ESDRAS 4 - Bible en langue guiziga

Ɓi mutuwaˀ muluma Yudehey avu mesene taŋhay

¹ Mesene ngi Yudehey ati ngi Benjameŋhey micinam cin, mizli mijahay nga ruwuy mulak, mimam tuwa, ara ndiram hay da Bumbulvuŋ, Buymisemuŋ ngi Israyel na,

² a ram ng'avu Zorobabel waɗ ng'avu buy ngi hay ngi wuzla mizli, a ɓaka taŋ: «I wuɗam i jumom ati kum ngi ndira haya. Asi mike na, diga avu Asarhadoŋ, buy Siri, muhulo ndra ng'aka na, ndr'ada sipaka Buymisemuŋ kumo na ya, yo ndr'ada gakaŋ mikuli.»

³ Amma Zorobabel, Yesuwa waɗ buy ngi hay ngi wuzla mizli Israyeleye, a ɓaka taŋ: «Ndr'anta jumom ati kumo ngi ndira hay da Buymisemuŋ ndra ta. I ndra pal ndra mandiraka hay da Bumbulvuŋ, Buymisemuŋ ngi Israyele, kaɓa Sirus, buy Perse mupula ndra jiviɗ naŋ na.»

⁴ Akẽh na, mizli misi asi ruwuyo, a soko ɓa a vusoko mizli Zudahaya, yo ɓa a gaka zluwun da mindira hayaya.

⁵ Diga avu Sirus muzum buy a Perse, hã avu Dariyus muzum buy a Perse ma na, ara vulaka dala da mukuti vu ngi mamay buyoyo, ɓa a tikaka slra, Yudehey muwuɗam ngi gi naŋ gar.

Mizli muwudam ti Yudehey a mbuŋ buy Artakzerses

⁶ Ti zli virzi ngi zumabuy ngi Zerses na, mesene ngi Zudahay tuwa, a tohokoŋ ɗerewol ngi widi ti mizli zudahay waɗ ti Zeruzalemeye.

⁷ Ti hin ngi Artakzerses mazum buy a Perse na, Biselam, Mitredat, Tabeˀel ati cil taŋhaya, a tohom ɗerewol da buy Artakzerses, buy Perse. A tohoko ti tuh ngi a ramihey, yo ti mi a rami vuna ma.

⁸ I Rehum, buy miwi li nah, waɗ Simesay, mbur mutoho gwata, a tohoko ɗerewol da buy Artakzersese, vur ɓi ngi Zeruzalem.

⁹ A tohoko ani: «I Rehum, buy miwi li, ati Simesay, mbur mutoho gwat, waɗ cil taŋ mekelemey, mizli ngir li mazilaka Diŋ, Afarsatak, Tarpel, Afaras, Erek, Babiloŋ, Sus, Deha, Elam,

¹⁰ waɗ mizli mekelemey, Asnapar mbur madiɗa, yo mbur hirnga mija taŋ nga ruwuy mulak, miɓi ɓa a pam ar walahay Samari waɗ ar li mindir ngi si ruwuyo, kini tisi pas ngi pastaˀ ngi Efrat tuwa.»

¹¹ Mingiɓi mutoho ar ɗerewol taŋ vuna ani: «Hana i ɗerewol da buy Artakzerses, mutuhukuw di gawla ɗikey mipam tisi pas ngi pastaˀ ngi mizaw Efrat, waɗ ngir li mekelemey.

¹² «Buy madiɗa ndra, i ra fukuw ɓi ani. Mizli Zudahay muboko baɗ tivi ka akẽh, mindiloko avu ndra a Zeruzalem aka na, ara ndiraka walahaya, hiri naŋ a muŋ, na zle i walahay mislikiɗa ɓi, yo i mukuwaŋ. A wuɗam ɓa a lumaka virzi ngi moholo, yo ɓa a slikiɗaka hiri ngi mohol a muŋ kini.

¹³ Sey i ɓukuw di da ka buyo, ɓa ki si na sin le, da a ndiraka walahay nah le, yo da a slikiɗaka mohol naŋhaya le a muŋ na, buutu ati laada waɗ jiviɗe, t'anta sa wurkaka mata so tuwa. Kanah na, a sa suw ti mendere da ka buyo ma.

¹⁴ Ani wurenna, i ra zumam asi ka buyo, na a tiɓaŋ ɓa i pulaka a hirsukuw ta. I slinam ti ɓi ndra mufukuw di hana da ka buyo na,

¹⁵ ɓa mizli a wunjilaka ɗerewol ngi wulka ɓi keŋ, ngi dideˀ ɗikey zleˀe na. Ki sa luuma ar ɗerewol nah na, walahay nah, i walahay mislikiɗa ɓi ndrehhe, mira so ti mendere da buyoy waɗ da hirwuy ngi buy miwi li vuna. Yo diga zlezle vuna kwana, mizli ngi raˀahay a pulaka slikiɗa ɓi ɗaˀ ta si. Miwahaka walahay nah zleˀe vuna, aseˀeŋ.

¹⁶ I wuɗ i ɓukuw di da ka buyo ɗaˀ ɗaˀ le, da a ndiraka walahay nah le, yo a slikiɗaka mohol naŋhaya hiri nah le a muŋ na, naɓa k'anta sa wa li vay Efrata mata.»

Mbiɗa mingiɓi ngi buy Artakzerses

¹⁷ Buy Artakzerses a mbiɗa taŋ di ani: «Ɗerewol hana da Rehum, buy miwi li ati Simesay, mbur mutoho gwat, waɗ da cil kum mekelemey mipam a Samari waɗ tir li mindir tisi pas ngi pastaˀ ngi mizaw Efrata, jam jam kum.

¹⁸ Ɗerewol kum mislinikiy di na, i muslufa le kpah kpah kuy kuy a mbuŋ ɗu.

¹⁹ Yi vula jiviɗ le da mizli, a wunjilaka le, a lumaka na, diga misi ngadana ta vuna si na, walahay Zeruzaleme, ada slikiɗ ɓi ar buyoyo. Mizli ngi raˀahay a vulaka vu taŋ ngi slikiɗa ɓi waɗ ngi zlira mizli.

²⁰ Ti zlezle zleˀe na, buy migidaŋhay ada Zeruzaleme, a waka Efrat, li vay si pas ngi pastaˀa le cek. Mizli mawurkaka taŋ buutu ati laada waɗ wurka jiviɗe.

²¹ Wurenna, ɓaka mizli ɗaˀ, ɓa a tikaka slra ngi mizli tayna. Anja a ndiraka walahaya ta, sey da ya muvula taŋ jiviɗ nah le far.

²² Jam lesl, anja ki puraka ɓi nah ka sefel ta, vur malambaˀ masa gi haɗa ti vendeke, ngi so ti mendere da ya buyo.»

²³ Taŋ muslufaka ɗerewol ngi buy Artakzerses tuwa slaf slaf a mbuŋ Rehum, Simesay, mbur mutoho gwat, waɗ cil taŋhaya si na, a ram kutum nga Zeruzalem avu Yudehey, a tikaka taŋ ˀay ti gidaŋ ɓa a pulaka ndira haya.

Ndira hay ngi Bumbulvuŋ hiri naŋ a muŋ

²⁴ A cicaka slra ngi ndira hay ngi Buymisemuŋ a Zeruzaleme. Taŋ ɓi micicaka na, hã a ndila hin ngi Dariyus, buy Perse maɓul vi mucuw naŋ ar zuma buyo.