ESDRAS 1 - Bible en langue guiziga

Sirus mupula jiviɗ nga ndira hay ngi Bumbulvuŋ hiri naŋ a muŋ

¹ Ar vi mudumbuŋ ngi Sirus mazum buy a Perse na, ɓa gwat Bumbulvuŋ miɓa zleˀe ti balam mijiviɗ Zeremi a gi muduba na, Bumbulvuŋ a ca wuluk ani da Sirus, buy Perse, ɓa a til di mi, yo ɓa a toho ti tuh toh toh da mizli ngi si ruwuy naŋhay gar ma.

² Sirus, buy Perse, a ɓi ani: «Ya Siruso, zumabuy ngi si ruwuy gar na, Bumbulvuŋ, Buy muŋ, a vuliy di le da ya, yo naŋ ti hirnga naŋ vuna a ɓiy, ɓa i ra ndiraŋ hay a Zeruzalem, hirwuy Zuda.

³ Ko wa gar a wuzla kumo, mubo ti wuzla mizli naŋhay gar na, anja Buymisemuŋ naŋ a ndir ati naŋ, a mi nga Zeruzalem, hirwuy Zuda, nga ndira hay da Bumbulvuŋ Buymisemuŋ ngi Israyele. I Buymisemuŋ misi a Zeruzalem!

⁴ Ar li misi Israyeley mindiram le ara a ra gar na, anja mizli ngi digahay a jinaka mizli mamam na, ti ɓiri bara, ɓiri tapasl tapasl, zlili mekelemey, ginew, waɗ gwat taŋ mavulaka ngi mongoy taŋ vur hay ngi Buymisemuŋ misi a Zeruzalem na!»

⁵ Akẽh na, buy ngi wuzla muyoy ar sukwi ngi Zuda ati ngi Benjameŋ, yo masayay ati levihey, waɗ mizli gar, Buymisemuŋ mica taŋ wuluk ngi ru nga ndira hay ngi Bumbulvuŋ a Zeruzaleme, a jaka jiviɗe, a ram so.

⁶ Dar midigwi taŋhay gar, a jinaka taŋ haɗi, a vulaka taŋ gwat ngi ɓiri bara ati ngi ɓiri tapasl tapaslay, zlili mekelemey, ginew, gwat mupuɗaw puɗaway waɗ gwat muvula ngi mongoy taŋhaya gar.

⁷ Gwatay, Nabukodonozor mihila taŋ zleˀe ar hay ngi Buymisemuŋ a Zeruzalem, ara pa taŋ ar hay kuli naŋhay na, buy Siruso, a bo taŋ a muŋ.

⁸ Sirus, buy Perse, a vula jiviɗ da Mitredat, mbur miji zlili, ɓa a pula gwat tayna asi haŋ ngi Sesebasar, yarama ngi ruwuy Zuda.

⁹ Gwat tayna, a slufaka t'ani hĩ: taasa mipitikayya pitikayya ngi ɓiri tapasl tapasl, kukur makir, waɗ ngi ɓiri bara durmuk pal, sliwiɗ kukur cuw nga ngoltir,

¹⁰ zuŋ skiɗ ngi ɓiri tapasl tapasl, kukur makir, waɗ ngi ɓiri bara, ngi gi slra ho gar, skat skat mufaɗ ti kuruˀu, waɗ gwat mekelemey, durmuk pal.

¹¹ Jommo gar na, gwat ngi ɓiri tapasl tapasl ati ngi ɓiri bara, a gam le durmuk zlum ti skat skat mufaɗa. Ti mizli mijahay macohom ti Babiloŋ nga Zeruzaleme, Sesebasar a hila gwat tayna cek a haŋ.