ESTER 6 - Bible en langue guiziga

Sey Haman muɗuva hirnga da Mardoke

¹ Ngi duvuɗ nah na, buy anta hinje gu ta. Ɗerewol mutohoko ɓi ngi wuluk ngi zumabuy anga na, buy a ɓi ɓa a zuɓoko di, i ɗerewol ngi ɓi ngi buyoy. Jo ˀ a slufaka a mbuŋ buyo.

² Mizli munguɗohoy mucuw, ti Bigtaŋ ati Teres, mizli mijigina miviŋ ngi buyoy, taŋ mupuram jiviɗ ɓa a kiɗaka buy Zersese vagay zleˀe, Mardoke minjika ɓi nah tuwa na, a lumaka ɓi nah anga.

³ Akẽh na, buy a ɓi: «A vulaka madiɗa le da Mardoke vuna kwa? Yo a wurkakaŋ le vurˀe kwa?» Gawla naŋhay a mbiɗakaŋ di: «Ko a wurkakaŋ neˀ le ta.»

⁴ Dar buy a ɓi: «Misi a mamay i waka?» Dambalaka na, Haman a so le, naŋ da a mamay buyo. A wuɗ ɓa a ɓa buyo a luwaka Mardoke avu dum naŋ miɗiya tuwa.

⁵ Gawla ngi buyoy a mbiɗakaŋ di: «Misi a mamay i Haman.» Joˀ buy tuwa, a ɓi ma: «Ɓakaŋ ɓa a cawa.»

⁶ Haman tuwa muco na, buy a ɓaŋ: «Mburo, da ya buy muwuɗ le ɓa a ɗuvakaŋ hirnga na, a gakaŋ mike?» Haman a ɓi a kwacay naŋ: «Buy vuna a wuɗ a ɗuv di i hirnga da wa, mbak ya le maka?»

⁷ Haman a mbiɗa da buy tuwa: «Kumani, da buy a wuɗ ɗuva hirnga le da mbur na,

⁸ a zuɓoko zana ngi buy maka na, a joko pilis ngi buyo waɗ a tuwuɗakaŋ hirnga ti loppol ngi buyo.

⁹ Zana ati pilis tuwa, a vulaka taŋ a haŋ madiɗa ngi gawla ngi buyoyo. Akẽh na, gawla ngi buy a ka zana da mbur, buy mawuɗ ɗuvaŋ hirnga tuwa, a zuɓaŋ ar pilise, a liˀi di deŋŋe jiviɗ madiɗa ngir walahaya, a til mi a mbuŋ naŋ, a ɓi: ‹Mbur, buy muwuɗ le ɓa a ɗuvaŋ hirnga na, a gakaŋ kahana.»

¹⁰ Ar nah kẽh na, buy a ɓa Hama na: «Wus vu kutum, zuɓa zana, ja pilise, ara ga kaɓa ka miɓa vuna, da Mardoke, mbur Yude mua mizlingre na. Ɓi ka miɓa taŋ gar na, anja ki pul pal le ta.»

¹¹ Haman ara zuɓo zana, a jo pilise so. A ka zana da Mardoke, a zuɓaŋ ng'ar pilise, a liˀi di ar jiviɗ madiɗa ngir walahaya bal ti tila mi a mbuŋ naŋ: «Mbur, buy muwuɗ le ɓa a ɗuvaŋ hirnga na, a gakaŋ kahana.»

¹² A dirba nah na, Mardoke a mi nga mamay buyo amma Hama na, a wus vu ngi hay naŋ, hirnga jik a ruwuy ti mesem.

¹³ Haman a slufa ɓi nah gar da ngwas naŋ Zeres waɗ da ngama naŋhaya. Ngwas naŋ ati mizli mavulakaŋ kuti, a ɓakaŋ: «Mardoke, ka mizla hina hirnga a mbuŋ naŋ ti tika ˀay na, da i mbur Yude gisiŋ na, k'anta kisa tikaŋ ˀay neˀ gu ta, kisa ndir ti hina hirnga a mbuŋ naŋ ndrehhe na si.»

¹⁴ Ti taŋ mira ɓam ti ɓi aruŋ si na, mizli munguɗo ngi buyoy a ndiloko ɓuyoh, a jaka Hama na, a ram di ng'ar muguzlum ngi Estere.