ESTER 4 - Bible en langue guiziga

Mardoke mucufuɗa Ester ɓa a jinaŋ

¹ Mardoke micina ɓi nah cin na, a ngira zana naŋ ngi vu vuhoy avra, a ki zana ngi vagay, waɗ a pi fucu a hirnga. A bi puɗak walahaya bal ti widi kaɗam kaɗam.

² Akẽh na, Mardoke a ndil sesẽŋ a mizlingre buyo waɗ a cici deŋ. Asi mike na, mbur miki zana ngi vagay le na, a tuwuɗa mizlingre ngi buyo ta.

³ Ɓi buy miɓa ati ɓi naŋ ɓi micica tuwa, mindil le angi hirwuy ngi buy miwi lihey cek na, naɓa Yudehey a roko ti tuwuy ngi vagay: a gam dalyam, a tuwam kol kol, a tuwam kaɗam kaɗam, mizli haɗi a hinam ar buh, ar fucu.

⁴ Zir mongoso migi slra ngi Esterey ati mizli munguɗo migi slra naŋhaya, a soko faka ɓi nah da Estere, hã ɓi nah a zliɗa lesl da maˀãy Estere teˀe. A dirba nah na, Ester a slin ti zanahay da Mardoke, ɓa a cuko zana ngi vagay na avra, a ka tayna. Amma ko Mardoke a ngum ta.

⁵ Akẽh na, Ester a zila Hatak, mbur munguɗo, buy muvulaŋ di ngi gi slra a mbuŋ naŋ. A slinaŋ ng'avu Mardoke, ɓa a ra cufuɗaŋ, i gwat mi migi ka, yo a gi kanah vur mike kini.

⁶ Hatak a bi, ara ji hirnga ti Mardoke ar li mizli macikilam a diga, puɗak ar mizlingre ngi buy.

⁷ Gwat migi gar na, Mardoke a njika da mislin ngi Estere, yo Haman miɓi ɓa a sa vul dala haɗa ngi pi ng'ar zlili ngi buyo ɓa a ngizlaka Yudeheye na, a ɓaŋ di ma.

⁸ Ɗerewol ngi ɓi micica mitilam di mi a Sus, ɓa ngi ngizla Yudehey tuwa, Mardoke a vula da misline, ɓa ara biga da Ester vuna. Mardoke a ɓa Hataka, ɓa ara fa ɓi nah da Estere, ɓa Estere kwana, aru ng'avu buyo ara tumbuloŋ, ara tuwuy a mbuŋ naŋ, ɓa buy a pura ircece da mizli naŋhaya.

⁹ Mingiɓi ngi Mardoke miɓa gar na, Hatak a so slufa ɓi nah da Estere cineˀe.

¹⁰ Ar nah kẽh ma na, Ester tuwa, a slina Hataka ng'avu Mardoke a muŋ, ɓa ara ɓaŋ na:

¹¹ «Ko waka gar, mbur mizile malla ngwas mira ru nga ciki buyo da i naŋ mizilaŋ ti zil ta na, a kiɗaka mbur nah vagay cummo. A juwam ɓi le vurˀe kahana. Ɓa mbur nah a ndir ti siifa na, sey da buy a sikaŋ ganday ngi ɓiri tapasl tapasl nga naŋ buy na le far. Gawla ngi buyoy ati mizli ng'ir li ngi buy miwi lihey, naŋ mazum buy anga gar na, a sinaka ɓi nah le kahana. Ani ya, i gi le dana hin kukur makir, manja a zilikiy, ɓa i ru ng'avu buyo.»

¹² A sipaka mingiɓi ngi Estere da Mardoke kanah.

¹³ Mardoke a slin, a mbiɗa hirnga da Estere, a ɓaŋ: «Vur ka ki maˀãy a hay buyo na, ki wuluk i ka pal ɗik masa lih a wuzla Yudeheye ta ɓula.

¹⁴ Ani, da ki cifi le teˀteˀ ar ɓi misi kahana dana na, Yudehey a sa lumam jini tir li mekelem, yo a sa laham ɓula so, amma ka ati mizli ngi hay kumoyo kisa ngizlam kuɗup. Na zle, ka mitiri maˀãy na, bista, ɓa kisa cici ar ɓi misi kahana vuna, misina i waka?»

¹⁵ Dar Ester a slin ng'avu Mardoke, ɓa a ɓakaŋ na:

¹⁶ «Yudehey misi a Sus gar na, ara kuso taŋ, ɓa ki gam dalyam vur ya: gam hin makir, ki zumam gwat ta, kisam gwat ta, papas ati duvuɗ naŋ gar. Ya ati ziri mongoso migi slra ɗuwoyo kwana, i sa gam dalyam kanah ya. A dirba nah, ko ti ɓimujuwa gar na, i sa ru ng'avu buyo da a bi i ngi muc kwana, i sa muc si.»

¹⁷ Dar Mardoke a ru, gwat Ester miɓaŋ di gar na, a ga kanah.