DIMIS MIMEZLE 6 - Bible en langue guiziga

Diilihey

¹ Ka mikuy teˀ ngi wazla ngwasay, mikiɗa may ɗik a ro amaka? Mikiɗa may ɗik a ngi hirnga ng'amaka? Anja ɓa i ra supoko di bummo.

Ngwasa

² Mikiɗa may ɗu a pi sar le ng'ar jarne naŋ, misi ti mufuyukoy ara mazãˀãm ndummo, nga luuma gwat ngi zum naŋ, yo nga ngila matay mezle mafuyuk.

³ Ya yi ngi mikiɗa may ɗu, yo mikiɗa may ɗu inga ya, naŋ ara sipi gwat ngi zum a wuzla matay mezle mafuyuku.

Deŋ ngi maˀãy ɗu Zil

⁴ Yeme ɗu, kay, ka kuy teˀ kaɓa walahay Tirsa, hiri a ɗuv avu ka ta kaɓa Zeruzalem, amma ki gi zluwun da mbur kaɓa sojehey ɓi micicam le ar vurum.

⁵ Mbiɗi duba, ki puriy ta, asi hiri ɗik a giy gigisl. Ngwic ngi hirnga ɗike kaɓa ˀaway gezleŋ taˀ, mapoko sar liɗiɗiɗi ti muwã Galaˀat.

⁶ Sliŋ ɗikeye babara fatatta kaɓa tumuŋ gezleŋ taˀ, majiɗoko nga duba zaw tir li bun taŋ: zlaɓ cuw zlaɓ cuw, ko anta gwahaka taŋ ta.

⁷ Kwala ɗike, a puro ligidaˀligidaˀ tir zana ɗik minjar a hirnga na, ka yi ngi hunduruk micahaka le cah a wuzla cuw.

⁸ Ko da buyo naŋ ti maˀãyay kukur merkeɗe, mangaslaya, kukur dangafaɗa, yo ziri diiliheye slaf le ta tekeɗe kwana,

⁹ amma ngwas ɗu nga ya, naŋ purla tewle si, gonok ɗu mifetek fetek, naŋ kpesl kine a haŋ mumuŋ, naŋ i ngisi mevel ngwas miyi naŋ. Ziri diilihey a purakaŋ na, a hunumakaŋ, maˀãyay ati mangaslaya, a ngilam di wuy ɓaˀa.

¹⁰ Ngwas mabo kaɓa li mawun njahha ngi diga na i waka? Mukuy teˀ kaɓa kiya, yo mawucuɗ kaɓa pas, waɗ magi zluwun da mbur kaɓa sojehey ɓi micicam le ar vurum na i waka?

¹¹ I pi sar ng'ar jarne ngi babazla, ɓa i singila kalaf mapo tir hurjijiŋ na, ɓa i pura, a ro na gudubun ara gi guduguluk kwa? Yo hunduruk ara fuyuk kwa mbrike?

¹² Yi si na ɓa i gi kini mata, a tiri ti ya ngbimme, i zuŋ ngir sukwi ngi mizli madiɗahay ngbaŋ.