EFESEY 3 - Bible en langue guiziga

Pol mitila mi da mizli Yudehey ta

¹ Vurˀe, ya Polo, yi mbur dangay asi Yesu Kristu vur kum Yudehey ta na.

² Buymisemuŋ migiy mezle, mupuliy slra ɓa yi ga vur kum na, ki cinaka ɓi nah le ɗaˀ gisiŋ ta kwa?

³ Ɓi naŋ mufuna wuluk ngi mbur na, a njikiy di le, ɓa i sinaŋ. I toho ɓi nah le neˀe.

⁴ Kum masa slufaka na, zliv kisa sinaka gu, i si na ɓi mufuna wuluk ngi mbur ngi Kristu le.

⁵ Ɓi mufuna wuluk ngi mbur nah na, Buymisemuŋ a biga da mizli misi zleˀeheye ta. Amma wurenna, a njika le da mislin naŋhay ati mijiviɗ naŋhaya ti ˀUf naŋ.

⁶ Ar jum ati Yesu Kristu na, gwat Buymisemuŋ miwi di vu da mizli naŋhaya, Yudehey ta na, a sa lumam rak rak ati Yudeheye ya. A tiram le i dumvu purla. Gwat Buymisemuŋ miɓa ɗaˀ le, a sa vula da mizli tisi Ɓimezle ngi Kristu na, a sa lumam aya.

⁷ Ya mitiri gawla ngi tila mi ti Ɓimezle na, mbele gwat Buymisemuŋ muvuliy di asi gimezle naŋ ti biga gidaŋ naŋ na.

⁸ Mitiɓihey ngi dirbahay wãˀ na, yi mikiɗa mi taŋ ndok wãˀ. Dambalaka na, Ɓimezle ngi Kristu mihaɗi makiɗ mi ta na, Buymisemuŋ a giy mezle le, ɓa i til di mi da mizli Yudehey ta na.

⁹ Yo miga gwatay gar i Buymisemuŋ, ɓi naŋ mufuna wuluk ngi mbur, muɗum zlezle zleˀe na, ɓa i njika da mizli, a slaka wala naŋ kwaŋ kwaŋ.

¹⁰ Naŋ kine, wurenna gwat misi gidaŋhay, yo mazumam buy a muŋ, ɓa a sinaka sinmijileŋ miwal wal ngi Buymisemuŋ cek gu na, mbele Cikil ngi misikristuhoy.

¹¹ Buymisemuŋ a ga kahana, kaɓa wuluk naŋ, naŋ mujuwa a mevele zle ngi sete, naŋ miga gisiŋ tisi Buy ndra Yesu Kristu na.

¹² Ar ndra mujom ati Kristu, yo tisi ndra matiɓakaŋ na, jiviɗ ada baŋ a mbuŋ ndra ɓa i kiraham ng'avu Buymisemuŋ, manja zluwun ko neˀ.

¹³ Vurˀe, i ra gukum ambuh ambuh, anja ki hĩhĩyam asi bonoy ya masa vur kum na ta. Magukum ɗongor na, i nah.

Wuɗavu ngi Kristu

¹⁴ Vurˀe, i ra huruk huruk ti poprok a mbuŋ Cine ndra.

¹⁵ Mizli mazilam cine a muŋ waɗ a ruwuy gar na, a lumoko slimiɗ hana ti vaˀaŋ.

¹⁶ I ra tumbulo Buymisemuŋ misi ti dudok mihaɗi na, anja ɓa tiri ti kum gboŋgboŋ ti gidaŋ ngi ˀUf naŋ, ɓa mbur ngi hur kum a lum gidaŋ.

¹⁷ Anja a ga ɓa Kristu a cifi a hur kumo tisi tiɓi kum na, ɓa ki diram virzi hǝɗ hǝɗ wãˀ, yo zlak kuy kuy ar wuɗavu ngi Kristu.

¹⁸ Naɓa kahana na, kum ati mitiɓihey gar na, wuluk Buymisemuŋ mujuwa a mevele na, kisa lumam gidaŋ ngi sla wala ngi wuɗavu ngi Buymisemuŋ misliprik, mijek, musubur, yo mijileŋ haɗa na gu muduba.

¹⁹ Yo ɓa ki sinaka wuɗavu ngi Kristu mudum hirnga ngi sinay gar na, ɓa ki naham, hã Buymisemuŋ a ndir angi kum wãˀ.

²⁰ Buymisemuŋ a ndila le ngi ga ndra gwata haɗa, a sluf ta, fineˀ ndra macufuɗakaŋ ati ndra mawulkaka na. Asi ara gi slra a hur ndra ti gidaŋ naŋ.

²¹ Anja Buymisemuŋ a lum dudok angi Cikil ngi misikristuhoy, tisi Yesu Kristu, hã ngi set ngi samadin! Amin.