DIMIS MIMEZLE 4 - Bible en langue guiziga

Zil

¹ Kay, yeme ɗu, ka kuy teˀe! Kay, ka kuy teˀe! Hiri ɗik a puro tir zana ɗik minjar a hirnga na, sleɗeɗe ka gonoko. Ngwic hirnga ɗike silip silip haɗa, kaɓa madiyaˀaw gezleŋ taˀ, mapoko sar liɗiɗiɗi ti muwã Galaˀat.

² Sliŋ ɗikeye kaɓa tumuŋ gezleŋ taˀ mislaka ngwic taŋ le, majiɗoko nga duba zaw tir li bun taŋ, zlaɓ cuw zlaɓ cuw, anta gwahaka taŋ ta.

³ Mi ɗik ka mazum di gwata, naŋ kaɓa gabaga mislirkeɗ, mindezze, yo mingiɓi ɗike ndum haɗa. Kwala ɗike, a puro ligidaˀligidaˀ tir zana ɗik minjar a hirnga na, ka yi ngi hunduruk micahaka le cah a wuzla cuw.

⁴ ˀAy ɗike ndat kaɓa hay mindat ngi Davit, mindiraka ngi luuma bugawla, mbaray durmuk law law a huroˀo, sukwi ngi gwat ngi vurum ngi gambarahay gar ara.

⁵ Ɗuwa ɗikeye cuw taŋ hijirak kaɓa ziri muunihey, kaɓa ziri mangazaw misahay, mazumam a wuzla matay mafuyuku.

⁶ Ɓa hã himiɗ ngi pastaˀ a sa go fiɗek fiɗek, yo ɓa hã susuɗuk ngi gwatay a sa muruɗ haɗa na, naɓa yi cuh le nga muwã mir, waɗ ng'ar miɗingir ngi mukuturɓuy ngi zlum ti zlum.

⁷ Yeme ɗu, kay, kuy ɗike, a zli ta wãˀ. Ko gwat mikic neˀ tekeɗe avu ka anta.

⁸ Haˀaw mangasl ɗu nga ya, so asi ya zle a Libaŋ, so asi ya zle a Libaŋ! Po sar ti muwã Amana, ti hirnga muwã Senir waɗ ti Hermoŋ, tir kuɓuŋ ngi moboroy, yo tir muwã ngi dirlengeheye.

⁹ Haˀaw sukum ɗu, mangasl ɗu ngaya, kay, ki wiy le duwlak so, ka misliɗa hiri le sliɗ ng'ar ya na, a wiy duwlak wãˀ, virzle migindaɗ purla ngi si ˀay ɗike, a wiy le dulak.

¹⁰ Haˀaw sukum ɗu, mangasl ɗu ngaya, wuɗa vu ɗik a ciriy hiri le haɗa! Kayya! Wuɗa vu ɗik na, ndum naŋ a funa mbaazla le, yo zĩˀĩ ngi urdi misi avu vu ɗike, a funa urdi mihindrik hindrikeye le ceke.

¹¹ Haˀaw mangasl ɗu nga ya, mididigin ara guco tivi mi ɗike, irne ɗik ara ɓulo mam ati ɗuwa, yo zana ɗikeye, a zãˀãm jirre kaɓa muwã Libaŋ.

¹² Haˀaw sukum ɗu, mangasl ɗu nga ya, ka kaɓa jarne migicaka miviŋ naŋ le kiɗasl, kaɓa miviɗiviɗi ngi yam migicaka le, kaɓa vigiɗ ngi yam mislirɓaka mi naŋ le sliraɓ sliraɓ.

¹³ Hunduruk ara pus haɗa ar jarne ɗike, ara yi zingaˀ mimezlehey: kalaf hene ati nardi, ada pusam haɗa a diga.

¹⁴ Nardi ati kalaf ngi luguɗo laray, ngi giziŋ urdi ati ngi dum ngi luguɗo laray, ngi sukwi ngi mukuturɓuy ngi zlum ti zlumoy gar, urdi mikiler mazĩˀĩ ndum haɗa ati tegbrehey, waɗ urdi mihindrik hindrik mimezle naŋhay gar.

¹⁵ Ka ki miviɗiviɗi ngi yam ngir jarne, vigiɗ ngi yam masli sleˀ le ta, maɓulo ti Libaŋ.

Ngwasa

¹⁶ Himiɗ vay muŋ, puɗuku! Himiɗ vay ruwuy, sawa! Gi fiɗek fiɗek ar jarne ɗu na, ɓa urdi mihindirik hindirik naŋhay a zãˀãm jirre! Anja mikiɗa may ɗu a co ng'ar jarne naŋ, ɓa a zum yi ngi widis mimezle ngi raˀahaya.