DIMIS MIMEZLE 7 - Bible en langue guiziga

Ngwasay ati diilihey

¹ Mawa Sulamit, mawa, mawa, ɓa i singilukuw. Sulamit maɓuruk a wuzla ɓuruk mitaˀ taˀ cuw na, kisa singilaka mbri mbrike?

Zil

² Kay, sar ɗik a pur kuy teˀ ar mapiya piyah, ka zuŋ ngi mbur madiɗa! Li juwa gwat duba ɗike kaɓa dangwa, mbur misina vuɗ muvuɗa le.

³ Mamay ɗike puɗwarrakaɓa kiya zil, mbaazla mazĩˀĩ ndum anta kic ara ta! Didak ɗike kaɓa daw mukuso le a məlaŋ, matay mafuyuk gun hirnga naŋ.

⁴ Ɗuwa ngi didak ɗike cuw taŋ hijirak kaɓa ziri muunihey, kaɓa ziri misa mangazaway.

⁵ ˀAy ɗike ndat kaɓa hay musubur mindiraka ti sliŋ ngi begene. Hiri ɗike ɗileŋ ɗileŋ kaɓa futuŋhoy a Heseboŋ, migweˀ a mizlingre ngi ci ngi mizli gar. Hutuŋ ɗike cap a mi kaɓa hay musubur a libaŋ, mupulaˀ hiri nga Damas.

⁶ Hirnga ɗike ndat kaɓa muwã Karmel, yo ngwic ngi hirnga ɗike wirik wirik, jurwuɗ naŋ na, turwaɗ turwaɗ ar buy madiɗa.

⁷ Kay, ka kuy teˀe, ka mezle teˀe, mangasl ɗu, mikiɗa may ɗu.

⁸ Deŋ ɗike, a bam vu ati babazla, yo ɗuwa ngi didak ɗike hijirak, kaɓa widis miyi le docok.

⁹ Joˀ yi ɓi: «Sey i jiɗ ng'ar babazla ɗu, i ngila yi naŋ mudocok» na. Anja ɗuwa ngi didak ɗike, a tiri kaɓa yi ngi gudubun mudocok, yo hutuŋ ɗik maŋzoˀo kaɓa yi ngi mayngoro.

¹⁰ Anja balam ɗik a ndir ndum kaɓa mbaazla miɗalak. Haˀaw i mbaazla mundum ya miwi di vu da yeme ɗu, da ndra muroko hinjam na, a ɓul lelele avu mi ndraˀahaya.

Ngwasa

¹¹ Ya yi ngi mikiɗa may ɗu, yo naŋ kwana, a ro ti may ɗo.

Da ara wuɗukuw na, ka ar wuya Ngwasa

¹² Mikiɗa may ɗu, sawa, bukum, i ra hinam ar walahayay.

¹³ Prik prik na, akum ng'ar guva ngi gudubun, akum ɓa i ra puraka, zliv gudubun ara gi ɗangal, ɗangal ara wuna mi naŋ mimbizeˀ na kwa mbrike? Yo zliv hunduruk ara fuyuk kwa mbrike? I sa buguw wuɗa vu ɗu a diga.

¹⁴ Matay ngi wuɗa vu, ara ŋzoˀo jirre, yo sukwi ngi yi ngi widis mimezlehey gar ada a mizlingre ndraˀahaya, misi ngi mbulumna ati mivihey. Mikiɗa may ɗu, yi ra wi taŋ vu da ka.