ESTER 8 - Bible en langue guiziga

¹ Kalla tapasa vuna si na, buy Zerses a vula zlili ngi Haman, mesene ngi Yudeheye gar da maˀãy Ester. Yo ma na, Ester a njika da buyo muduba, Mardoke i jamba naŋ. Joˀ Buy a ɓi ɓa a soko ti Mardoke nga mbuŋ naŋ.

² Buy a cuko dangwa ngi muzuŋ haŋ, naŋ mitiɓa a muŋ avu Haman tuwa, a vula da Mardoke. Waɗ ma na, Ester a cifa Mardoke ɓa a wa zlili ngi Hama na gar.

Buy mupula jiviɗ da Yudehey ɓa a cikam vu ngi laha hutuŋ taŋ

³ Ester a ɓa buyo ava ma. A hin huruk a mbuŋ buyo dar a tuwuy, a tumbuloŋ, ɓa bonoy ati gidiɓi, Haman, mbur Agak mujuwa a mevele ngi ngizla Yudehey tuwa na, anja ɓa buy a kiraha ɓi nah avra.

⁴ Buy tuwa, a tila ganday naŋ ngi ɓiri tapasl tapasl til da Estere. Akẽh na, Ester a slikiɗ pirtaˀ deŋ a mbuŋ buyo.

⁵ Ester a ɓi: «Kumani, da ki puriy le kuy, ki hĩhĩy le na, ɓi anihĩ. Haman, mangal ngi Hameda, mbur Agak. A gi gidiɓi le, waɗ toh toh ɓi nah ar ɗerewol, ɓa a ngizla Yudehey misi angi hirwuy ka mazum buy anga gar. Da a zlir le avu ka, yo da a cǝruw hiri le na, anja a tohom ɗerewol toh toh le ngi tika ɓi nah avra.

⁶ Bonoy masa so ar mizli ɗuwoy na, ɓa i pura ti hiri na, i ɓusa ɓi nah gu mbri mbrike? Muy ɗuwoy masa ngizlam na, ɓa i pura ti hiri na, i ɓusa ɓi nah gu mbri mbrike?»

⁷ Buy a mbiɗa da maˀãy Ester ati Mardoke, mbur Yude: «Ani wurenna, i vula zlili ngi Hama na le gar da Ester. Yo Haman vuna, naŋ a luwaka le avu dum, asi naŋ muwuɗ kiɗa Yudeheye gar vagay vagay na.

⁸ Amma kumo so na, tohoko ɗerewol da Yudeheye gar ti slimiɗ ɗu, kaɓa kum muwuɗam le, yo ɗuvaka haŋ ara ti dangwa ngi muzuŋ haŋ nga ya buyo. Asi mike na, ɗerewol mutohoko le gar ti slimiɗ ngi buy na, a ɗuvaka haŋ ngi buyo taˀ le anga ti dangwa ngi muzuŋ haŋ naŋ. Kanah so na, ɗerewol mutoho nah na, anta mbiɗi ta wãˀ.»

⁹ Hirak ti hin nah vuna si na, a ziloko mutoho ɗerewol ngi buyoyo. Naɓa i kiya mimakir naŋ, a mbiɗeˀvra, kiya Sivaŋ, ngi hin mizli ngir cuw nga makir naŋ. A tohoko letireye kasl kasl kaɓa Mardoke muvula taŋ ɓi nah. A tohoko da Yudehey, da mijingaˀ ngi buy miwi lihey ati buy miwi lihey, da mizli madiɗa ngi slrahay misi ar li ngi buy miwi lihey mitaˀ taˀ skat ti kukur cuw nga tarnaˀa. A zli zle a Eŋde, hã sesẽŋ a Etiyopi. Li buy miwa le gar na, a tohokoŋ di ka toho gwat taŋ, ti mi ngi mizli ngi mizli, yo da Yudeheye ti toho gwat taŋ, yo ti mi nga taŋ maɓam di.

¹⁰ A tohoko letireye ti slimiɗ ngi buy Zersese so, a ɗuvaka haŋ ar taŋ ti dangwa ngi buyo. Akẽh na, a slinam ti letireye ti haŋ gawla ngi buyoy, mizli gilaˀ gilaˀ ar pilis muwunaˀ ti winihey, buy muvulo taŋ.

¹¹ Ɓi mutohoko a hur letir vuna ani: Buy a pula jiviɗ le da Yudehey ar hirwuy taŋ misi anga gar, ɓa a jumom arleˀe ngi laha hutuŋ taŋ. Da sojehey malla mizli ngiˀr li buy miwa taŋ mukusom le, ɓa ngi guzuvura Yudeheye na, anja Yudehey vuna, a kiɗaka taŋ vagay vagay, a ngizlaka taŋ, yo a zizaka taŋ hutuŋ. Ko da i ziriy ati ngwasay kwana, anja a ngizlaka taŋ, a hilaka zlili taŋhaya.

¹² A pulaka taŋ jiviɗ ngi ga slra hana ar hin purla asi hirwuy, buy Zerses miwa miwa gar, ar hin mukuruˀ nga makir ngi kiya mukuruˀ nga cuw naŋ, a mbiɗeˀvra, kiya Adar.

¹³ Ar li ngi buy miwi li gar na, letir nah tuwa, a sa tiri i ɓi micica, a tilam di mi da mizli gar. Kanah na, ɓa Yudeheye, a wam vu weˀ le angi hin muɗuva tuwa, ɓa ngi pula cuwal ar mesene taŋhaya.

¹⁴ Buy miɓi ɗaˀ si na, gawla naŋhay a wusam vu, a bam gilaˀ gilaˀ ar pilisey, buy muvula taŋ di tuwa, a kilam ti letireye, dar a tilam mi ti ɓi micica ngi buyo a Sus, walahay hirnga.

¹⁵ Akẽh na, Mardoke a bo ta hay buyo, zana ngi buyoy ɓaˀ ɓaˀ avu vu, zana gagaza midira ngboɗoɗ, loppol ngi ɓiri tapasl tapasl njiv a hirnga, waɗ godo ngi gugumay mislirkeɗ, babara lahaɗ ti gagaza, gijaw avu vu. Walahay Sus gar na, ara ji salalay, ara zluzluɓ.

¹⁶ Amma avu Yudeheye na, i cine ndum, i mumul, jiɗa mececẽleŋ, yo i luuma bugawla ma.

¹⁷ Ar hirwuy ngi buy miwi li gar, ar walahay madiɗa gar, ɓi buy miɓa le ati ɓi naŋ ɓi micica, mindil le a diga gar na, avu Yudeheye, i mumul ati jiɗa mececẽleŋ, yo i muguzlum, i hin ngi zuma gwata. Mizli haɗi asi ruwuyo a tiram Yudehey, asi ara zluwunam ti Yudeheye haɗa.