kwana, masa moko ng'avu Bumbulvuŋ i mizli mindiram neˀkini na si. Ɓi ngi ngizla mizli i ɓi micica le, amma kiita mijeŋŋe, a sa zuɓ ka mekepel.

²³ Ɓi ngi ngizla mizli i ɓi micica le gisiŋ, Bumbulvuŋ Buymisemuŋ, misi gidaŋ wãˀ, a ga asi ruwuy Israyel gar.

Ki zluwunam ti ruwuy Asiri ta

²⁴ Vurˀe, ya Bumbulvuŋ Buymisemuŋ, misi gidaŋ wãˀ i ɓi na: «Aw mizli ɗuwoy misi a Siyoŋ, mizli ngi si ruwuy Asiri makiɗukum ti tokom, yo mazuɓam ganday ng'ar kum kaɓa mizli Eziptehey magaka zleˀe na, ko ki zluwunam ti taŋ ta.

²⁵ Asi hin ada neˀ aruŋ, hin neˀkini si, mevel ya miji ar kum na, a sa kiɗ mi, amma himaˀ ɗu a sa mbiɗi ng'ar taŋ, a ngizla taŋ.»

²⁶ Bumbulvuŋ, misi gidaŋ wãˀ a sa duduɓa lawaya ng'ar taŋ, kaɓa naŋ mikiɗa mizli Madiyanay ar mandazlay muwã Orep na. Yo a sa ska ganday naŋ ng'ar mubuliye, kaɓa naŋ misika ngi ngizla Eziptehey na ya.

²⁷ Ti hin nah na, jijir ng'ir pepesl kumoy ati galalaŋ migindiɗ asi ˀay kumoyo, a sa cuko taŋ avra. Galalaŋ a sa diɗ, dar gwat a sa gi ka zay.

Mesene ngi Zeruzalemey taŋ gweˀ ava

²⁸ A sa soko gweˀ a ciki Ayat, a cuhom bal ti Migroŋ, a pulaka gwat taŋhay a Mikmasa.

²⁹ A tuwuɗaka mizli maram hiɗim hiɗime, a ɓam: «I sa hinam a Geba!» Mizli ara jijikam kirkir, mizli ngi Ramahay ara jijikam kirkir mizli Gibeyahay, ruwuy ngi Sawulo, ara kilam.

³⁰ Mizli Galimey, wudam ti gidaŋ. Hirwuy Laysa, cin. Hirwuy Anatot, mbiɗi mingiɓi.

³¹ Aw Anatot ɗu, mizli Matmenahay ara kilam le. Mizli Gebimey ara ɗumom.

³² Ti hin nah vuna, mesene taŋhay a cicam a Nopo. A sa ska haŋ bur bur da muwã Siyoŋ, da li miɗingir ngi Zeruzaleme.

³³ Puraka, Bumbulvuŋ Buymisemuŋ misi gidaŋ wãˀa, ara mbizla mihaŋ ngi widiseye ti gidaŋ. Widis mijek jekey a mbizlam le, misengel sengeleye, a ndilam le a ruwuy.

³⁴ Widis memeɗe mingiriɗ asi dumo, a ngmaka taŋ le ti zlimbe. Miter mukuy teˀ ngi Libaŋhay a mbuzlam le.