EFESEY 1 - Bible en langue guiziga

Ji haŋ

¹ I ya Pol, Buymisemuŋ a wuɗ le ɓa i tiri mislin ngi Yesu Kristu. I ya matoho ɗerewol hana da mizli ngi Buymisemuŋhoy misi a Efez, mizli miteŋteŋhey ar taŋ mujom ati Yesu Kristu.

² Anja Cine ndra Buymisemuŋ ati Buy ndra Yesu Kristu a gukum mezle, a vulukum zuy.

Buymisemuŋ miga ndra mezle tisi Kristu

³ Hunumukum Buymisemuŋ, Cine ngi Buy ndra Yesu Kristu. A ɗuwula ndra mi le haɗi ar ndra mujom ati Kristu, a vula ndra gwat ngi muŋhoy gar.

⁴ Ar ndra mujom ati Kristu na, Buymisemuŋ a wina ndra le dumbuŋ angi naŋ miga duniya, ɓa i ndiram a mihiri naŋ, ndra pal, manja ɓi malambaˀ avu ndra. A wuɗ ndra le.

⁵ Buymisemuŋ a juwa ɓi nah le a mevele daf dumbuŋ ɓa a sa tiri ti ndra ziri naŋhay naŋ migila ndra tisi Yesu Kristu. A wuɗ kahana vur a hĩyã le.

⁶ Hunumukum Buymisemuŋ so, asi gimezle naŋ misi ɓi nah a ɓi ta, naŋ miga ndra di haɗa ar ndra mujom ati Mangal naŋ, naŋ mawuɗ haɗa na.

⁷ Kristu a mbiɗa hirnga ndra le ti pumbus naŋ ar ndra mujom ati naŋ, yo mungra ndrahay a puyam le avra kaɓa gimezle Buymisemuŋ miga ndra di haɗi na.

⁸ A ga ndra mezle le haɗi fineˀ gidaŋ, a vula ndra sin naŋ mijileŋ le haɗa, yo a vula ndra lesl le haɗa.

⁹ Ɓi naŋ mufuna wuluk ngi mbur, naŋ mawuɗ, yo ɓi mezle naŋ mujuwa a mevele daf dumbuŋ zleˀe na, a biga ndra di le.

¹⁰ Ɓi Buymisemuŋ mujuwa a mevele, ɓa a sa ga wãˀ ar kiɗa mi ngi hin na, i naŋ muwuɗ ɓa a jumo gwat ngi muŋhoy ati ngi ruwuyoy kurzluˀ gar arleˀe, ɓa Kristu pal naŋ macifi buy a hirnga taŋ.

¹¹ Ar ndra mujom ati Kristu vuna ma na, ar ɓi ngi lahavu na, i lumam mi ngi ndra le, asi Buymisemuŋ a wina ndra le daf dumbuŋ ka naŋ miɗiya jiviɗ naŋ,

¹² ɓa i hunumakaŋ asi dudok naŋ, ndra mizli mudumbuŋhoy, ar njaha hiri ndra ar Kristu.

¹³ Ar kum mujom ati naŋ na, ki cinaka ɓi mikaslsla, Ɓimezle maluhukum na le ma, yo ki tiɓakaŋ le, joˀ Buymisemuŋ a ɗuvukum lammba ngi ˀUf Mipal, naŋ miɓa ɗaˀ le tuwa.

¹⁴ Lih ndra masa laham wãˀ na, i gwat mezlehey Buymisemuŋ miwi taŋ vu da mizli naŋhay. Ndra masinaka i gisiŋ gisiŋ na, avu ˀUf naŋ vuna. Hunumukum Buymisemuŋ misi ti dudoko so!

Pol midir dibiɗ

¹⁵ Vurˀe, ya kwana, zle ti ya micina kum mitiɓaka ɓi ngi Buy Yesu, yo kum mawuɗam mitiɓihey gar na,

¹⁶ ya muwuluk le keŋ ar kum ar diradibiɗ ɗu gar na, y'anta pula gi sise da Buymisemuŋ vur kumo ta.

¹⁷ Anja Buymisemuŋ, ngi Buy ndra Yesu Kristu, Cine misi ti dudoko, a vulukum ˀUf misi sinmijileŋ, manjikukum Buymisemuŋ, hã ɓa ki sinakaŋ kuy kuy wãˀa.

¹⁸ Anja Buymisemuŋ a pusluɗukum mevele njahha, ɓa ki sinaka naŋ muzulukum, ɓa ki njaham hiri njah. Yo ɓa ki sinaka dudok naŋ mihaɗi waɗ gwat naŋ miwi taŋ vu da mizli naŋhaya,

¹⁹ ɓa kisa sinaka gidaŋ naŋ mihaɗa, naŋ miɗiya vur ndra mitiɓihey. I gidaŋ nah, Buymisemuŋ mibiga mbar vu wãˀ.

²⁰ A biga ti naŋ mislikiɗa Kristu baɗ ti wuzla mumucahay, naŋ micifaŋ tir vay hazum naŋ a muŋ.

²¹ Buymisemuŋ a cifa Kristu le, naŋ dum hirnga ngi gwat misi gidaŋhay gar, ngi gwat mazumam buyoy gar, naŋ dum hirnga ngi gidaŋ ngi wi mizli gar, ngi buy mimadiɗahay gar, ngi slimiɗey macaka taŋ angi duniya hana tew ta ma, amma angi duniya misi ti mbuŋ ma.

²² Haˀaw, Buymisemuŋ a pa gwataya le gar asi sar ngi Kristu. A cifaŋ i buy ngi gwatay gar, i hirnga ngi Cikil ngi misikristuhoy.

²³ Cikil ngi misikristuhoy i dumvu naŋ. Kristu naŋ da zlaɓ zlaɓ ati taŋ, Buymisemuŋ kwana naŋ da wãˀ angi Kristu ya.