ESDRAS 9 - Bible en langue guiziga

Yudehey haɗa a zuɓam ngi ngwasa, i sukwi mekelemey

¹ A dirba gwat tayna mikiɗam mi na, buy ngi wuzla mizli a soko ng'avi ya, a ɓikiy na: «Mizli Israyeley ati masayay waɗ leviheye, ko a wuɗukam ati mizli mulakay misi asi ruwuy hana t'aruŋ. A ra sipaka gi gwat taŋ mukuyta wãˀ na, waɗ gi gwat ngi Kanaˀanay, ngi Hitihey, ngi Perzihey, Zebusihey, Amoŋhoy, Moˀapay ati ngi Eziptehey waɗ ngi Amoriheye.

² Taŋ ati ziri taŋ mizileheye, a zuɓam ngwasaya i ziri ngi mizli tayna, mbak sukwi misi naŋ mipal na, a jihiɗam ati mizli tayna misi asi ruwuyo. Micam dumbuŋ ar gi teŋteŋ ta nah vuna, i buyoy ati mizli madiɗahay jak ma.»

³ Ya micina ɓi hana cin na, i ngira zana ɗu ati godo ɗu, i dunumo himac hirnga ɗu ati mazlamay ɗu, i ndir kupuyah a ruwuy.

⁴ Mizli gar misi mazluwunam ti mingiɓi ngi Buymisemuŋ ngi Israyele, a cikiloko nga ciki ɗu, vur mizli mijahay zleˀe mumoko ti ruwuy mulak, migam teŋteŋ ta na. Joˀ ya i ndir kupuyah a ruwuyo, hã pas ngi mikuli ngi pastaˀa.

Esdras midir dibiɗ vur muzluɓa ɓihey

⁵ Ti pas ngi mikuli ngi pastaˀ tuwa na, i slikiɗ tir ya mukupuyah ti zana ati godo ɗu mingira tuwa, i huruk huruk ti miliwis, waɗ haŋ hoc ng'avu Bumbulvuŋ, Buymisemuŋ ɗu,

⁶ i ɓaŋ na: «Buymisemuŋ ɗu, lesl ɗu a mbiɗi le, mesem ara giy haɗi ngi ɗuva hiri ng'avi ka Buymisemuŋ ɗu, asi malambaˀ ndra a ji le haɗa dum hirnga ndra, yo mungra ndra, naŋ jirngasl jirngasl haɗa, sesẽŋ a muŋ.

⁷ Zle avu dideˀ ndrahay hã dana na, i gam malambaˀ le haɗa. Asi ndra migam mungra tuwa na, ndra ati buy ndrahay waɗ masay ndraˀahaya, ndr'i muvulahay le asi haŋ ngi buy ngi si ruwuyoy, ngi kiɗ ti maslalam, ngi ji ng'ar beke, ngi zuma gwat ndrahay waɗ ngi pi mesem, kaɓa dana ani na.

⁸ Amma wurenna, a zik t'aruŋ, asi gi mezle ngi ɗik Bumbulvuŋ, Buymisemuŋ ndra na, mizli a ndiram le neˀ ti siifa, yo ki vula ndra li cifi le ar li ɗik mipal na. Naŋ kine, Buymisemuŋ ndra, ti ndra misi ar beke na, ki wuna ndra hiri le, ki vula ndra siifa le neˀe.

⁹ Haˀaw, Buymisemuŋ ndra, ko ar li gi beke ndra zleˀe na kwana, ki pula ndra mbak fuk ta. Asi gi teŋteŋ ɗik na, ki pura ndra ti hiri mezle avu buy Perseheye, a pulam ndra ti siifa, ɓa i slikiɗaka hiri ngi hay ngi ɗik, ka Buymisemuŋ ndra na, ɓa i ndiram gwatay ar diŋheye, yo ɓa ki vula ndra musuka vu a Zeruzalem waɗ asi ruwuy Zuda.

¹⁰ «Na wurenna, Buymisemuŋ ndra, i ɓam mbri a dirba nah aruŋ maka? Asi i pulaka ɓimuɗuva ɗikeye le.

¹¹ I ɓi ka mubo ndra di ɗaˀ le ani zleˀe ti balam gawla mijiviɗ ɗikey tuwa, ki ɓi: ‹Hirwuy, kum masa tiɓaka da kum na, i hirwuy misi dili, micakaŋ ar dili i mizli ngi raˀahay vuna, waɗ gwat ngi gi taŋ malambaˀ mukuyta wãˀ, taŋ minahakaŋ zlar gar ti ɓi ngi dili taŋ na.

¹² Yo wurenna, ki vulaka ziri mongoso kumoyo da ziri mizile taŋhaya ta, yo ki zuɓaka ziri mongoso taŋhaya da ziri mizile kumoyo ta ya. Ki puram jiviɗ ngi cifi zuy ati taŋ ta, yo ko ki gam zlili ti gwat taŋhaya ta wãˀ si. Kahana na, naɓa kisa lumam gidaŋ, kisa zumaka gwat mezle ngi gi ruwuyo, yo kisa pulaka da ziri kumoy hã ngi sete.›

¹³ Gwat ngi menderehey a gam le avu ndra, asi ndra migam gwat malambaˀhay, yo ndra muzluɓam ɓi haɗa avu ka. Ti nah gar na, gwat malambaˀ ndra mekelemeye, ki pula taŋ le avra, joˀ ki pula ndra, ndra mekelemeye neˀ ani ti siifa.

¹⁴ Ani i zlaka ngila ɓimuɗuva ɗikeye gu aruŋ ɓula makwa? Yo i jumom ngi ɗuva vu ati mizli migi gwat malambaˀ mukuyta wãˀ tayna gu ɓula makwa? Naɓa kisa ji mevel ar ndra, ki ngizla ndra kap, ko mbur masa ndir ti siifa loŋ anta mata takwa?

¹⁵ Bumbulvuŋ, Buymisemuŋ ngi Israyel, ka jeŋŋe, asi mike na, ndra misi ani ti siifa dana na, kaɓa is ngi mizli mindiram ti ndir. Ndrˀani a mbuŋ ɗike ti malambaˀ ndraˀahaya, dambalaka ko mbur misi kahana macici a mbuŋ ɗike anta loŋ ta ngbaŋ.»