ESTER 7 - Bible en langue guiziga

Ɓi mutuwaˀ muluma Haman waɗ naŋ mumucu

¹ Buy ati Haman a ram ng'ar ɗaf ngi muguzlum ngi maˀãy Estere.

² Ar hin mucuw naŋ, ɗaf ngi muguzlum mikiɗ mi na, buy a mahiri ngi cufuɗa Estere ma: «Maˀay ɗu Ester, ki cufuɗ i gwat mi avu ya, ɓa i vuluw di naka? Gwat ka mawuɗ i mike? Ko da i reta avu zumabuy ɗu tekeɗe kwana, i vuluw di.»

³ Ester a zilaŋ mi, a ɓaŋ di njak muduba: «Haˀaw kumani ɗu, da ki puriy le kuy avu hiri ɗike, yo da ki hĩyã le na, gwat ya macufuɗ avu ka n'anihĩ: lihiy siifa ɗu, yo i wuɗ anja ki laha siifa ngi mizli ɗuwoyo ma.

⁴ Asi mike na, ndra ati mizli ɗuwoyo, a hiɗikam ndra le avra: Wurenna, ndr'i mizli ngi kiɗ vagay vagayay, ngi ngizl, yo ngi zizi kuɗup wãˀ avra. Naŋ kine, da ndr'i mihiɗikahay zleˀe, ɓa a gam ti ndra beke mizile ati mongosohoy na, anja ya teˀ zleˀe si, i gwat ɓa hã i giruw ka buyo zleˀe ta.»

⁵ Buy a cufuɗa maˀãy Ester tuwa: «Muwuluk ɓa a gi gwat kanah vuna i waka? Buy naŋ amaka?»

⁶ Ester a mbiɗaŋ di: «Mbur mazlir ti ndra ta, yo i mesene ndra ma na, i Haman, mbur mihirya wãˀa.» Ɓi misenna a zliɗa lesl da Hama na daˀ a mbuŋ buy ati maˀãy tuwa akẽh si.

⁷ Buy a slikiɗ himaˀ, a bi tir li zumo, aru ng'ar jarne misi a hay akẽh. Haman tuwa, a pura na, buy a juwa le a mevele ngi zizaŋ hutuŋ, a tumbulo maˀãy Estere, ɓa a lahaŋ.

⁸ Ti buy mumo tir jarne naŋ misi a hay akẽh tuwa na, naɓa Haman a diɗ le ndirɗaɗ ti virzi ar arngawo ngi Ester mamusuk vu anga na. Buy a buc, a ɓi: «Ko ti ya misi ada a haya kwana, Haman a wuɗ ɓa a ja maˀãya gbaˀ na si mbrike?» Ɓi misenna mubo put ti balam buyo si na, gawla ngi buyoy a soko, a sirtaka hiri ngi Hama na sirit ti zana.

⁹ Harbona, gawla purla a wuzla gawla munguɗohoyo, a ɓa buyo: «Mobor, Mardoke, mbur miɓa ɓi ngi laha hutuŋ ɗik na, Haman vuna a ɗiyi dum ngi luw naŋ le zleˀe a hay naŋ gisiŋ. Dum nah i minga le kaˀ a hay Hama na, dum ngi metir kukur cuw nga zlum.» Joˀ buy tuwa, a ɓi ɓa ara luwaka Haman vuna anga.

¹⁰ Dum, Haman miɗiya ngi luwa Mardoke tuwa na, a luwam di Haman vuna tehhe a muŋ. Dar buy a tisla mevele.