EFESEY 2 - Bible en langue guiziga

Zleˀe kum i mumucahay, wurenna kum ti siifa

¹ Zleˀe na, kum i mumucahay asi gi malambaˀ kum, yo asi gi mungra kum.

² Ki sipam zleˀe i jiviɗ mupurla ati ngi duniya hana. Ki cinam mi zleˀe da buy ngi setenehey mazum buy ar birngiŋ. I setene magi slra wurenna a mevel mizli mislikiɗa ɓihey avu Buymisemuŋ.

³ Zleˀe kwana, ndra gar ka taŋ vuna ya. I sipam gwat kpak ngi vu ndra mahĩyã. I gam gwat vu ndra ati lesl ndra mawuɗo. Naŋ kine, ti kpak ngi vu ndra na, i ndilaka le ɓa Buymisemuŋ a zuɓ himaˀ ar ndra kaɓa naŋ mazuɓ ar mizli mekelemey na ya.

⁴ Amma Buymisemuŋ a pur ˀircece haɗi teˀe, asi wuɗavu naŋ, naŋ muwuɗ ndra haɗa na.

⁵ Ti ndra mumicam zleˀe asi gi malambaˀ ndra na, Buymisemuŋ a vula ndra siifa le jom ati Kristu. Kum milaham na, asi naŋ mugukum mezle.

⁶ Ar ndra mujom ati Kristu na, Buymisemuŋ a slikiɗa ndra le ti wuzla mumucahaya ati naŋ, a cifa ndra le ar li ngi muŋ.

⁷ Naŋ kine, gimezle ngi Buymisemuŋ, misi gwat ngi wa ti naŋ, anta na, Buymisemuŋ a wuɗ le ɓa a sa biga ndra di ti mbuŋ tisi gimezle naŋ, naŋ miga ndra di ar ndra mujom ati Yesu Kristu na.

⁸ Asi mike, kum milaham na, asi gimezle ngi Buymisemuŋ, yo mbele tiɓi kum na. Kum milaham na, ɓi nah a so ti vu kum ta, i gwat ngi vul ngi Buymisemuŋ.

⁹ Ɓi nah a so tivi gwat ngi gi kum ta, vurˀe mbur a huhum di vu gu ta.

¹⁰ Na, miga ndra i Buymisemuŋ, a ga ndra ɓa i gam gwat mezlehey ar ndra mujom ati Yesu Kristu. Buymisemuŋ a ɗiya gwat mezle tayna le daf dumbuŋ ɓa i gaka taŋ.

Ar ndra mujom ati Yesu Kristu na, i tiram le purla.

¹¹ Kum Yudehey ta, miya cak ti yi. Yudehey mazilam mizli manja ci mizaway na, i kumo. Amma Yudehey a zilaka vu taŋ: mizli mici mizaway, asi vivi ngi vu vu taŋ na. Wulkaka keŋ so.

¹² Zleˀe na, kum kileŋ avu Kristu, kum i mulakay. Kum anta wuzla mizli ngi Buymisemuŋhoyo ta. Buymisemuŋ mujum ˀay ati mizli naŋhay, naŋ miɓa ɗaˀ le na, kum anta nga ta. Kum manja Buymisemuŋ ar duniya, yo manja njaha hiri.

¹³ Amma wurenna, kum mikileŋ zleˀe tuwa, ki kirohoko le gweˀ ng'ava, mbele Kristu mipa pumbus naŋ.

¹⁴ Miga ɓa i ndiram zuy zuy na, i naŋ. A jumo mizli Yudehey ati Yudehey ta na, ɓa a tiram sukwi purla. Kristu a mbizla mohol mawunka wala ngi Yudehey ati Yudehey ta na, ti dumvu naŋ, naŋ muvula. A kiɗa mi ngi gi mesene ar wala taŋ le.

¹⁵ Ɓimujuwa ati ɓimuɗuva waɗ ɓi ngi sipi ngi raˀahaya, a susuymo taŋ le avra ɓa a jumo Yudehey ati Yudehey ta na, ɓa a tiram sukwi nawaya purla ar taŋ mujom ati naŋ, a ga taŋ ɓa a cifam zuy zuy ar wala taŋ.

¹⁶ Yo sukwi mucuw tayna gar na, a jumo taŋ le ar dumvu purla, a ɗiya ɓi ngir wala taŋ ati gi mezle le ti muc naŋ angi dum mizlira. Kristu a kiɗa mi ngi gi mesene le anga.

¹⁷ A so tila mi ti ɓi ngi vula zuy da kum mikileŋ kileŋhey zleˀe, yo waɗ da mizli migweˀe gweˀhey

¹⁸ Yudehey ati Yudehey ta na, ndra gar ndra makraham gweˀ ng'avi Cine ndra gu na, mbele Kristu ti jini ngi ˀUf Mipal nah vuna.

¹⁹ Naŋ kine, kum Yudehey ta na, kum i mulakay mata, kum i moholoyoy mata, amma mizli ngi ruwuy purla ati mizli ngi Buymisemuŋhoyo, kum i ngi wazlaray Buymisemuŋhoy.

²⁰ Ɗuva virzi ngi hay i misliney ati mijiviɗey. Kum i dalam naŋ. Ɗugur ngi jaha mivaya, i Yesu Kristu vuna.

²¹ Maga ɓa dalam a ndir gidaŋ gidaŋ, yo a gil ɓa a tiri hay mipal da Bumbulvuŋ na, i Kristu.

²² Ar kum mujom ati naŋ na, kumo kwana, kum jom ati mizli mekelemeye, kum i ɗugur ngi ndira hay, ɓa ki tiram hay ngi Buymisemuŋ masa cifi ara tisi ˀUf naŋ.